1 ኢዮብ ሀዋዳን ያጊደ ዛሬዳ፤ 2 “ታን ሀእካ ጾሳ ቦላ ማካላይነ ዙዙማይ፤ አያዉ ጎፐ፥ ታን ኦልናካ አ ኩሺ ታ ቦላ ዴጽያዋ አግቤና። 3 እ ደኢያሳ ታን ኤራርክታሻ! እ ኡቴዳሳካ ጋካርክታሻ! 4 ያትንቶ፥ ታን ታ ሞቱዋ አ ስንꬃን ብዳና ሽን! ታ ዶናካ ፓሉምያን ኩንꬃና ሽን! 5 እ ታ ሞቶ ዛርያዌ አየንቶካ ታን ኤራና ሽን! እ ታና ግያዋካ አኬካና ሽን! 6 እ ባረ ዎልቃማ ዎልቃን ታናና ኤቀታኔሻ? ቱይት፥ ቱይት፥ እ ታን ኦድያዋ ስሳናፐ አትና፥ ሄዋ ሀነና። 7 ታ ዎዛናይ ሱረ ግድያ ድራዉ፥ ታን ጾሳና ሞተታናዉ ዳንዳያይ፤ እ ታ ዳናይ ታና መꬍናዉ ሻትንꬃና።

8 “ሽን አይሴ፥ ታን አዋይ ዶልያ ባጋ ቦፐ፥ እ ያን ደኤና፤ ቃይ ታን አዋይ ዉልያሳ ቦፐካ፥ አ ደምከ። 9 እ ሁጲሳ ባጋ ቢታን ኦꬅያ ዎደ፥ ታን አ በእከ፤ ቃይ ገድሳ ባጋ ቢታ ስምያ ዎደካ፥ ታን አ ደምከ። 10 ሽን እ ታ ታንጉዋ ኡባ ኤሬ፤ እ ታና ፓጮፐ፥ ታን ዎርቃዳን ጌሻ ግድያዋ እ በአና። 11 ታን እ ሀመቴዳ ኦግያ ጌሻ ኦይቃደ ሀመታድ፤ አ ኦግያፐ ዎራ ስማበይከ። 12 አ ዶናፐ ከስያ አዛዙዋፐ ታን ሻከታበይከ፤ አ ቃላካ ታ ዎዛናን ዎꬃድ።

13 “ጾሳይ ላመተና። አናና ኤቀታና፥ ዎይ ባረ ኮዬዳዋ እ ኦናዳን አ ድጋና አሳይ ባዋ። 14 እ ታዉ ሀልቼዳዋ ፖላና፤ ሄዋንቱ ማላ፥ ሀራ ዳሮ ሀልቾቱካ አዉ ደኢኖ። 15 ሄዋ ድራዉ፥ አ ስንꬃን ኤቂያዌ ሎይꬅ ታና ያሼ፤ ሄዋ ኡባባ ቆፓደ፥ ታን ኮኮራይ። 16 ታ ዎዛናይ ዳቡራናዳን ጾሳይ ኦꬄዳ፤ ኡባ ዳንዳይያ ጾሳይ ታና ዳጋንꬄ። 17 ባራ ꬉማይ ታ ሶምኡዋ ጎዝንቶካ፥ ታና ሄ ꬉማይ ሃሳያ ድግቤና።