88
ማዱዋ ደማናዉ ሺቆ ዋሱዋ
ዛማረቱዋ ካፖ፥ ቆራሀ ናናቱዋ ማዛሙርያ፥ ማዱዋ ዎሳ፥ ኤዝራህያ ሄማነ አኬካን ጻፌዳ ግንጹዋ.
1 አቤት መꬍና ጎዳዉ፥ ታና አሽያ ጾሳዉ፥
ታን ጋላስ ነዉ ዋሳይ፤
ቃማካ ነ ስንꬃን ዬካይ።
2 ታ ዎሳይ ነ ስንꬃ ጋኮ፤
ነ ሀይꬃ ታ ዋሱዋኮ ዛራ።
3 አያዉ ጎፐ፥ ታ ደኡ መቱዋን ኩሜዳ፤
ታን ሀይቃና ማታድ።
4 ታን ዱፉዋን ገልያ አሳቱዋና ፓይደታድ፤
ዎልቃይ ባይና አሳ ግዳድ።
5 ታን አሃቱዋ ግዶን አጌዳ አሳ ማላ፤
ዎꬊደ ዱፉዋን የጌዳ አሳቱዋ ማላ።
ታን ነ ኡባ ዶጌዳ፥
ነ ማዱዋፐ ሃኬዳ አሳቱዋ ማላ።
6 ኔን ታና ጪሞ ኦላን፥
ህርክ ꬉማ ሳኣን የጋዳ።
7 ነ ሀንቁ ታና ዴጼ፤
ነ ሀንቁዋ ቤታይ ታና ኡባና ሙኬዳ።
8 ኔን ታ ዳቦቱዋ ታፐ ሃሳዳ፤
ኡንቱንቶ ታና ሸነይያዋ ኦꬃዳ።
ታን ዶደታድ፤
ከሳ አካናዉካ ዳንዳይከ።
9 አቤት መꬍና ጎዳዉ፥
ካዩዋ ጋሱዋን ታ አይፈቱ ጋልጄድኖ።
ኡባ ጋላስ ታን ኔኮ ዋሳይ፤
ታ ኩሽያ ኔኮ ምጫድ።
10 ኔን ሀይቄዳዋንቶ
ማላልስያባ ኦꬃይ?
ኡንቱንቱ ደንዲደ ኔና ጋላቲኖ?
11 አገና ነ ሲቁ
ዱፉዋ ግዶን ሃሳየቲ?
ኔን አማነትያዌካ ባየꬃ ሳኣን ኦደቲ?
12 ነ ማላልስያ ኦሱካ ꬉማን ኤረቲ?
ዎይ ነ ጽልቶተꬃይ ዶገቴዳ አሳቱዋ ቢታን ደኢ?
13 አቤት መꬍና ጎዳዉ፥ ታን ኔኮ ዋሳይ፤
ዎንታን ዎንታን ታ ዎሳይ ነ ስንꬃ ጋኬ።
14 አቤት መꬍና ጎዳዉ፥ ታና ኔን አያዉ አጋይ?
ነ ሶምኡዋ ታፐ አያዉ ገንꬃይ?
15 ያላጋተꬃፐ ዶማደ፥
ታን ቱጋታድነ ሀይቃና ማታድ።
ታን ነዉ ዳጋማደ ሂዶታ ቃንጻድ።
16 ነ ሱልያ ሀንቁ ታ ቦላ ኡሾቴዳ፤
ነ ዳጋማይ ታና ባይዜዳ።
17 ኡንቱንቱ ጋላሳ ኡባ ድኡዋዳን ታና ዶዴድኖ፤
ታና ሙኬድኖ።
18 ኔን ታ ላገቱዋነ ታ ሲቆቱዋ ታፐ ሃሳዳ፤
ꬉማ ጻላላይ ታዉ ዳቦ።