148
መታይ ኡባይ ጾሳ ጋላቶ
1 መꬍና ጎዳ ጋላትተ!
ሳሎቱዋን ደእያዋንቶ፥ መꬍና ጎዳ ጋላትተ፤
ቦላ ꬎቃን ደእያዋንቶ፥ አ ጋላትተ።
2 ህንተኖ፥ አ ኪታንቻቶ፥
ኡባቱ አ ጋላትተ።
ሳሉዋን ደእያ አ ኦላንቻቶ፥
ኡባቱ አ ጋላትተ።
3 አዋዉ፥ አግናዉ፥ አ ጋላትተ፤
ፖእያ ጾልንተቶ፥ ኡባቶ አ ጋላትተ።
4 ህንተኖ፥ ኡባፐ ቦላ ꬎቃን ደእያ ሳሎቶ፥
አ ጋላትተ።
ሳሉዋፐ ቦላና ደእያ ሃꬃቶ፥
አ ጋላትተ።
5 ኡንቱንቱ ኡባቱ መꬍና ጎዳ ሱንꬃ ጋላትኖ፤
አያዉ ጎፐ፥ እ አዛዝና፥
ኡንቱንቱ ኡባይካ መቴድኖ።
6 እ ኡንቱንታ መꬍ መꬍናዉ
ኡንቱንቱ ሳኣን ሳኣን ዎꬄዳ።
ኡንቱንቱ ኡባካ እጻናዉ ዳንዳየና አዛዙዋ እ ኡንቱንቶ እሜዳ።
7 ሳኣን ደእያዋንቶ፥ መꬍና ጎዳ ጋላትተ!
አባን ደእያ መታቶ፥ ዎልቃማ አባ ጪማቶ፥
ኡባቱካ አ ጋላትተ።
8 ህንተኖ፥ ዋልቃንꬃዉ፥
ሻቻዉ፥ ሻርያዉ፥ ጫጋናዉ፥
አ አዛዙዋ ፖልያ ጎትያዉ፥
ኡባቱካ አ ጋላትተ።
9 ህንተኖ፥ ደረቶ፥ ዞዘቶ፥
ምያ አይፍያ አይፍያ ምꬃቶ፥ ዝጋቶ፥
ኡባቱካ አ ጋላትተ።
10 መሄቶ፥ ዶአቶ፥
ሳኣና ጎሸትያ መታቶ፥
ፓልያ ካፎቶ፥
ኡባቱካ አ ጋላትተ።
11 ሳኣ ካተቶ፥ ካዉተꬃ አሳቶ፥
ካፓቶ፥ አሳ ሞድያዋንቶ፥
ኡባቱካ አ ጋላትተ።
12 ዎዳላቶ፥ ዎዶራቶ፥
ጭማቶ፥ ናናቶ፥
ኡባቱካ አ ጋላትተ!
13 ኡንቱንቱ ኡባቱ መꬍና ጎዳ ሱንꬃ ጋላትኖ፤
አያዉ ጎፐ፥ አ ሱንꬃይ ኡባፐ ቦላና ደእያዋ፤
አ ቦንቹ ሳሎቱዋፐካ ሳኣፐካ ቦላና ꬎቃን ደኤ።
14 አ ባጋ ግድያ፥ አዉ ማታትያ እስራኤልያ አሳቱ፥
አ ጋላታና ማላ፥ እ ኡንቱንታ ምንሴ።
መꬍና ጎዳ ጋላትተ!