19
እስራኤልያ ዳናቱዋ ዝላሳ
1 ጾሳይ ህዝቄላ፥ “እስራኤልያ ካፓቶ ሀዋዳን ያጋደ ዝላላ፤
2 “ህንተ አታ ጋሞቱዋ ግዶን፥
እዛ አይባ ጋማቲ!
ያላጋ ጋሞቱዋ ግዶን ግሳደ፥
ባረ ማራቱዋ ድቻዱ።
3 እዛ ባረ ማራቱዋፐ እቱዋ ድችና፥
ዎዳላ ጋሙዋ ከሴዳ።
እ ሻንካ ታማሪደ፥ አሳ ሜዳ።
4 ካዉተꬃቱ ኡባይ አባ ስሲደ፥
ኦላን ገሊደ ኦይቀቴዳ።
ኡንቱንቱ አ ማጋን ጎቺደ፥
ግብጼ ቢታ አፌድኖ።
5 “አ አታ ናጎዌ ፖለተናን እጽና፥
ህዶታይ ꬋዬዳዋ በኣደ፥
ባረ ማራቱዋፐ ላኤንꬁዋ ድቻደ፥
ዎዳላ ጋሙዋ ከሳዱ።
6 እ ዎዳላ ጋሙዋ ግዲደ፥
ሀራ ጋሞቱዋ ግዶን፥
ያነ ሃነ ስመረቴዳ።
እ ሻንካ ታማሪደ፥ አሳ ሜዳ።
7 እ ኡንቱንቱ ዎልቃማ ጌሱዋ መንሬꬂደ፥
ካታማካ ባይዜዳ።
ቢታይነ ቢታን ደእያ አሳይ ኡባይ፥
አ ጉደꬃን ሻቢረቴዳ።
8 ዩሹዋን ደእያ ካዉተꬃቱ ኡባይ፥
አ ኦይቃናዉ ጲርያ የጌድኖ።
ባረንቱ ግትያካ ምጬድኖ፤
ባረንቱ ኦላን አ ኦይቄድኖ።
9 ኡንቱንቱ ባረንቱ ማጋን አ ጎቺደ፥
ኮꬃዳን ጊጌዳ ጉꬃ ጎልያን የጊደ፥
ባብሎነ ካትያኮ አፌድኖ።
ላኤንꬆ አ ጉደꬃይ እስራኤልያ ደረቱዋን ስሰተናዳን፥
ኡንቱንቱ አ ቃሾ ጎልያ ገልሴድኖ።
10 “ ‘ነ አታ ሃꬃ ዶናን፥
ቶከቴዳ ዎይንያ ቱራ ማላ።
ዳሮ ሃꬃይ ደእያ ድራዉ፥
ሄ ዎይንያ ቱራይ አይፍያ ዳርጻጽ ኡቴዳ፤
ቃይ ዳሮ ዳሻና ደኤ።
11 አ ማራቱዋፐ ምንያዌ፥
ሞድያዋንቱ ጻምኣ ግዴዳ።
አ ማራይ ዎልቃማ ማራቱዋፐ አዱቂደ፥
ቦላዉ አꬌዳ።
ባረ ማራቱዋ ጮራተꬃንነ
ꬎቃተꬃን ቦላና ቤቴዳ።
12 ሽን ሄ ቱራይ ሀንቁዋን ሾደቲደ፥
ቢታን ኦለቴዳ።
አዋይ ዶልያ ጫርኩ አ አይፍያ መልስና ቆቆፈቴዳ፤
አ ምኖ ታሺ መልና፥ ታማይ ሜዳ።
13 ሀእ ቃይ እ ሃꬅ ባይና፥
መላ ቢታን ቶከቴዳ።
14 ታማይ አ ማራቱዋፐ እቱዋ ኦይቂደ፥
አ አይፍያናካ ድፕ ኦꬂደ ሜዳ።
ያትና፥ ካዉተꬃ ጻምኣ ግድያ፥
አይ ምኖ ማራይካ አ ቦላን አትቤና።
“ ‘ሀዌ ዬኩዋ ዝላሳ፤ ሀዋ ዝላሳዳን ጎኤታናዉ በሴ’ ያጋ” ያጌዳ።