102
መቱዋ ቦላ ደእያ አሳ ዎሳ
መꬍና ጎዳ ስንꬃን ባረና ዶጊደ ባረ ካዩዋ ጉስያ ዎደ፥ ቱጋቴዳ አሳይ ዎሴዳ ዎሳ.
1 አቤት መꬍና ጎዳዉ፥ ታ ዎሳ ስሳ፤
ታ ዋሱ ኔኮ ጋኮ።
2 ታ ዋይያ ጋላስ፥
ነ ሶምኡዋ ታፐ ገንꬆፓ።
ነ ሀይꬃ ታኮ የጋ፤
ታን ነዉ ዋስያ ዎደ፥ ታና ኤለካ አላ።
3 አያዉ ጎፐ፥ ታ ላይꬃይ ጩዋዳን ꬋዬ፤
ታ መቀꬃይካ ታማ ቦንቁዋዳን ኤጼ።
4 ታ ዎዛናይ ሾጭ የጌዳ መላ ማታዳን ሀናድ፤
ቁማይካ ታዉ ሜተተና።
5 ታን ታ ቃላ ꬎቁ ኦꬃደ ኦላይ፤
ታ ጋልባይ መቀꬃና ኦይቀቴዳ።
6 ታን ባዙዋን ደእያ አንኩዋ ማላ፥
ዎይ ኮለቴዳ ጎልያን ደእያ ጉቱዋ ማላ።
7 ታን ግስና፥ ገምእሹ ዬና፤
ታን ጎልያ ሁጲያን ባረካ ኡቴዳ ካፉዋ ማላ።
8 ታ ሞርከቱ ጋላሳ ኡባን ታና ጫሺኖ፤
ታና ቅሊጭያዋንቱ ታ ሱንꬃን ሸቂኖ።
9 ታን ብድንꬃ ቁማዳን ማይ፤
ቃይ ታ አፎꬃ ታ ኡሻና ዋላካይ።
10 ኔን ታና ፑደ ደንꬃደ፥
ነ ሀንቁዋ ድራዉ ዎራ ኦላዳ።
11 ታ ደኡዋ ላይꬃይ ኦማርሳ ኩዋ ማላ፤
ታን ማታዳን ሹላይ።
12 ሽን አቤት መꬍና ጎዳዉ፥
ኔን ካዉተꬃ አራታን መꬍናዉ ኡታዳ፤
ነ ሱንꬃይካ የለታፐ የለታ ጋካናዉ ሀሳየታና።
13 ኔን ደንዳደ፥ ጽዮነዉ ቃረታ፤
አያዉ ጎፐ፥ ኔን እዞ ማርያ ዎዲ ጋኬዳ፤
ሀዌ ኔን ዶሬዳ ዎድያ።
14 እዛ ኮለቴዳዋ ግዶፐካ፥
ነ ቆማቱ እዞ ሲቂኖ።
እዛ ባዬዳዋ ግዶፐካ፥
ኡንቱንቱ እዝዉ ቃረቲኖ።
15 ካዉተꬃቱ መꬍና ጎዳ ሱንꬃዉ ያያና፤
ሳኣ ካተቱ ኡባይ አ አንጋዉ ዳጋማና።
16 አያዉ ጎፐ፥ መꬍና ጎዳይ ጽዮነ ዛረꬅ ኬጺደ፥
እ ባረ ግታተꬃ በሳና።
17 እ ፑቴሳቱዋ ዎሳ ስሳና፤
ኡንቱንቱ ዋሱዋ ካና።
18 ብሮ የለታና አሳቱ መꬍና ጎዳ ጋላታና ማላ፥
ሀዌ ይያ የለታዉ ጻፈቶ።
19 መꬍና ጎዳይ ꬎቃን ደእያ ባረ ጌሻ ሳኣፐ ዱገ ጼሌዳ፤
እ ሳሉዋፐ ዱገ ሳኣ ጾሞሴዳ።
20 ሄዌነ፥ ቃሸቴዳ አሳቱዋ ኦልያ ስሳናሳነ
ሀይቆ ፕርደቴዳ አሳቱዋ ብላናሳ።
21 ሄዋ ድራዉ፥ መꬍና ጎዳ ሱንꬃይ ጽዮነን ኦደታናነ
አ ጋላታይ የሩሳላመን አዋየታና።
22 አሳይነ ካዉተꬃይ እትፐ ሺቂደ፥
መꬍና ጎዳዉ ሄ ዎደ ጎይናና።
23 እ ታን ያላጋተꬃን ደኢና፥
ታ ዎልቃ ዉርሴዳ፤
ታ ላይꬃ ቃንꬃዬዳ።
24 ያትና፥ ታን፥ “አቤት ታ ጾሳዉ፥
ታ ላይꬃይ ብሮ ግዶትያ ዎደ፥
ታና አፎፓ” ያጋይ።
አቤት ጾሳዉ፥ ኔን የለታፐ የለታ ጋካናዉ ደኣሳ።
25 ኔን በን ሳኣ መꬋዳ፤
ሳሉካ ነ ኩሽያ ኦሱዋ።
26 ሄዋንቱ ኡባይ ꬋያና፤ ሽን ኔን ደአና፤
ኡንቱንቱ ኡባይካ አፍላዳን ዉራና።
ኔን ኡንቱንታ ጩርቃ አፍላዳን ላማና፤
ኡንቱንቱካ አꬋና።
27 ሽን ኔን ኔናካ፤ ነ ላይꬃይ ኡባ ዉረና።
28 ኑን ነ ቆማቱዋ፤
ኑ ናናቱ ሳሮተꬃን ደአና።
ኡንቱንቱ ዘረꬃይካ ነ ስንꬃን ምኒደ ኤቃና።