51
ማሮተꬃ ደማናዉ ሺቄዳ ዎሳ
ዛማረቱዋ ካፖ የጸቴዳ፥ በርሳብና ሻርሙጼዳ ሀኖታ ትምቢትያ ኦድያ ናታን አዉ ኦዲደ ስምና፥ ዳዊታ ማዛሙርያ
1 አቤት ጾሳዉ፥ አገና ነ ሲቁዋዳን ታና ማራ፤
ነ ቃረታ ዳሩዋዳን ታ ባይዙዋ ቁጫ።
2 ታ ኢታተꬃፐ ታና ሙለ ሜጫ፤
ታ ናጋራፐ ታና ጌሻ።
3 አያዉ ጎፐ፥ ታ ባይዙዋ ታን ኤራይ፤
ታ ናጋራይ ኡባ ገደ ታ ስንꬃና።
4 ታን ኔና፥ ነ ጻላላ ናቃድ፤
ነ አይፍያ ስንꬃን ኢታባ ኦꬃድ።
ሄዋ ድራዉ፥ ሃሳያደካ ኔን ልከ፤
ፕርዳደካ ኔን ጽሉዋ።
5 ታን የለቶደፐካ ቱሙ ናጋራንቻ፤
ታ አት ኡሉዋን ብሮ አትያ ዎደፐ ዶማደካ፥
ታን ናጋራንቻ።
6 ሄኮ ኔን ዎዛና ግዶ ቱማተꬃ ኮያሳ፤
ሄዋ ድራዉ፥ ነ አꬌዳ ኤራተꬃ ታ ጋርሳን ታማርሳ።
7 ሂሶጵያ ግያ ቦንጭያን ኔን ታና ጌሻ፤
ታን ጌያና።
ታና ሜጫ፤
ታን ሻቻፐ አꬋአደ ቦጻና።
8 ኔን ታና ናሸቻነ
ሀሹ ግያዋ ስሳ፤
ኔን ታና መንሬꬄዳባ ግዶፐካ፥
ዛራደ ናሸቻ።
9 ታ ናጋራፐ ነ ስንꬃ ዎራ ዛራ፤
ታ ኢታተꬃ ኡባ ቁጫ።
10 አቤት ጾሳዉ፥ ጌሻ ዎዛና ታ ግዶን መꬋ፤
ምንስያ አያና ታ ግዶን ኦራꬃ።
11 ታና ነ ስንꬃፐ ኦሎፓ፤
ነ ጌሻ አያና ታፐ አኮፓ።
12 ነ አቶተꬃ ናሸቻ ታዉ ዛራደ እማ፤
ታን ነዉ ኤኖ ጋደ አዛዘታናዳን፥
ታና ዘምፕሳ።
13 ሄ ዎደ ታን ባይዛንቻቱዋ ነ ኦግያ ታማርሳና፤
ሄ ናጋራንቻቱነ ኔኮ ስማና።
14 አቤት ጾሳዉ፥ ታና አሽያ ጾሳዉ፥
ሱꬃ ጉሴዳ ናጋራፐ ታና አሻ፤
ሄ ዎደ ታ እንጻርሳይ ነ ጽሎተꬃባ የጻና።
15 አቤት ጎዳዉ፥ ታ ዶና ዶያ፤
ያቶፐ፥ ታ እንጻርሳይ ነ ጋላታ አዋያና።
16 ኔን ያርሹዋን ናሸታንቶ ታ ነዉ ሺሻናሽን፥
ኔን ያርሹዋን ናሸታካ።
17 ጾሳዉ ያርሽያ ያርሹ
አሽከ አያና፤ አቤት ጾሳዉ፥
“ናጋራ ኦናን አጋርክታሻ” ግያ፥
መኤዳ ዎዛና ኔን ካꬋካ።
18 አቤት ጾሳዉ፥ ነ ዶሱዋን ጽዮንዉ ኬካ፤
የሩሳላመ ግምበቱዋ ግምባ።
19 ሄ ዎደ ጽሎ ያርሹዋን፥
ጹግያ ያርሹዋንነ፥
መህያ አሹዋ ዉርስ ጹግያ ያርሹዋን ኔን ናሸታና።
ቃይ ኮሩማቱ ነ ያርሽያሳን ያርሸታና።