77
ምንꬁዋ ዎሳ
አሳፍ ዛማረቱዋ ካፖ ጁዱቶ የጼዳ፥ ማዛሙርያ
1 ታን ጾሳዉ ማጋናይ፤
ታና ስሶ ጋደ ታን ጾሳ ዎሳይ።
2 ታን ታ መቱዋ ጋላስ ጎዳ ኮያይ።
ቃማን ታን ሸምፐናን ታ ኩሸቱዋ አኮ ምጫይ፤
ግዶፐነ፥ ታን ምነታናዉ ዳንዳይከ።
3 ታን ጾሳባ ቆፕያ ዎደ፥ ኦላይ፤
ታን አባ ዩሻ ቆፕያ ዎደ፥
ታ ሸምፑ ዳቡሬ።
4 ኔን ቃማ ኡባ ታና ገምእሹዋ ድጋደ አህሳሳ።
ታን ሎይꬃ ህርግያ ድራዉ፥
ሃሳያናዉ ዳንዳይከ።
5 ታን አꬌዳ ጋላሳቱዋ ቆፓይ፤
ካሰ ላይꬃቱዋካ ሀሳያይ።
6 ታን ቆፋ ሼካደ አቃይ፤
ታ ዎዛናይ ዩሽ ቆፕያ ዎደ፥
ታን ታ ሁጲያ ሀዋዳን ያጋደ ኦቻይ፤
7 “ጎዳይ ኑና መꬍናዉ አግ ባሻኔ?
ዛረꬂደ እ ኑና ኬካ በሰኔ?
8 አ ሲቁ አቴዴ?
እ ጌዳዌ ሀዋፐ ስንꬃናዉ ሳኣን ኦኔ?
9 ጾሳይ ማርያዋ ዶጌዴ?
ባረ ቃረታካ ሀንቁዋን ላሜዴ?” ያጋደ ኦቻይ።
10 ቃይካ ታን፥ “ታና ቆሄዳዌ፥
ኡባፐ ꬎቂያ ጾሳ ኡሸቻ ኩሺ፥
ካሰፐ ማድያ ማዱዋ አጌዳዋ” ያጋይ።
11 መꬍና ጎዳዉ፥ ነ ኦሶቱዋ ታን ቆፓና።
ኤ፤ ኔን በን ዎደ፥
ኦꬄዳ ማላልስያባቱዋ ኡባ ታን ሀሳያና።
12 ነ ኦꬄዳዋ ኡባ፥
ታን ዛራ ዛራደ ቆፓና፤
ነ ዎልቃማ ኦሶቱዋ ኡባ ታን ዩሻ ቆፓና።
13 አቤት ጾሳዉ፥ ነ ኦጊ ጌሻ፤
አይ ጾስነ ኑ ጾሳ ማላ ዎልቃማ ግደና።
14 ኔን ማላልስያባ ኦꬅያ ጾሳ።
አሳ ግዶን ነ ዎልቃ ቆንጭስያዋ።
15 ነ አሳ፥ ያቆባነ ዮሴፎ ዘረꬃቱዋ፥
ነ ቀስያን ዎዛዳ።
16 አቤት ጾሳዉ፥ ሃꬃቱ ኔና በኤድኖ፤
ሃꬃቱ ኔና በኢደ ያዬድኖ።
አባ ጪማቱካ ኮኮሬድኖ።
17 ሻረቱ እራ ዱገ ዛሪደ ትጌድኖ፤
ጉጉንꬃይ ሳሉዋን ጉሜዳ።
ነ ዋልቃንꬃይ ያን ሃን ዋልቃሜዳ።
18 ነ ጉጉንꬃይ ጉንꬃይ ጎትያ ግዶን ኮሹሜዳ፤
ነ ዋልቃንꬃ ጶለꬃይ ሳኣ ፖእሴዳ።
ቢታይካ ጋጅ ጋጂደ ኮኮሬዳ።
19 ኔን አባ ግዱዋና ሀመታሳ፤
ጪሞ አባ ግዱዋና አꬋሳ፤
ግዶፐነ፥ ነ ገዲ የꬌዳ ሳአይ ቤተና።
20 ሙሴነ አሮና ኩሽያን
ኔን ነ አሳ ዶርሳ ዉድያዳን ካለꬃዳ።