1 ኢዮብ ሀዋዳን ያጊደ ዛሬዳ፤ 2 “ዎልቃይ ባይና አሳ ኔን አያ ማዱዋ ማዳዲ! ዳቡሬዳ ቀሰቱዋ ኔን አያ አሹዋ አሻዲ! 3 አꬌዳ ኤራተꬃይ ባይናዋ አያ ዞርያ ዞራዲ! አይ ኬሻ ዎልቃማ ኤራተꬃ ቆንጭሳዲ! 4 ኔን ሀ ቃላ ሃሳያናዳን ኔና ኦኔ ማዴዳዌ? ቃይ ሀዋዳን ሃሳያናዉ ኔና ደንꬄዳዌ ኦ አያኔ?” ያጌዳ።

5 ብልዳደ፥ “ሀይቄዳዋንቱ ሞይትለቱ ቢታፐ ጋርሳ ባጋና ሃꬃ ግዶን ኮኮሪኖ። 6 ጾሳ ስንꬃን ስኦሊካ ቆንጨ፤ አያይነ አ ገንꬃናዉ ዳንዳየና። 7 ጾሳይ ሁጲሳ ባጋ ሳሎቱዋ ምጬዳ፤ ሳኣካ አየንቶ ባይና ሳን ካቄዳ። 8 እ ሻረቱዋን ሃꬃ ኩንꬄ፤ ሃꬃ ዴጹዋን ሻረቱ ዳከትክኖ። 9 ዶይሴዳ አግና እ ባረ ሻርያን ካሜ። 10 ፖኡዋ ꬉማፐ ሻካናዉ፥ ሳሉ ሳኣና ዳንትያ ሳኣን ቃማይነ ጋላሳይ ላመትያ ዛዋ ጾሳይ ኤሴ። 11 እ ሴርያ ዎደ፥ ሳሎቱዋ ቱቀቱ ዳጋማዉ ኮኮሪኖ። 12 ባረ ዎልቃን አባ ጮኡ ኦꬄዳ፤ ባረ አኬካን ራኣባ ግያ ዳዊያ ꬋይሴዳ። 13 እ ሸምፕያ ሸምፑዋን ሳሎቱ ጌዬድኖ፤ አ ኩሺካ ጾንገትያ ሾሻ ዎꬌዳ። 14 ሀዋንቱ ኡባይ ጾሳይ ኦꬄዳ ኦሶቱዋፐ አማሬዳዋንታ፤ ኑን ስስያዌ ሳሱከꬃ ጻላላ። ያትና፥ አ ዎልቃ ግታተꬃ አኬካናዉ ዳንዳይያዌ ኦኔ?” ያጌዳ።