ጌሻ ማጻፋ ማዝሙርያ 142

142

ጾሳ ማዱዋ ደማናዉ ሺቄዳ ዎሳ

አኬካን ጻፈቴዳ ዳዊታ ግንጹዋ፥ ጎንጎሎ ግዶን ደእያ ዎደ አ ዎሳ

1 ታ ቃላ ꬎቁ ኦꬃደ፥ መꬍና ጎዳዉ ዋሳይ።

ታ ቃላ ꬎቁ ኦꬃደ፥

መꬍና ጎዳዉ ዋትዋታይ።

2 ታ ቆሁዋ ኡባ አዉ ማጋናይ፤

ታ መቱዋ ኡባ አዉ ኦዳይ።

3 ታን ህዶታ ቃንጻና ማቲያ ዎደ፥ ኔን ታ ኦግያ ኤራሳ።

ታን ሀመትያ ኦግያን ታዉ ግትያ ቆስ ዎꬄድኖ።

4 ታን ታ ዩሹዋ ጼልያ ዎደ፥

ታና ማድያዌ እቱነ ባዋ፤

ታን ቆሰታ አትያ ሳአይ ባዋ፤

ታና ናግያዌካ ባዋ።

5 አቤት መꬍና ጎዳዉ፥ ታን፥

ነዉ ሀዋዳን ጋደ ዋሳይ፤

“ኔን ታን ባቃታደ አትያ ሳኣ፤

ታን ፓጻ ደእሽን፥ ታና ጋኬዳ ሳማይ ኔና” ያጋይ።

6 ታን ሎይꬃ መቶትያ ድራዉ፥

ታ ዋሱዋ ሀይዛ።

ታና የደርስያዋንቱ፥

ታዉ ሎይꬅ ዎልቃሜዳ ድራዉ፥

ታና ኡንቱንቱፐ አሻ።

7 ታን ነ ሱንꬃ ጋላታና ማላ፥

ታና ቃሹዋፐ ብላ።

ኔን ታዉ ኬክያ ድራዉ፥

ጽሎቱ ታ ዩሹዋን ሺቃና።