6
ዎሳ ጎልያ ማድያ ላፑ አሳቱ ዶረቴድኖ
1 ሄ ዎደ፥ ካልያዋንቱ ፓይዱ ዳር ዳር ቢሽን፥ ግሪከ ቃላ ሃሳይያ አይሁዳቱነ ይሁዳን ደእያ አይሁዳቱ ዋላቀቴድኖ፤ አያዉ ጎፐ፥ ግሪከ ቃላ ሃሳይያ አይሁዳቱ፥ “ኡባ ጋላስ ግሸትያ ቁማን ኑ አስናይ ሀይቆ ማጫዋንቱ ናቀቲኖ” ያጌድኖ።
2 የሱስ ኪቴዳ ታማነ ላአቱ ዎሳ ጎለ አሳ ኡባ ጼሲደ፥ ሀዋዳን ያጌድኖ፤ “ኑን ጾሳ ቃላ ኦድያዋ አጊደ፥ ቁማ ግሻናዉ ኑዉ በሰና።
3 እሻቶ፥ ሎአ ጌተትያዋንታ ጌሻ አያናይነ አꬎ ኤራተꬃይ ኩሜዳ ላፑ አሳቱዋ ህንተ ግዶፐ ዶርተ፤ ኑን ቃይ ኡንቱንታ ሀ ኦሶ ሱንꬃና።
4 ሽን ኑን ጾሳ ዎሳንነ ቃላ ኦዱዋን ምናና” ያጌድኖ።
5 የሱስ ኪቴዳዋንቱ ሃሳዬዳ ሃሳያይ አሳ ኡባ ናሸቼዳ፤ ሄዋፐ ጉየ፥ አማኑነ ጌሻ አያናይ ኩሜዳ እስጽፋኖሳ፥ ፕልጶሳ፥ ጵሮኮሮሳ፥ ንቃሮና፥ ጽሞና፥ ጳርሜናነ አይሁዳቱዋ አማኑዋን ገሌዳ አንጾክያ ኒቆላዎሳ ዶሬድኖ።
6 ያቲደ የሱስ ኪቴዳዋንቱ ስንꬃን ኡንቱንታ ኤስና፥ የሱስ ኪቴዳዋንቱ ጾሳ ዎሴዳዋፐ ጉይያን፥ ባረንቱ ኩሽያ ኡንቱንቱ ቦላ ዎꬄድኖ።
7 ጾሳ ቃላይ አክ አክ ቤዳ፤ ካልያዋንቱ ፓይዱዋን የሩሳላመን ዳርስ ዳር ዳር ቤዳ፤ ቃይ ጮራ ቄሳቱካ አማኔድኖ።
ዎሳ ጎልያ ካለꬅያ እስጽፋኖስ ኦይቀቴዳ
8 አꬎ ኬካተꬃይነ ዎልቃይ ኩሜዳ እስጽፋኖስ፥ አሳ ግዶን ኦራꬃባነ ዎልቃማ ማላታ ኦꬄ።
9 አይለተꬃፐ ከሴዳ አሳ ግያ አይሁዳ አማንያዋንቱፐ፥ ቀሬናፐ፥ እስክንድርያ አሳቱዋፐ፥ ክልቂያፐነ ኢስያፐ ዬዳ እት እት አሳቱ ደንዲደ፥ እስጽፋኖሳና ፓሉመቴድኖ።
10 ሽን እስጽፋኖስ አꬎ ኤራተꬃንነ አያናን ሃሳይያዋ ድጋናዉ ዳንዳይበይክኖ።
11 ሄ ዎደ ኡንቱንቱ፥ “ሙሴ ቦላነ ጾሳ ቦላ እ ቦርያ ቃላ ሃሳይሽን ስሴዶ” ግያ ዎርዶ አሳቱዋ ሻሜድኖ።
12 አሳ ኡባ፥ ጭማቱዋነ ሙሴ ህግያ ታማርስያዋንታ ሀንቀꬄድኖ፤ እስጽፋኖሳኮ ዪደ አ ኦይቂደ፥ ሺቄዳ አሳኮ አህና፥
13 አ ቦላ ጼሴዳ ዎርዶ ማርካቱ፥ “ሀ ብታኒ ሀ ጌሻ ጎልያነ ሙሴ ህግያ ቦርያዋ አዉደነ አገና።
14 አያዉ ጎፐ እ፥ ‘ሀዌ ናዝሬትያ የሱስ ሀ ጌሻ ጎልያ ኮላና፤ ሙሴ ኑዉ እሜዳ ህግያካ ላማና’ ያግሽን፥ ኑን ስሴዶ” ያጌድኖ።
15 ሺቁዋን ኡቴዳ አሳይ ኡባይ እስጽፋኖሳ አኬኪደ ጼልያ ዎደ፥ አ ሶምእ ኪታንቻ ሶምእያ ማላቴ።