3
ጾሳይ ኢታ ካለꬅያዋንታነ ዎርዶ ናባቱዋ ሙራና
(3:1-12)
1 ታን ሀዋዳን ያጋድ፤ “ህንተኖ፥ ያቆባ ዛራቱዋ ካፓቶነ እስራኤልያ አሳ ካለꬅያዋንቶ፥ ስስተ! ህንተ ሱረ ፕርዳ ኤራናዉ ህንተንቶ በሰኔየ?
2 ህንተ ሎኡዋ እጺደ፥ ኢታ ዶሲታ። ታ አሳፐ ኡንቱንቱ ጋልባ ቃሪታ፤ ኡንቱንቱ አሹዋካ ኡንቱንቱ መቀꬃፐ ሻኪታ።
3 ህንተ ታ አሳ አሹዋ ሚታ፤ ኡንቱንቱ ጋልባካ ኡንቱንቱፐ ቃሪታ፤ ኡንቱንቱ መቀꬃ መንሬꬂደ፥ ኡንቱንቱ አሹዋካ ጻሩዋን የጋናዉ ሙጽያዋዳን ሙጸረቲታ” ያጋድ።
4 ሄ ዎደ ኡንቱንቱ መꬍና ጎዳኮ ዋሳና፥ ሽን እ ኡንቱንቶ ዛረና፤ እ ባረ ዴሙዋ ሄ ዎደ ኡንቱንቱፐ ቆሳና፤ አያዉ ጎፐ፥ ኡንቱንቱ ኢታ ኦሱዋ ኦꬄድኖ።
5 ባረ አሳ ዎራ ካለꬅያ ትምቢትያ ኦድያዋንቱባ መꬍና ጎዳይ ሀዋዳን ያጌ፤ “ህንተዉ ምያዋ እምያ ዎደ፥ ‘ነዉ ሳአይ ሳራ’ ያጊታ፤ ሽን ህንተና ቁማ ምዘናዋ ቦላ ኦላ አዋዪታ።
6 ሄዋ ድራዉ፥ ህንተንቶ ጋላሳይ ቃማ ግዳናፐ አትና፥ ሳፃ በእክታ፤ ሳአይካ ꬉማናፐ አትና፥ ላኤንꬆ ሙሩንክታ። ትምቢትያ ኦድያዋንቶ አዋይ ዉልና፥ ጋላሳይ ꬉማና።
7 ሳፃ በእያዋንቱ ዬላታና፤ ሙሩንያዋንቱካ ካዉሻና። ጾሳ ማታፐ ኡንቱንቶ ዛሩ ባይና ድራዉ፥ ኡንቱንቱ ዬላቲደ፥ ኡባይካ ባረንቱ ዶና ኦይቃና” ያጌ።
8 ሽን ታና ግዶፐ፥ ታን ያቆባ ዛረቶ ኡንቱንታ ባይዙዋ፥ እስራኤልያ አሳስካ ኡንቱንቱ ናጋራ ኦዳና ማላ፥ ዎልቃን፥ መꬍና ጎዳ አያናን፥ ሱረ ፕርዳንነ ምኖተꬃን ኩማድ።
9 ህንተኖ፥ ሱረ ፕርዳ እጽያነ ስታ የዉዋካ ዶቂያዋንቶ ያቆባ ዛራቱዋ ካፓቶነ እስራኤልያ አሳ ሞድያዋንቶ፥ ሀዋ ስስተ።
10 ህንተ ጽዮነ ካታማ ሱꬃ ጉሲደ ኬጺታ፤ የሩሳላመ ካታማካ ማካላን ኬጺታ።
11 አ ካፓቱ ማታይያን ፕርዲኖ፤ አ ቄሳቱ ድርጉዋን ታማርሲኖ፤ ቃይ አ ትምቢትያ ኦድያዋንቱካ ሚሻ ቃንጽና ሙሩኒኖ። ሽን ያቲደካ፥ “መꬍና ጎዳይ ኑ ግዶን ደኤ ግደኔ? ኑ ቦላ አያ ኢታባይካ ዬና” ያጊደ መꬍና ጎዳን አማነቲኖ።
12 ሄዋ ድራዉ፥ ህንተ ጋሱዋን ጽዮነ ደርያ ሾይቃዳን ጎሸታና፤ የሩሳላመ ካታማይካ ኮለቲደ እትሳን ዶረቴዳ ሱፓ ሹቻ ግዳናዋ። ጌሻ ጎልያ ኬጸቴዳ ሳአይካ ዎራ ግዳናዋ።