79
ጋድያ ላአተꬃዉ ሺቄዳ ዎሳ
አሳፋ ማዛሙርያ
1 አቤት ጾሳዉ፥ አይሁዳ ግደና አሳቱ ነ ቢታ ቦላ ላቴድኖ።
ነ ጌሻ ጎልያ ቱንሴድኖ፤
የሩሳላመ ኮለሬꬄድኖ።
2 ኡንቱንቱ ነ ቆማቱዋ አሃ፥
ሳሉዋ ካፎ ቁማ ኦꬂደ፥ እሜድኖ።
ቃይ ነ ጌሻቱዋ አሹዋ ሳኣ ዶአቶ እሜድኖ።
3 ኡንቱንቱ ሱꬃ የሩሳላመ ዩሹዋን፥
ሃꬃዳን ጉሴድኖ፤
ኡንቱንቱ አሃ ሞግያዌ ꬋዬዳ።
4 ኑ ሾሮቶ ኑን ሸቂያዋ ግዴዶ፤
ኑ ሄራን ደእያዋንቱ፥
ሚጭያዋነ ቅꬍያዋ ግዴዶ።
5 አቤት መꬍና ጎዳዉ፥ ሀዌ አዉደ ጋካናዉ ሀናኔ?
ኔን መꬍናዉ ሀንቀታይ?
ነ ቃናትያ ሀንቁ ታማዳን ኤጻኔ?
6 ኔና ኤረና አሳቱዋ ቦላነ
ነ ሱንꬃ ጼሰና ካዉተꬃቱዋ ቦላ ነ ሀንቁዋ ጉሳ።
7 አያዉ ጎፐ፥ ኡንቱንቱ ያቆባ ዘረꬃቱዋ ዎꬌድኖነ
ኡንቱንቱ ደኢያሳ ባይዜድኖ።
8 ካሰ ኑ አዎቱዋ ኢታተꬃ ኑ ቦላ ፓይዶፓ።
ኤለካ ነ ማሮታ ኑዉ ኪታ፤
አያዉ ጎፐ፥ ኑን ሎይꬅ መቶቴዶ።
9 አቤት ኑና አሽያ ጾሳዉ፥
ነ ሱንꬃ ቦንቹዋ ድራዉ፥ ኑና ማዳ።
ነ ሱንꬃ ድራዉ፥ ኑና አሻ፤
ኑ ናጋራ አቶ ያጋ።
10 አሳቱ አያዉ፥ “ኡንቱንቱ ጾሳይ ሀቃን ደኢ?” ያጋኔ?
ነ ቆማቱዋ ሱꬃ ኡንቱንቱ ጉሴዳዋ ሀሉዋ፥
ኔን ከስያዋ ኑን ጼልሽን፥
ኡንቱንቱ ግዱዋን ቆንጭሳ።
11 ቃሸቴዳ አሳቱዋ ኦሊ ነ ስንꬃ ጋኮ።
ሀይቆ ፕርደቴዳዋንታ ነ ዎልቃ ግታተꬃዳን አሻ።
12 አቤት ጾሳዉ፥ ኑ ሾሮ ካዉተꬃቱ ኔና ቦሬዳዋ፥
ሀሉዋ ላፑን ኩሽያ ኡንቱንቱ ክዉዋን እድንꬃ።
13 ሄ ዎደ ኑን ነ አሳቱ፥ ነ ዉድያ ዶርሳቱ፥
መꬍናዉ ጋላታ ነዉ እማና፤
የለታፐ የለታ ጋካናዉ ኔና ዛር ዛሪደ ጋላታና።