አይሁዳ ግደና አሳ ቦላ ኦደቴዳ ፕርዳ
25
(ህዝ. 25:1—32:32)
አሞናቱዋ ቦላ ኦደቴዳ ትምቢትያ
1 መꬍና ጎዳ ቃላይ ታኮ ሀዋዳን ያጊደ ዬዳ፤
2 “ላ አሳ ናአዉ፥ ነ ሶምኡዋ አሞና ቢታኮ ዛራደ፥ አሞናቱዋ ቦላ ትምቢትያ ኦዳ።
3 ሀዋዳን ያጋ፤ ‘ኡባ ሞድያ መꬍና ጎዳ ቃላ ስስተ። ኡባ ሞድያ መꬍና ጎዳይ ሀዋዳን ያጌ፤ “ህንተ ታ ጌሻ ጎሊ ቱንያ ዎደ፥ እስራኤልያ ቢታይ መላ አትያ ዎደነ ይሁዳ አሳይ ኦሞዶ ብያ ዎደ፥ ሀሹ! ጌዳ ድራዉ፥
4 ታን ህንተና አዋይ ዶልያ ባጋ ቢታ አሳዉ ላታ ኦꬃደ እማና። ያቶፐ ኡንቱንቱ ህንተ ግዶን ካምቢያ ኬጻና፤ ደአና። ህንተ ማና ቴራ ኡንቱንቱ ማና፤ ህንተ ማꬃካ ኡንቱንቱ ኡሻና።
5 ታን ራባ ካታማ ጋሎቱ ሄመትያ ሳኣ ከሳና፤ አሞናቱዋ ጋድያካ ዶርሳ ዉዲ አላጽያ ሳኣ ኦꬃና። ታን መꬍና ጎዳ ግድያዋ ህንተ ሄዋን ኤራና” ያጌ።
6 “ ‘አያዉ ጎፐ፥ ኡባ ሞድያ መꬍና ጎዳይ ሀዋዳን ያጌ፤ “ህንተ እስራኤልያ ባሻን ኩሽያ ባቄዳ ድራዉ፥ ጉፔዳ ድራዉነ ናሸቲደ ቅሊጬዳ ድራዉ፥
7 ታን ህንተ ቦላ ታ ኩሽያ የዳድ። ህንተና ካዉተꬃቶ ኦሞዱዋ ኦꬃደ እማና። ታን ህንተና አሳ ግዶፐ ሾዳና፤ ካዉተꬃቱዋ ግዶፐካ ꬋይሳና። ታን መꬍና ጎዳ ግድያዋ ህንተ ሄዋን ኤራና” ያጌ።
ሞኣባ ቢታ ቦላ ኦደቴዳ ትምቢትያ
8 “ ‘ኡባ ሞድያ መꬍና ጎዳይ ሀዋዳን ያጌ፤ “ሞኣብነ ሰኢር፥ በእተ፥ ይሁዳይ ሀራ ካዉተꬃቱዋ ማላ ያጌዳ ድራዉ፥
9 ታን ሞኣባ ቢታ ቦላን ገላደ፤ ዎራጃደ አ ዛዋ ናግያ፥ ቤት-ያሽሞታ፥ ባኣል-ማኦናነ ቅርያታይማ ጌተትያ፥ ኤረቴዳ ካታማቱዋ ꬋይሳና።
10 ሀዋፐ ስንꬃናዉ አሞናቱዋናካ ጉጃደ፥ ኡንቱንቱ ካዉተꬃቱዋ ግዶን ሀሳየተናዳን፥ ታን ኡንቱንታ አዋይ ዶልያ ባጋ ቢታፐ ዬዳ አሳቶ ዱረታዳን አꬃደ እማና።
11 ታን ሞኣባ ፕርዳና። ሄ ዎደ ታን መꬍና ጎዳ ግድያዋ ኡንቱንቱ ሄዋን ኤራና” ያጌ።
ኤዶማ ቢታ ቦላ ኦደቴዳ ትምቢትያ
12 “ ‘ኡባ ሞድያ መꬍና ጎዳይ ሀዋዳን ያጌ፤ “ኤዶማቱ ይሁዳ ቦላ ሀሉዋ ከሴዳ ድራዉነ ዳሮ ባይዛንቻ ግዴዳ ድራዉ፥
13 ታን ኡባ ሞድያ መꬍና ጎዳይ ታ ኩሽያ ኤዶማ ቦላ የዳና። አን ደእያ አሳነ መህያ ሙለ ꬋይሳና፤ ꬋይሳደ መላ ከሳና። ተማና ካታማፐ ቢደ፥ ዳዳና ካታማ ጋካናዉ፥ ኡንቱንቱ ማሻን ቡሳከታና።
14 ታን ኤዶማዉ ታ አሳ እስራኤልያ ባጋና ሀሉዋ ከሳና። እስራኤላቱ ኡንቱንቱ ቦላ ታ ሀንቁዋነ ታ ሀንቁዋ ኬሻ ኦꬃና። ታን ሀሉዋ ከሴዳዋ ኡንቱንቱ ኤራና። ታን ኡባ ሞድያ መꬍና ጎዳይ ሀዋ ኦዳይ” ያጌ።
ፕልስጼማቱዋ ቦላ ኦደቴዳ ትምቢትያ
15 “ ‘ኡባ ሞድያ መꬍና ጎዳይ ሀዋዳን ያጌ፤ “ፕልስጼማቱ ባረንቱ ዎዛና ኢታተꬃን ሀሉዋ ከሴዳ ድራዉነ ጋምኤዳ ሞርከተꬃን ይሁዳ ካꬊደ ꬋይሳናዉ ኮዬዳ፥
16 ሄዋ ድራዉ ኡባ ሞድያ መꬍና ጎዳይ ሀዋዳን ያጌ፤ ታን ታ ኩሽያ ፕልስጼማቱዋ ቦላ የዳደ ከሊታዌቱዋ ቃንጻና። ታን ኡንቱንታነ አባ ዶናን አቴዳዋንታ ኡባ ꬋይሳና።
17 ታን ኡንቱንቶ ዎልቃማ ሀሉዋ ከሳና፤ ታ ሀንቁዋን ኡንቱንታ ሙራና። ታን ኡንቱንቶ ሀሉዋ ከስያ ዎደ፥ ታን መꬍና ጎዳ ግድያዋ ኡንቱንቱ ኤራና” ያጌ’ ያጋ” ያጊደ ዬዳ።