ዮሃንስ
ጻፌዳ ላኤንꬆ ኪታ
ገሉዋ
ዮሃንሳ ላኤንꬆ ኪታ፥ የሱስ ኪቴዳ አማንያዋንታ ካለꬅያ ጭማ ዮሃንስ ጻፌዳ። ጻፈቴዳዌካ፥ ዶረቴዳ ጌንዉነ እዝ ናናቱዋሳ። እዛካ ሄ ዎደ ደእያ አማንያ አሳ ሺቁዋ በሳዉ። ሀ ቃንꬃ ኪታይ ጻፈቴዳዌ ኡንቱንቱ እቱ እቱዋና ሲቀታናዳን ሀሳይሳናሳነ ዎርዶ አስታማራቱዋፐነ ኡንቱንቱ ትምርትያፐ ናገታናዳን ቆፍሳናሳ።
ሸምፓቱዋ ኡባቶ እመቴዳ ቃንꬃ ቆፋቱዋ
ገሉዋ 1-3
ሲቁ ኡባፐ ቦላ 4-6
ዎርዶ ትምርትያፐ ናገታናዳን ኦደቶዋ 7-11
ዉርሰꬃ ቁትያ 12-13
1
1-2 ታን አማንያዋንታ ካለꬅያ ጭማይ፥ ህንተንቶ፥ ዶረቴዳ ገንዉነ እዝ ናናዉ ሀ ዳብዳቢያ ጻፋይ፤ ኑ ግዶን ደእያ ቃይ ኑናና መꬍናዉ ደአና ቱማተꬃ ድራዉ፥ ታን ህንተና ቱሙ ሲቃይ። ቃይ ታ ጻላላ ግደናን፥ ቱማተꬃ ኤርያ ኡባቱ ህንተና ሲቂኖ።
3 ጾሳ ኑ አዉዋነ አ ናኣ የሱስ ክርስቶሳ አꬎ ኬካተꬃይ፥ ማሮተꬃይነ ሳሮተꬃይ ቱማተꬃንነ ሲቁዋን ኑናና እትፐ ግዶ።
ቱሙዋባነ ሲቁዋባ
4 ጾሳ አዉ ኑና አዛዜዳዋዳን፥ ነ ናናቱዋፐ አማሬዳዋንቱ፥ ቱማተꬃን ደእያዋ በኣደ ታን ዳሮ ናሸታድ።
5 ሲቆ ገኔ፥ ሀእካ ኑን ኡባይ እቱ እቱዋና ሲቀታና ማላ፥ ታን ኔና ዎሳይ፤ ሀ አዛዙ ካሴደፐ ኑናና ደእያ አዛዙዋፐ አትን፥ ታን ነዉ ኦራꬃ አዛዙዋ ጻፍከ።
6 ሲቁዋ ግያዌ ኑን ጾሳ አዛዙዋ ናጊደ ደእያዋ ግያዋ። ቃይ ኮይሩዋፐ ህንተ ስሴዳዋዳንካ፥ አ አዛዙ አዬ ጎፐ፥ ህንተ ኡባይ ሲቁዋን ደአናዋ።
7 አያዉ ጎፐ፥ የሱስ ክርስቶስ አሳ ግዲደ ዬዳዋ አማኖኮ ግያዋንቱ፥ ባለꬅያ ዳሮ አሳቱ፥ ጋደ ግዶ ገሌድኖ። ሄዋ ማላ ኡራይ ኦንነ አሳ ባለꬅያዋነ ክርስቶሳ ኤቀትያዋ።
8 ህንተ ኦꬄዳዎ ኩመንꬃ ዎይታ አካናፐ አትን፥ ኑን ኦꬄዳዋ ባይዘና ማላ፥ ህንተና ናግተ።
9 ክርስቶሳ ትምርትያፐ ሃክያ ኡራዉነ ቃይ አ ትምርትያን ደኤና ኡራዉ ጾሳና እትፐተꬃይ ባዋ። ክርስቶሳ ትምርትያን ደእያ ኡራዉ ጾሳ አዉዋናነ አ ናኣና እትፐተꬃይ ደኤ።
10 ኦንነ ህንተኮ ዪደ፥ ሀ ትምርትያ አሄናን አጎፐ፥ ህንተ ጎለ አ ገልሶፕተ፤ ሳሮካ ጎፕተ።
11 አያዉ ጎፐ፥ አ ሳሮ ግያ ኡራይ አ ኢታ ኦሱዋ አናና ግሸቴ።
ዉርሰꬃ ሳሮታ
12 ታን ህንተንቶ ጻፋናዉ ኮዬዳ ዳሮባይ ደኤ፤ ሽን ዋራቃታንነ ቃላምያን ጻፋናዉ ኮያበይከ፤ ሽን ኑ ናሸቻይ ፖለታና ማላ፥ ህንተናና ዶናን ሃሳያናዉ ህንተኮ ባና ጋደ ቆፓይ።
13 ሲቆ ገኔ፥ ጾሳይ ዶሬዳ ነ ምቻት ናናይ ኔና ሳሮ ሳሮ ያጊኖ።