7
1 “አሳ ደኡ ሳኣ ቦላን ዎልቃማ ባጸ ግደኔየ? አ ደኡዋ ላይꬃይ ከራ ኦꬅያ አሳ ደኡዋ ላይꬃ ማላ ግደኔየ?
2 ኩዋ አሞትያ ቆማዳን፥ ዎይ ባረ ድርጉዋ አካናዉ ናግያ ኦሳንቻዳን፥
3 ሄዋዳን ታዉ መላ አግናቱነ ቱጋ ቃማቱ እመቴድኖ።
4 ታን ግስያ ዎደ፥ ‘አዉደ ቤጎታንድታሻ?’ ያጋይ። ሽን ቃማይ ታዉ አዱቄ፤ ሳአይ ዎንታና ጋካናዉ ሂጻን አꬋ አꬋ ዎꬋይ።
5 ታ ቦላይ ጉጹንያነ ፖቁዋ ማዬዳ፤ ታ ማዱꬃፐ ጊሻይ ጎጌ።
6 ታ ላይꬃይ ሸማይንያ ሙኩካፐካ አꬍ ኤሌሌ፤ አይ ህዶታይነ ባይናን ታ ላይꬃይ ዉሬ።
7 “አቤት ጾሳዉ፥ ታ ላይꬃይ ሲꬍያና ሸምፕያ እት ሸምፑዋ ማላ ግድያዋ ሀሳያ! ታ አይፊ ላኤንꬆ ኬካባ በኤናን አቴዳ።
8 ኔን ታና ሀእ በኣሳ፤ ሽን ላኤንꬆ በአካ፤ ኔን ታና ኮዮፐ፥ ታን ꬋያድ።
9 “ሻሪ ፕስክ ጊደ ꬋይያዋዳን፥ ዱፉዋ ዎꬌዳ ኡራይ ስሚደ ከሰና።
10 ባረ ጎለካ ላኤንꬆ ስሚደ ዬና፤ አ ኤርያ አሳይካ አ ዶጌ።
11 “ሄዋ ድራዉ፥ ታን ጮኡ ጊከ፤ ታን ታ ቱጋ ድራዉ ሃሳያና፤ ታ ደኡ ጫሜዳ ድራዉ ዙዙማና።
12 ሀዋ ኬሻ ኔን ታና አያዉ ናጋይ? ታን ነዉ አባ ዎይ አባ ግዶ ሀምባዝያ ጋድየ?
13 ታን፥ ‘ታ ሂጻይ ታና ምንꬃንዴ፤ ታ አልጋይካ ታና ዙዙንꬃፐ ሸምፕሳንዴ!’ ያግያ ዎደ፥
14 ኔን ታና አኩሙዋን ያሽሳሳ፤ ሳጻንካ ታና ዳጋንꬃሳ።
15 ታን ሀ ሳክያ ቦላና ደአናዋፐ ሱለትያዋነ ሀይቂያዋ ዶራይ።
16 ታን ታ ደኡዋ ካꬋድ፤ ታን መꬍናዉ ደአናዉ ኮይከ። ታ ላይꬃይ ሲꬍያና ሸምፕያ እት ሸምፑዋ ማላ ግድያ ድራዉ፥ ኔን ታና አጋ ባሻ።
17 “ኔን አ ዎጋባዳን ጼላናዉ አሳይ አዬ? ኔን አባዉ አያዉ ቦንቾ ሳኣ እማይ?
18 ዎንታ ዎንታ ኔን አ ብዳሳ፤ ቃይ ዎድያን ዎድያን አ ፓጫሳ።
19 ኔን ታኮ ጼልያዋ ሙለካ አግኪ? ዎይ ታን ታ ጩቻ ምትያ ዎድያካ ታዉ እምኪ?
20 አቤት አሳ ዎችያዎ፥ ታን ናጋራ ኦꬄዳዋ ግዶፐ፥ ኔና አያይ ቆሄዴ? ኔን አያዉ ታና ጫድ ካእያዋ ኦꬃዲ? ነዉ ታን ዴጾ ቶኩዋ ግዳድታየ?
21 ታ ባላፐ አያዉ ታና ማረናን እጻይ? ታ ናጋራካ አያዉ አቶ ጌናን አጋይ? ስም ታን ዱፉዋ ዎꬍያ ዎዲ ጋኬዳ፤ ኔን ታና ኮይያ ዎደካ፥ ታን ቤትከ” ያጌዳ።