64
ናጋናዳን ሺቆ ዎሳ
ዛማረቱዋ ካፖ የጸቴዳ፥ ዳዊታ ማዛሙርያ
1 አቤት ጾሳዉ፥ ታን ማጋንያ ማጋና ኔን ስሳ።
ታን ታ ሞርከቶ ያያድ፤ ታና አሻ።
2 ኢታቱዋ ማቁዋፐነ፥
ኢታ ኦꬅያዋንቱ ሽቁዋፐ ታና ገንꬃ።
3 ኡንቱንቱ ባረንቱ እንጻርሳ ማሻዳን ሌፌድኖ፤
ቃይ ማርዘ ቃላቱዋ፥
ዎንዳፍያ ፖꬃዳን ዱካናዉ ጊግሴድኖ።
4 ኡንቱንቱ ቆሰቲደ፥
ባረንቱ ዎንዳፍያ ጽሎ አሳ ቦላ ዳፊኖ፤
አኬካይ ባይናን ዱኪኖ፤ ኡንቱንቱ ያይክኖ።
5 ኡንቱንቱ ባረንቱ ኢታ ማቆ እቱ እቱዋ ምንꬂኖ፤
ባረንቱ ጲርያ ቆስያሳ ዞረቲኖ።
ኡንቱንቱ፥ “ኑና ኦን በአኔ?” ያጊኖ።
6 ኡንቱንቱ ኢታባ ማቀቲደ፥
“ኑን ሎኦ ማቁዋ ማቀቴዶ” ያጊኖ።
ሄዌነ፥ አሳዉ ዎዛናይነ ካሀይ ጪማ ግድያዋ በሴ።
7 ሽን ጾሳይ ኡንቱንታ ባረ ዎንዳፍያን ዱካና፤
ኡንቱንቱ አኬከናን ማዱጻና።
8 ኡንቱንቱ ማቁዋ ድራዉ፥
እ ኡንቱንታ ꬋይሳና፤
ኡንቱንታ በእያ ኡባይ ሁጲያ ቃꬃና።
9 ሄ ዎደ አሳይ ኡባይ ጾሳዉ ያያና፤
አ ኦሱዋባ ኦዳናነ ዛር ዛሪደ ቆፓና።
10 ጽሎቱ መꬍና ጎዳን ናሸትኖነ፥
አኮ ባቃቲደ አቲኖ፤
ዎዛና ሱረቱ ኡባይ ጋላትኖ።