1 ናእማ ቢታፐ ዬዳ ጾፋር ሀዋዳን ያጊደ ዛሬዳ፤ 2 “ነ ሃሳያይ ታና ሀንቀꬄዳ ድራዉ፥ ታን አይነ ጋምኤናን ነ ሃሳያዉ ዛሩዋ እማና። 3 ነ ሸቃ ሃሳያ ታን ስሳድ፤ አዉ በስያ ዛሩዋ ታና እማ እማ ጌ።

4 “አሳ ቢታ ቦላ ዎꬄዳ ዎድያፐ ዶሚደ፥ በንፐካ ናጋራንቻ አሳቱዋ ጬቁ ቃንꬃ ዎድያሳ ግድያዋ ኤራሳ፤ 5 ጾሳ ኤረና አሳቱዋ ናሸቻይካ ልጴዳ አይፊ ጼላናሳ ግድያዋ ኔን ኤራሳ፤ 6 ኢታ አሳይ ሻርያ ጋካናዉ አዱቆፐካ፥ አ ሁጲካ ሻርያ ቦቾፐ፥ 7 እ ፓንዳዳን ፕተት ꬋያና። አ ኤርያ ኡባይ፥ ‘እ ሀቃን ደኢ?’ ያጋና። 8 አኩሙዋዳን እ ፓል ꬋያና፤ ስሚደካ ቤተና፤ ቃማ ሳጻዳን እ ꬋይ ባሻና። 9 አ በኤዳ አይፈቱ ላኤንꬂደ፥ አ በእክኖ፤ እ ባረ ደኢያሳፐካ ትፕ ጊደ ꬋያና። 10 ኢታ አዉ ቦንቂ አኬዳ ሚሻ አ ናናቱ ባረንቱ ኩሽያን ጉየ ዛሪደ ህዬሳቶ ጭጋና። 11 ዎልቃን ኩሜዳ አ ያላጋተꬃ ምኖታይ ጉꬃ ዎድያፐ ጉይያን፥ ቢታ ከሳና።

12 “ኢታ አሳ ዶናን ኢታተꬃይ ቁማዳን ማልእንቶካ፥ እ ባረ እንጻርሳፐ ጋርሳ ባጋና ገንꬆፐካ፥ 13 ዉረናዳን ባረ ዶናን ጮሚደ፥ ዎꬅ ባሽንቶካ፥ 14 አ ኡሎ ግዶን አ ቁማይ ላመታና፤ ዎꬍያ ሾሻ ይሻ ማላ አዉ ግዳናዋ። 15 ኢታ ብታኒ ባረ ምቴዳ ዱረተꬃ ሃ ጩቻና፤ አ ኡሉዋፐ ጾሳይ ጮሺደ ከሳና። 16 ኢታ ብታኒ ምትያባይ አዉ ይሻ ግዳናዋ፤ ሾሻ ይሻ ማላ ግዲደ፥ አ ዎꬋና። 17 ኤሳይነ ማꬃይ ሃꬃዳን ጎግሽና፥ እ በኤናን ሀይቃና። 18 ባረ ዳቡሬዳ ዳቡራ ጫዋ ሜናን፥ ሀራዉ ሼꬋና፤ ዛልኢደ ዎꬍሴዳ ባረ ዎꬍያንካ ናሸተና። 19 አያዉ ጎፐ፥ ህዬሳቱዋ እ ኡንኤꬄዳ፤ ኡንቱንታ ሸነኮ ጌዳ፤ ሀራ አሳይ ኬጼዳ ጎልያካ ባረዉ አኬዳ።

20 “አ ዮራዉ ዛዋይ ባዋ፤ ባረ ዶስያዋ ካላናዉ ዳንዳየና፤ 21 እ ሜዳዋፐ ጉይያን፥ አያይነ ደኤና። ሄዋ ድራዉ፥ አ ዱረተꬃይ ጋምኤና። 22 እ ዳሮ ማጹዋ ደምያ ዎደ፥ መቱ አ ቦላ ጋክ ዎꬋና። 23 እ ሚደ ካልያ ዎደ፥ ጾሳይ አ ሙራናዉ ባረ ሱልያ ሀንቁዋ አ ቦላ ጉሳና። 24 ብራታ ማሻፐ እ ባቃታና፤ ሽን ናስያ አዳይ አ ጫዳናዋ። 25 ሄ አዳይ አዉ ዞክያና ካንꬅ ከሳና፤ ሄ ጶልያ ጼራይ አ ትርያ አꬊደ፥ ጭሽያ ጉሳና። ዳጋማን አ ዎዛናይ ሻባረታና።

26 “እ ሺሼዳ አቁዋ ኡባይ ꬋያና፤ አሳይ ኤꬅቤና ታማይ አ ማና፤ አ ጎልያን አቴዳ አሳይ ኡባይካ ታማን ሜተታና። 27 ሳሎቱ ሀ ብታንያ ናጋራ ቆንጭሳና፤ ቢታይካ አ ቦላ ማርካታና። 28 ጾሳይ ሀንቀቲደ አህያ ቤታን አ ጎሊነ አዉ ደእያባይ ኡባይ ሾከቲደ ባና። 29 ጾሳይ ኢታ አሳቶ ዎꬄዳ ካጫይ፤ ጾሳፐ ግሸቴዳ ግሹ ሀዋ” ያጌዳ።