14
ዮርዳኖሳፐ ዉላሃ ባጋና ደእያ ቢታ
(14:1—19:51)
1 ቄስያ ኤልኣዛረ፥ ነዌ ናአይ ኢያሱነ እስራኤልያ ዛራቱዋ ካፓቱ፥ ካናነ ጋድያ ኡንቱንታ ያራን ያራን ሻክና፥ ኡንቱንቱ ጋኬዳ ሄራቱ ሀዋፐ ካሊደ ጻፈቴዳዋንታ።
2 መꬍና ጎዳይ ሙሴ ባጋና አዛዜዳዋዳን፥ ኡንቱንቱ ላታ ጋዲ ኡዱፑናነ ባጋ ግድያ ዛረቶ ሳማን ሻከቴዳ።
3 አያዉ ጎፐ፥ ሙሴ ላአነ ባጋ ግድያ ዛረቶ ዮርዳኖሳ ሻፋፐ ሄፍንꬃ አዋይ ዶልያ ባጋና ካሰ ጋድያ እም ዎꬄዳ፤ ሽን ሌዊያ ዛረቶ ኡንቱንቱ ግዱዋን ላታ ጋድያ እምቤና።
4 ዮሴፎ ናናይ ምናሳነ ኤፍሬማ ጌተቲደ ላኡ ዛረ ግዴድኖ። ሙሴ ሌዊያ ዛረቶ ላታ ጋድያ እምቤና፤ ሽን ሄዋ ግሻዉ ኡንቱንቶ ደእያ ካታማቱዋነ ኡንቱንቱ ባረንቱ መህያ ዉድያነ ዶርሳ ዉድያ ሄምያ ሄንꬃ ጋደቱዋ እሜዳ።
5 መꬍና ጎዳይ ሙሳ አዛዜዳዋዳን፥ እስራኤልያ አሳይ ጋድያ ሻክ አኬዳ።
ከብሮነ ካሌባዉ እመቴዳ
6 እት ጋላስ ይሁዳ አሳይ ኢያሱኮ ገልጋል ሺቄድኖ። ኡንቱንቱፐ እቱ፥ ቀኒዝያ ይፉነ ናአይ ካሌብ ኢያሳ ሀዋዳን ያጌዳ፤ “ኑን ቃዴሳ-ባርነን ደእያ ዎደ፥ መꬍና ጎዳይ፥ ጾሳ አሳ ግድያ ሙሴዉ ነባነ ታባ ኦዴዳዋ ኤራሳ።
7 መꬍና ጎዳ ቆማይ ሙሴ ጋድያ ዎቻደ ያናዳን፥ ቃዴሳ-ባርነፐ ታና ኪትያ ዎደ፥ ታዉ ላይꬃይ ኦይታማ። ሄ ዎደ ታን አዉ አማነትያ ኦዱዋ አሃደ ኦዳድ።
8 ታን መꬍና ጎዳ ታ ጾሳ ፖሎ ካላድ፤ ሽን ታናና ቤዳ አሳቱ አሳ ዎዛና ያሻን ኮልድሴድኖ።
9 ሄ ጋላስ ሙሴ፥ ‘ኔን መꬍና ጎዳ ታ ጾሳ ፖሎ ካሌዳ ድራዉ፥ ነ ገዲ የꬌዳ ቢታይ መꬍናዉ ነዉነ ነ ዛርያዉ ላትያ ጋድያ ግዳናዋ’ ጊደ ጫቄዳ።
10 “አነ አኬካ፤ መꬍና ጎዳይ ሀ የዉዋ ሙሴዉ ሃሳዮደፐ፥ ኦይታማነ እቼሹ ላይꬃ ግዴዳ። ሄ ዎደፐ እስራኤልያ አሳይ ዎራን ስመረትሽን፥ ሀቼ ጋካናዉ ጾሳይ ታና ፓጻ ዎꬄዳ። በአ፥ ሀእ ታ ላይꬃይ ሆስፑን ታማነ እቼሻ ግዴዳ።
11 ግድናካ ሀእ ታዉ ደእያ ምኖተꬃይ በን ሙሴ ታና ኪትያ ዎደ ደእያ ምኖተꬃካ ማላ። ታን ሀእካ ኦለታናዉነ አያ ግዶፐነ ኦꬃናዉ በን ሄ ዎደዋዳን ዎልቃማ።
12 ሄዋ ድራዉ፥ መꬍና ጎዳይ ታዉ እማና ጌዳ ሀ ገዘ ጋድያ ሀእ ታዉ እማ። ሄ ዎደ፥ አናቀቱ ሄ ጋድያን ደእያዋነ ኡንቱንቱ ካታማቱካ ግታነ ግምበቴዳዋንታ ግድያዋ ኑን ሃሳይሽን ኔን ነ ሁጲያዉ ስሳዳ። ሽን መꬍና ጎዳይ ታናና ግዶፐ፥ እ ጌዳዋዳን፥ ታን ኡንቱንታ ሄ ጋድያፐ የደርሳና” ያጌዳ።
13 ሄዋፐ ጉየ ኢያሱ ይፉነ ናኣ ካሌባ አንጂደ፥ ከብሮና አዉ ላታ ኦꬂደ እሜዳ።
14 መꬍና ጎዳ እስራኤልያ ጾሳ ፖሎ ካሌዳ ድራዉ፥ ከብሮና ጋዲ ሄ ዎድያፐ ሀቼ ጋካናዉ፥ ቀኒዝያ ይፉነ ናኣ ካሌባዉ ላታ ቢታ ግዴዳ።
15 ካሰ ከብሮና ሱንꬃይ ቅርያት-አርባአ ጌተቴ፤ አርባአ ግያ ብታኒ አናቀቱዋ ኡባፐ አꬌዳ አሳ።
ሄዋፐ ጉይያን፥ ሄ ጋዲ ኦላፐ ሸምፔዳ።