27
ጾሳና ደእያ አሳ አማኑዋ
ዳዊታ ማዛሙርያ
1 መꬍና ጎዳይ ታዉ ፖኦነ ታና አሽያዋ፤
ያትና፥ ታን ኦዉ ያያንታ?
መꬍና ጎዳይ ታ ደኡ ናገትያ ሚጻ፤
ያትና፥ ታን ኦዉ ዳጋማንታ?
2 ኢታ አሳቱ፥ ታ እጽያዋንቱነ ታ ሞርከቱ
ታና ዎꬋናዉ ታኮ ዎጽያ ዎደ፥
ኡንቱንቱ ባረንቶ ꬉበቲደ ኩንዳና።
3 ሞርክያ ቶራይ ታና ዶድንቶካ
ታ ዎዛናይ ያየና።
ኦላይ ታ ቦላ ዶድንቶካ፥
ታን መꬍና ጎዳን አማነታይ።
4 ታን መꬍና ጎዳ እትባ ኦቻድ፤
ታን ሄዋ ኮያድ፤
ሄዌነ፥ ታን ታ ደኡዋ ላይꬃ ኡባን፥
መꬍና ጎዳ ጎልያን ደአናዋ፤
ቃይካ ታን መꬍና ጎዳ ሎኦተꬃ በአናዋነ
አ ጎልያን አ ኮያናዋ።
5 ሄዋ ድራዉ፥ መቱዋ ጋላሳን
እ ታና ባረ ደእያ ሳን ገንꬃና፤
ባረ ዱንካንያን እ ታና ቆስ አሻና።
እ ታና ꬎቃ ሹቻ ቦላን ኤሳና።
6 ሄ ዎደ ታን ታና ዶዴዳ ታ ሞርከቱዋፐ፥
ግታታደ ꬎቁ ꬎቁ ያጋና።
ታን አ ዱንካንያን ናሸታደ ያርሹዋ ያርሻና።
ታን መꬍና ጎዳዉ ዲጻናነ የጻና።
7 አቤት መꬍና ጎዳዉ፥ ታን ኔና ጼስያ ዎደ፥
ኔን ታዉ ኮያ፤
ታዉ ቃረታ፤ ታና ስሳ።
8 ኔን፥ “ታ ስንꬃ ኮይተ” ጌዳ ዎደ፥
ታ ዎዛናይ፥ “አቤት መꬍና ጎዳዉ፥ ኤኖ፤
ታን ነ ስንꬃ ኮያና” ያጌዳ።
9 ነ ስንꬃ ታፐ ገንꬆፓ።
ታና ማዴዳዎ፥ ታና ነ ቆማ
ሀንቀታደ ጉየ ዛሮፓ።
አቤት ታና አሽያ ጾሳዉ፥
ታና ኦሎፓነ አጎፓ።
10 ታ አዉነ ታ አታ ታና አግንቶነ
መꬍና ጎዳይ ታና ሺሽ አካና።
11 አቤት መꬍና ጎዳዉ፥ ነ ኦግያ ታና ታማርሳ፤
ታ ሞርከቱዋ ድራዉ፥ ታና ሱረ ኦግያ ካለꬃ።
12 ታና ናስያ ዎርዶ ማርካቱ ታ ቦላ ኢታተꬃን ደንዴዳ ድራዉ፥
ታና ታ ሞርከቱዋ አሞ አꬃደ እሞፓ።
13 መꬍና ጎዳ ኬካተꬃ ታን ፓጻ ደኣደ በአናዋ አማናይ።
14 መꬍና ጎዳን ሂዶታ ዎꬃ፤
ምናደነ ዎዛናማደ፥ መꬍና ጎዳን ሂዶታ ዎꬃ።