144
ጾኑዋ ማዝሙርያ
ዳውት ጻፌዳዋ
1 መꬍና ጎዳይ፥ ታ ዛላይ ጋላተቶ! እ ታ ኩሽያ ኦላዉ፥
ታ ብራቱዋካ ቶራዉ ሎህሴ።
2 እ ታና ሲቅያ ጾሳነ ታ ጌሱዋ፤
እ ታ ሚጻነ ታና አሽያዋ።
እ ታ ጎንዳልያነ ታን ባቃታደ አትያ ሳኣ።
ካዉተꬃቱዋ እ ታዉ ሞድስያዋ።
3 አቤት መꬍና ጎዳዉ፥
ኔን አዉ ቆፕያ አሳይ እ አዬ?
ኔን ናገትያ አሳ ናአይ አዬ?
4 አሳይ እት ገደ ጫርክያ ጫርኩዋ ማላ፤
አ ጋላሳቱካ አꬍያ ኩዋ ማላ።
5 አቤት መꬍና ጎዳዉ፥ ነ ሳሉዋ ዳካደ ዱገ ዎꬋ!
ዎጋ ደረቱዋ ቦቻ፤ ኡንቱንቱካ ጩዋትኖ!
6 ዋልቃንꬃ የዳደ ነ ሞርከቱዋ ላላ!
ነ ዎንዳፍያ ፖꬃ የዳደ ኡንቱንታ የደርሳ!
7 ቦላና ነ ኩሽያ ዱገ የዳደ፥
ታና ጪሞ ሃꬃቱዋፐ ጎቻደ ከሳ፤
አላጋ አሳቱዋ ኩሽያፐ ታና ዎꬃ አካ።
8 ኡንቱንቱ ቱሙዋ ሃሳይክኖ፥
ጫቂደካ ዎርዱዋ ሃሳዪኖ።
9 አቤት ጾሳዉ፥ ታን
ነዉ ኦራꬃ የꬃ የጻና፤
ታሙ ባቀꬃን ዋጸቴዳ ዲꬃን ነዉ ዲጻና።
10 ካተቶ ጾኑዋ እማሳ፤
ነ ቆማ ዳዊታ አሻሳ።
11 ታና ኢታ ማሻፐ አሻሳ፤
አላጋ አሳቱዋ ኩሽያፐ ታና ዎꬃ አካ።
ኡንቱንቱ ቱሙዋ ሃሳያና ጊደ ጫቂደካ፥
ዎርዱዋ ሃሳዪኖ።
12 ኑ አቱማ ናናቱ፥
ባረንቱ ያላጋተꬃን ዶልቂዶልቂደ፥
ድጭያ ምꬃ ማላ ግድኖ።
ኑ ማጫ ናናቱካ ካትያ ጎልያ ዞዝያን፥
አሌቆ ኤሴዳ ቱቅያ ማላ ግድኖ።
13 ኑ ድየቱ፥
ዳሮ ዱማ ዱማ ቆሞ ካꬃን ኩምኖ፤
ኑ ደምባቱዋን ደእያ ዶርሳቱ ሻኣ፥
ታሙ ሻኣ የልኖ።
14 ኑ ሚዛቱ ብራስኖ፤
ኡንቱንቱ ሳልኤሰናን የለቲደ ጮራትኖ።
ኑ ኦገቱዋን ዳጋማ ዋሱ ስሰቶፖ።
15 ሀ የዉ ቱሙ ሀንያ አሳቱ፥
አንጀቴዳዋንታ።
ኡንቱንቱ ጾሳይ መꬍና ጎዳ ግድያ አሳቱ
አንጀቴዳዋንታ።