3
Nyʋɣʋ nyǝ́mɑ kʋkpɑɑlǝtʋ
1 Ḿpʋ́ɣʋ́ Misee pɔɔsɑ Ɩsɛɣɛlɩ nyʋɣʋ nyǝ́mɑ sɩ:
Pǝ tɑɣɑ mǝ nyǝntɛ ntɛ́ sɩ ɩ́ tǝŋ tɑmpɑnɑ?
2-3 Amɑ ɩ́ kisɑ kʋpɑntʋ,
nɑ ɩ́ sɔɔlɩ ɩsɑɣɑtʋ.
Ɩ́ tɔɔkǝnɑ mǝ tǝɣɩ mɑ yǝlɑɑ nɑ ɩ́ litiɣi pɑ tɔnǝŋ.
Ɩ́ kɔɔlǝɣɩ pɑ nɑntʋ nɑ pǝ yeki mʋwɑ.
Ɩ́ cɔtǝɣɩ-wɛ nɑ ɩ́ hiisiɣi ɩsɩɩ nɑntʋ nti
pɑɑ tʋ tiipile tɑɑ tɔ.
4 Pǝ tɔɔ kɛ́ pɑɑ ɩ́ wiinɑ Tɑcɑɑ sɩ
ɩ́ wɑɑsɩ-mɛ, ɩ́lɛ́ ɩ kɑɑ cɔ.
Ɩ kɑ́ hɑ-mɛɣɛ siɣile kɛ mǝ ɩsɑɣɑtʋ tɔɔ kɛ́.
Ɩsɔ kɑlǝɣǝnɑ ɩ kʋyɔɣɔtʋtʋ tɛlǝsǝlɑɑ tʋsǝlɑɑ
5 Tɑcɑɑ yɔɣɔtǝɣɩ Ɩsɔ kʋyɔɣɔtʋtʋ tɛlǝsǝlɑɑ
mpɑ pɑ tʋsǝɣɩ ɩ yǝlɑɑ tɔ sɩ:
Ye ɩ́ hikiɣi nɑ ɩ́ mʋlǝɣɩ,
ɩlɛ wɑɑtʋ ɩnǝɣǝlɛ ɩ́ heeliɣi ɑlɑɑfǝyɑ tɔm.
Ye ɩ́ lɑŋɑɑ, ɩlɛ ɩ́ kpɑɑlǝɣɩ yooŋ kɔntɛ tɔm.
6 Mpʋ tɔ, mǝ toosee tɛmɑ.
Ahoo kɑ́ yu mǝ tɔɔ.
Cele tɔm nɑʋ sɩɩ tǝnɑɣɑ.
Sǝkpɛtʋɣʋ kɑ́ nyɑlǝnɑ mǝ tɔɔ ɩsɩɩ ilim tʋwɑ,
ɩ́ kɑɑ nɑ pʋlʋ.
7 Cele tɔm nɑlɑɑ tǝnɑ kɑ́ kɑ nyɔɔŋ nɑ fɛɛlɛ.
Mpi tɔ, Ɩsɔ ɩɩ cɔɔkɩ-mɛ.
8 Misee sɩ: Amɑ mɑ́ ɩlɛ
Tɑcɑɑ hɑ mɑɣɑ ɩ Feesuɣu.
Mɑ wɛnɑ toŋ nɑ mɑ́ tǝŋǝɣɩ siɣisuɣu
nɑ mɑ́ wɛnɑ ɑpɑlʋtʋ,
nɑ mɑ́ kuliɣi ɩsɛɣɛlɩ nyǝ́mɑ kɑwɑlɑɣɑ tɔɔ.
Yosɑlɛm wɑkǝlʋɣʋ tɔm kpɑɑlʋɣʋ
9 Ɩsɛɣɛlɩ nyʋɣʋ nyǝ́mɑ mɛɣɛ mɑ wɛnɑ.
Ɩ́ kisiɣi siɣisuɣu tǝŋʋɣʋ,
nɑ ɩ́ pɛŋ tɑmpɑnɑ kɛ ɑ nyǝ́mɑ.
10 Ɩ́ ŋmɑɑkɩ Yosɑlɛm nɑ muɣuluɣu nɑ yʋlʋkʋlɛ.
11 Kʋhɑʋ tɔɔ kɛ́ hʋʋlɑɑ nɑ́ pɑɑsǝɣǝnɑ tɔm.
Kɔtǝlɑɑ nɑ́ mʋɣʋ kʋfɛlʋɣʋ nɑ pǝ́cɔ́ pɑ́ sɛɣɛsǝɣɩ.
Ɩsɔ kʋyɔɣɔtʋtʋ tɛlǝsǝlɑɑ nɑ́ kpɑɑlǝɣɩ liɣitee tɔɔ.
Ɩlɛnɑ pɑɑ nɑ mpʋ pɑ́ yɑɑkɩ pɑ tǝɣɩ Tɑcɑɑ nyǝ́mɑ.
Hɑlɩ pɑ tɔŋ sɩ: Ɩsɔ wɛ tɑ wɑɑlɩ kɛ́,
mpusi nɔɣɔlʋ ɩ kɑɑ mɑɣɑnɑ tʋ.
12 Mɩɩ yelinɑ nɑ Siyɔŋ ɩcɑtɛ pǝsɩ hɑlǝm.
Nɑ Yosɑlɛm nɑ́ɑ́ pǝsɩ pɛɛ kɑŋmɑɑɣɑ.
Tɩɩŋ kɑ́ wɑɑsɩ Ɩsɔ tǝsɛɛlɛ pulɑɣɑ.