109
ሞርክያ ቦላ ሺቆ ዎሳ
ዛማረቱዋ ካፖ የጸቴዳ፥ ዳውት ጻፌዳ ማዛሙርያ
1 አቤት ታን ጋላትያ ጾሳዉ፥
ኔን ታዉ ጮኡ ጎፓ።
2 አያዉ ጎፐ፥ ኢታ ዎርዳንቻ አሳቱ፥
ባረንቱ ዶና ታ ቦላ ዶዬድኖ፤
ኡንቱንቱ ዎርዶ እንጻርሳን ታ ቦላ ሃሳዪኖ።
3 ኡንቱንቱ እጾ ቃላና ታና ዶዲኖ፤
ጋሱ ባይናን ታናና ኦለቲኖ።
4 ታን ኡንቱንታ ሲቃይነ ኡንቱንቶ ዎሳይ፤
ግዶፐካ፥ ኡንቱንቱ ታና ሞቲኖ።
5 ታን ሎኡዋ ኦꬅና፥
ኡንቱንቱ ታዉ ኢታ ዛሪኖ፤
ታን ኡንቱንታ ሲቅና፥ ኡንቱንቱ ታና እጺኖ።
6 ታ ሞርክያ ቦላ ኢታ ዳና ሱንꬃ፤
ሞታንቻይ አ ኡሸቻን ኤቆ።
7 አ ብድያ ዎደ፥ እ ባይዛንቻ ግዲደ ቤቶ፤
አ ዎሳይካ አዉ ስሚደ ጎመቶ!
8 አ ላይꬃይ ቃሞ፤
አ ሱንꬃተꬃካ ሀራይ አኮ!
9 አ ናናቱ አዉዋ ꬋዪደ ዪእኖ፤
አ ማቻታ አምኤ ግዱ!
10 አ ናናቱ ዩይ ዩዪደ ዎስኖ፤
ባረንቱ ደእያ ኦናፐካ የደርሰትኖ!
11 አ ማጹዋ ኡባ አጮ ኦይቆ፤
እ ዳቡሪደ ከሴዳባ ኡባ አላጋይ ቦንቆ!
12 ኦንነ አዉ ኬካባ ኦꬆፖ፥
ዎይ አዉዋ ꬋዬዳ አ ናናቶ ቃረቶፖ!
13 አ ናናቱ ኡባይ ዉር ꬋይኖ፤
ካልያ የለታን አ ሱንꬃይ ዶገቶ።
14 አ አዎቱዋ ናጋራይ መꬍና ጎዳ ስንꬃን ቆፈቶ፤
አ አት ናጋራይ ኡባካ ቁጨቶፖ!
15 ሄ ናጋራይ ኡባ ገደ መꬍና ጎዳ ስንꬃን ቤቶ፤
ኡንቱንታ ሀሳይስያዌ ሳኣፐ ꬎቆለት ክቾ!
16 አያዉ ጎፐ፥ እ
ኬካባ ኦꬃናዉ ኡባካ ቆፕቤና፤
ህዬሳቱዋ፥ መቶታንቻቱዋነ
ዎዛናይ ማዱጼዳዋንታ የደርሲደ ዎꬌዳ።
17 እ ሸቃናዉ ዶሴዳ ድራዉ፥
እካ ሸቀቴዳዋ ግዶ!
እ አንጃናዉ ዶሰና ድራዉ፥
አንጁ አፐ ሃኮ!
18 እ ሸቂደ ሳለና፤
አ ሸቃይ ሃꬃዳን አ ቦላ ካꬆ!
ዛይትያዳን አ መቀꬃን ገሎ!
19 አፍላዳን አ ካሞ፤
ሳቂያዳን ኡባ ገደ አ ጼሳን ደኦ!
20 ሀዌ ታና ሞትያዋንቶነ
ታና ኢታን ዝግርያዋንቶ፥
መꬍና ጎዳይ እምያ ዎይቱዋ ግዶ!
21 ሽን አቤት ኡባ ሞድያ መꬍና ጎዳዉ፥
ነ ሱንꬃ ድራዉ፥ ታና ማዳ።
አገና ነ ሲቁዋነ
ነ ኬካተꬃ ድራዉ፥ ታና አሻ።
22 አያዉ ጎፐ፥ ታን
ህዬሳነ መቶታንቻ አሳ፤
ታ ዎዛናይካ ማዱንጼዳ።
23 ታን ኦማርሳ ኩዋዳን ꬋያና ሀናይ፤
ታን ቦልያዳን ቆቆፈታይ።
24 ጾምሽን ታ ጉልባታይ እጼዳ፤
ታ ቦላይካ ላፌ።
25 ታና ሞትያዋንቶ ቅሊጭያዋ ግዳድ፤
ኡንቱንቱ ታና በኢደ፥ ባረንቱ ሁጲያ ቃꬂኖ።
26 አቤት መꬍና ጎዳዉ ታ ጾሳዉ፥ ታና ማዳ፤
አገና ነ ሲቁዋዳን ታና አሻ።
27 አቤት መꬍና ጎዳዉ፥ ሄዌ
ነ ኩሽያ ግዴዳዋነ
ሄዋ ኔን ኦꬄዳዋ ታ ሞርከቱ ኤርኖ።
28 ኡንቱንቱ ታና ሸቆፐነ፥
ኔን ታና አንጃ!
ታ ቦላ ደንድያዋንቱ ዬላትኖ፤
ሽን ታና ነ ቆማ ናሸቻ።
29 ታና ሞትያዋንቱ ካዉሻ ማይኖ፤
ባረንቱ ዬላካ ኩታዳን ቁማይኖ።
30 ታን ታ እንጻርሳን መꬍና ጎዳ ዳሮፐ ጋላታና፤
ዳሮ አሳይ ሺቄዳሳን አ ጋላታና።
31 አያዉ ጎፐ፥ እ ህዬሳ ድራዉ ሞተቴ፤
ሀይቆ ፕርድያ አሳፐካ አ አሼ።