14
ጾሳይ ባይና አሳቱዋ
ዛማረቱዋ ካፖ የጸቴዳ፥ ዳዊታ ማዝሙርያ።
1 ኤያቱ ባረንቱ ዎዛናን፥ “ጾሳይ ባዋ” ያጊኖ።
ኡንቱንቱ ደኡ ባዬዳ።
ኡንቱንቱ ሸነይያዋ ኦꬂኖ፤
ሎእያዋ ኦꬅያ አሳይ ባዋ።
2 ጾሳ ኮይያ ኤራንቻቱ ደእንቶነ
በአናዉ፥ መꬍና ጎዳይ ሳሉዋፐ ዱገ አሳ ጼሌ።
3 ሽን ኡባይካ ዎራ ስሜድኖ፤
ኡባይካ ኡባና ጎኤናባ ግዴድኖ።
ሎእያዋ ኦꬅያ ኦንነ ባዋ፤
ሀራይ አቶ እቱነ ባዋ።
4 መꬍና ጎዳይ፥ “ሀዋንቱ ታ አሳ፥
አሳይ ቁማ ምያዋዳን ቦንቂ ሚኖ።
ኢታ አሳቱ ቱሙ አያነ አኬክክኖ?
ኡንቱንቱ ታና ዎስክኖ” ያጌዳ።
5 ሽን ጾሳይ ጽሎ አሳቱዋና ደእያ ድራዉ፥
ኢታቱ ሄዋን ዳጋማና።
6 ኡንቱንቱ ህዬሳቱዋ ቆፋ ሀልሲኖ፤
ሽን መꬍና ጎዳይ ህዬሳቱ ባቃቲደ፥ ቆሰት አትያ ሳኣ።
7 እስራኤልያዉ አቶተꬃይ ጽዮነፐ ዬረኔ!
መꬍና ጎዳይ ኡንቱንቱ ደኡዋ ዛርያ ዎደ፥
ያቆባ ዘረꬃይ ናሸታና፤
እስራኤልያ አሳይ ናሸቻ ፖጩ ጋና።