1 “ሀዋ ኡባ ታ አይፊ በኤዳ፤ ታ ሀይꬃይካ ስሲደ አኬኬዳ። 2 ህንተ ኤርያዋ ታንካ ኤራይ፤ ታን ህንተፐ ላፍከ። 3 ሽን ታን ኡባ ዳንዳይያ ጾሳዉ ሃሳያናዉ ኮያይ፤ ህንተናና ግደና። ታን ታ ሞቱዋ አናና ሞተታናዉ አሞታይ። 4 ህንተ ቱሙዋ ዎርዱዋን ካሚታ፤ ህንተ ኡባይካ ፓና አክማቱዋ። 5 ህንተ ኡባይ ጮኡ ጌዳ ግዴርክቴሻ! ያትንቶ፥ ህንተና አሳይ አꬌዳ ኤራንቻ ጋና ሽን!

6 “ሀእ ታ ሞቱዋ ስስተ፤ ታ ዶናፐ ከስያ ፓሉምያ ሀይዝተ። 7 ህንተ ጾሳ ዶና ግዲደ፥ ዎርዱዋ ሃሳዪቴየ? አ ድራዉ ኤቂደ፥ ጭሙዋ ሃሳዪቴየ? 8 ህንተ አ ማድያዌ ደኢ? ዎይ አዉ አባካቶ ግዲደ ሞተቲቴ? 9 እ ህንተና ፕልግ ጼልንቶ፥ ህንተፐ ሎኦባ ደማኔ? ህንተ አሳ ጭምያዋዳን፥ አ ጭማናዉ ዳንዳዪቴየ? 10 ህንተ ጌማን አሳ ሶምኡዋ ጼሊደ ማዶፐ፥ ጾሳይ ቱሙ ህንተና ሴራና። 11 አ ቦንቹ ህንተና ዳጋንኔ? አ አንጋይ ህንተና ያሸኔ? 12 ህንተ ኦድያ ሌምሶቱ ብድንꬃ ማላ ፓናዋንታ፤ ህንተ ሺሽያ ፓሉሚ ኡርቃፐ መቴዳ ጎንዳልያ ማላ።

13 “አነ ጮኡ ጊተ! ሃሳያና፤ ሀዋፐ ጉይያን፥ ባረ ሀኖዋ ሀኖ። 14 ታን ታ ሁጲያ አያዉ ህርጋ ጋርሳን ዎꬃይታ? ታ ሸምፑዋካ አያዉ ታ ኩሽያን ኦይቃይታ? 15 በእተ፥ ጾሳይ ታና ዎꬍያዋ ግዶፐነ፥ ታን አ ዳንዳያን ናጋና። ግዶፐነ፥ ታን ታ ሞቱዋ አ ስንꬃ ሺሻና። 16 ናጋራንቻ አሳይ አ ስንꬃ ሺቃናዉ ዳንዳየና ድራዉ፤ ሀዌ ታን ሺቃናዉ ጻልያዌ፥ ኦን ኤሪ፥ ታ አቶተꬃዉ ጋሶ ግዳናዉ ዳንዳዬ። 17 ታ ሃሳያ አኬኪደ ስስተ፤ ታን ኦድያዌ ህንተ ሀይꬃን ገሎ። 18 በእተ፥ ታን ታ ሞቱዋ ጊግሳድ፤ ሻትማናዋካ ኤራይ።

19 “አቤት ጾሳዉ፥ ኔን ታና ሞታናዉ ያይ? ኔን ታና ባይዛንቻ ከሶፐ፥ ታን ጮኡ ጋደ ሀይቃና። 20 ሽን ኔን ታዉ ሀ ላኡባቱዋ ኦꬃ፤ ታን ኔፐ ጌምከ። 21 ታና ሙርያዋ አጋ፤ ነ አንጋን ታና ዳጋንꬆፓ። 22 ሄዋፐ ጉይያን፥ ታና ጼሳ፤ ታን ኮያና። ዎይ ታን ሃሳይና፥ ታዉ ዛራደ ሃሳያ። 23 ባረዉ፥ ታን ባይዜዳ ባይዙነ ናጋራይ አፑኔ? ታ ባላነ ታ ናጋራ አነ ታና በሳ።

24 “ኔን አያዉ ነ ሶምኡዋ ታፐ ገንꬃይ? ቃይ ታና አያዉ ነ ሞርክያዳን ፓይዳይ? 25 ታና፥ ጫርኩ አፍያ ቦንጭያ ማላ፥ ያሽሳዪ? ዎይ መሌዳ ሱላ ማላ የደርሳይ? 26 ኔን ታ ቦላ ጻፌዳ ሞቱ ጫማ፤ ሀራይ አትና፥ ታን ያላጋተꬃን ደኣደ ኦꬄዳ ባይዙዋነ አሻባካ። 27 ኔን ታ ገድያ ገድያ ብራታን ቃቻዳ፤ ታ ታንግያ ታንጉዋ ኡባ ዎቻሳ፤ ታ ገድያ ኮትያ ፕልጋ ጼላሳ። + 28 ታን ዎቄዳባዳን ሀናይ፤ ብልአይ ሜዳ አፍላዳንካ ዎቃይ።