40
ጋላታ ማዝሙርያ
ዛማረቱዋ ካፖ የጸቴዳ፥ ዳዊታ ማዝሙርያ
1 ታን መꬍና ጎዳ ዳንዳያን ናጋድ፤
እ ታኮ ስሚደ፥ ታ ዋሱዋ ስሴዳ።
2 ባሻ ኦላፐ፥ ሀልꬅያ ኡርቃፐ ታና ከሴዳ።
ታ ገድያ ዛላ ቦላን ኤሴዳ፤
ቃይ ታ ሀመꬃካ ሳሩዋ ኦꬄዳ።
3 እ ታ ዶናን ኦራꬃ የꬃ ዎꬄዳ፤
ሄ የꬃይነ፥ “ኑ ጾሳይ ጋላተቶ” ያግያዋ።
ዳሮቱ በኢደ፥ ያያናነ መꬍና ጎዳን አማነታና።
4 መꬍና ጎዳ ባረዉ አማነትያዋ ኦꬄዳ አሳይ፥
ኦቶራንቻቱዋኮ ጼለናዌነ፥
ዎርዳንቻቱዋኮ ስመና አሳይ አንጀቴዳዋ።
5 አቤት መꬍና ጎዳዉ፥ ታ ጾሳዉ፥
ኔን ዳሮ ማላልስያባ ኦꬃዳ፤
ኔናና ልከትያዌ ኦንነ ባዋ!
ኔን ኑዉ ቆፔዳ ሎኦ ቆፋ
ኦንነ ፓይዳናዉ ዳንዳየና።
ሄዌ ታን ኦድና፥ ዉርያዋ ግደና።
6 ኔን ያርሹዋነ እሙዋ ኮያባካ፤
ሽን ስሳና ማላ፥ ታዉ ሀይꬃ ዶያዳ።
ጹግያ ያርሹዋነ ናጋራ ያርሹዋ ኔን ኮያባካ።
7 ሄዋፐ ጉይያን ታን፥ “ጻꬃ ማጻፋን
ታባይ ጻፈቴዳዋዳን፥ ታን ያድ።
8 አቤት ታ ጾሳዉ፥ ታን ኔን ኮይያዋ ኦꬃናዉ ዶሳይ፤
ነ ህጊ ታ ዎዛና ግዶን ደኤ” ያጋድ።
9 ዎልቃማ ሺቁዋን ታን፥ “ነ ጽሎተꬃ”
ምሽራቹዋ ኦዳና።
አቤት መꬍና ጎዳዉ፥ ኔን ኤርያዋዳንካ፥
ታን ታ ዶናን ኦድያዋ አጋበይከ።
10 ታን ነ ጽሎተꬃ ታ ዎዛና ግዶን ቆሳበይከ፤
ኔን አማነትያዋነ አሽያዋ ኦዳድ።
ቃይ አገና ነ ሲቁዋነ ነ ቱማተꬃ፥
ነ ዎልቃማ ሺቁዋፐ ገንꬃበይከ።
11 አቤት መꬍና ጎዳዉ፥ ነ ማሮተꬃ ታፐ ሃሶፓ።
አገና ነ ሲቁነ ነ ቱማተꬃይ
ታና ኡባ ዎደ ናጎ።
12 አያዉ ጎፐ፥ ፓይዱ ባይና ኢታባይ ታና ዶዴዳ።
ታ ኢታተꬃይ ታና ጋኪደ ጎዜዳ፤
ታን ጼላናዉ ዳንዳይከ።
ታ ኢታ ኦሱ ታ ሁጲያ ብናናፐ ዳሬዳ፤
ታ ዎዛናይ ታ ግዶን ሴሬዳ።
13 አቤት መꬍና ጎዳዉ፥ ታና አሻናዉ ኤኖ ጋ፤
አቤት መꬍና ጎዳዉ፥ ታና ማዳናዉ ኤሌላ።
14 ታና ዎꬋናዉ ኮይያዋንቱ
ኡባካ ዬላትኖነ ካዉሽኖ።
ታን ቆሄታናዋ አሞትያዋንቱ
ካዉሺደ ጉየ ስምኖ።
15 ታ ቦላ፥ “አዉ ሀሹ! ሀሹ!”
ጌዳዋንቱ ጾነቴዳ ድራዉ፥ ዬላትኖ።
16 ሽን ኔና ኮይያ ኡባቱ፥
ኔናን ናሸትኖነ ሀሹ ጊኖ።
ቃይ ነ አቶተꬃ ዶስያዋንቱ ኡባቱ፥
“መꬍና ጎዳይ ግታቶ!” ያግኖ።
17 ታን ህዬሳነ መቶታንቻ፤
ታዋ ጎዳይ ቆፖ።
ታና ማድያዌነ አሽያዌ ኔና፤
አቤት ታ ጾሳዉ፥ ጋምኦፓ።