22
Yutɑɑsɩ kɔlɔmɔtɔ tɔm
(Mɑtiyee 26:1-5; Mɑlǝkɩ 14:1-2; Yohɑɑnɩ 11:45-53)
1 Potopotonɑɑ mpɑ pɑ tɑɑ kʋkʋsʋm fɛɩ tɔ pɑ ɑcimɑ wenɑ pɑ yɑɑ sɩ Tɛɛʋ ɑcimɑ tɔ ɑ wʋsɑɑ.
2 Ḿpʋ́ɣʋ́ kɔtǝlɑɑ sɔsɑɑ nɑ Ɩsɔ Tɔm sɛɣɛsǝlɑɑ pɑ tɔŋnɑ mɑɣɑsʋɣʋ kɛ ɩsǝnɑ pɑɑ lɑ nɑ pɑ́ kʋ Yesu tɔ. Amɑ pɑ sɔɣɔmɑɣɑɑnɑ sɑmɑɑ kɛ́.
Yutɑɑsɩ sɔɔlʋ pɩɩwɑ sɩ ɩ tʋɣɩ Yesu kɛ́ nyʋɣʋ nyǝ́mɑ niŋ tɑɑ
(Mɑtiyee 26:14-16; Mɑlǝkɩ 14:10-11)
3 Ḿpʋ́ɣʋ́ Sɑtɑnɩ sʋʋ Yutɑɑsɩ Ɩsǝkɑleeu pɑ nɑɑnʋwɑ nɑ nɑɑlɛ tɑɑ lɛlʋ tɑɑ.
4 Ɩlɛnɑ ɩ́ polo nɑ ɩ́ nɑ kɔtǝlɑɑ sɔsɑɑ, nɑ Ɩsɔ tǝsɛɛlɛ sɔsɔɔlɛ tɑŋlɑɑ tɑɑ sɔsɑɑ pɑ́ sɛɣɛsɩ ɩsǝnɑ ɩ kɑ́ lɑ nɑ ɩ́ tʋ Yesu kɛ́ pɑ niŋ tɑɑ tɔ nɑ pɑ́ sɩɩ.
5 Tǝnɑɣɑ pɛlɛ pɑ lɑŋɑ hɛɛwɑ sɔsɔm. Ɩlɛnɑ pɑ́ tɔ sɩ pɑɑ hɑ-ɩ liɣitee.
6 Ɩlɛnɑ Yutɑɑsɩ tisi, nɑ ɩ́ sʋʋ pɛɛkʋɣʋ kɛ kʋyɑkʋ kʋpɑŋkʋ ŋku kʋ tɑɑ ɩ kɑ́ tʋ Yesu kɛ́ pɑ niŋ tɑɑ nɑ sɑmɑɑ tɑ nyɩ tɔ.
Tɛɛʋ ɑcimɑ kʋtɔɣɔʋ tɑɣɑnʋɣʋ
(Mɑtiyee 26:17-25; Mɑlǝkɩ 14:12-21; Yohɑɑnɩ 13:21-30)
7 Potopotonɑɑ mpɑ pɑ tɑɑ kʋkʋsʋm fɛɩ tɔ pɑ ɑcimɑ kʋyɑkʋ ŋku kʋ wule pɑ kʋɣɩ Tɛɛʋ ɑcimɑ ɩwɛɛsɩ tɔ kʋ tɑlɑɑ.
8 Ḿpʋ́ɣʋ́ Yesu kʋsɑ Piyɛɛ nɑ Yohɑɑnɩ sɩ: Ɩ́ polo ɩ́ tǝsǝɣɩ-tʋɣʋ Tɛɛʋ ɑcimɑ tɔɣɔnɑɣɑ.
9 Tǝnɑɣɑ Piyɛɛ pɑ pɔɔsɑ-ɩ sɩ: Leɣe n cɑɑ sɩ tǝ tǝsɩ-kɛ?
10 Ɩlɛnɑ Yesu cɔ-wɛ sɩ: Ɩɩ nɑɑ, ɩ́ kɑ́ kɔɔ ɩsɩɩ ɩ́ sʋʋ ɩcɑtɛ tɔ, ɩ́ kɑ́ sulinɑ ɑpɑlʋ nɔɣɔlʋ nɑ ɩ́ sǝɣǝlɑ lʋm nɑ hǝyɑɣɑ. Ɩ́ tǝŋɩ-ɩ nɑ ɩ́ sʋʋ tǝyɑɣɑ ŋkɑ kɑ tɑɑ ɩ kɑ́ sʋʋ tɔ.
11 Ɩlɛnɑ ɩ́ pɔɔsɩ tǝyɑɣɑ tʋ sɩ: Tɑcɑɑ sɩ, kutuluɣu ŋku kʋ tɑɑ kɛ́ ɩ́ nɑ ɩ ɩfɑlɑɑ pɑɑ cɑɣɑ nɑ pɑ́ tɔɣɔ Tɛɛʋ ɑcimɑ kʋtɔɣɔʋ?
12 Apɑlʋ ɩnɩ ɩ kɑ́ hʋ́lɩ́-mɛɣɛ ɑtɛ nɑ ɩsɔ kutuluɣu tɑɑ kɛ́ nɑŋ sɔsɔɔʋ nɑkʋlǝɣɩ ɩsɔtɑɑ, ŋku kʋ tɑɑ wɛ wontu nti ɩ́ kɑ́ lɑnɑ tɔ. Kʋ tɑɑ tǝnɑɣɑ ɩ́ kɑ́ tǝsɩ pǝ tǝnɑ.
13 Ḿpʋ́ɣʋ́ Piyɛɛ pɑ polɑɑ nɑ pɑ́ mɑɣɑnɑ teitei ɩsɩɩ Yesu kɑ heelɑ-wɛ tɔ. Nɑ pɑ́ tǝsɩ Tɛɛʋ ɑcimɑ kʋtɔɣɔʋ kɛ tǝnɑ.
Tɑcɑɑ sǝm tɔɔsʋɣʋ
(Mɑtiyee 26:26-30; Mɑlǝkɩ 14:22-26; Kɔlɛntɩ I 11:23-25)
14 Tɛɛʋ ɑcimɑ wɑɑtʋ tɑlɑɑ, ɩlɛnɑ Yesu nɑ ɩ tillɑɑ pɑ́ cɑɣɑ tɔɣɔʋ.
15 Ɩlɛnɑ ɩ́ heeli-wɛ sɩ: Ɩsǝnɑ mɑ nyɩɩlɑ teu sɩ mɑ́ nɑ-mɛ tǝ́ tɔɣɔ Tɛɛʋ ɑcimɑ tɔɣɔnɑɣɑ nɑ pǝ́cɔ́ mɑ́ sʋʋ mɑ kʋnyɔntɔɣɔlɛ tɑɑ tɔ pǝ wɛ sɔɣɔntʋ.
16 Pǝ tɑɣɑ pʋlʋ tɔɔ, tɑmpɑnɑ kɛ mɑ heeliɣi-mɛ sɩ mɑ kɑɑ tɑsɑ-yɛɣɛ tɔɣɔʋ hɑlǝnɑ pǝ́ kɔɔ pǝ́ hʋ́lɩ́ ɩ tɔɣɔʋ tɑmpɑnɑ kɛ Ɩsɔ Kɑwulɑɣɑ tɑɑ nɑ pǝ́cɔ́.
17 Ḿpʋ́ɣʋ́ Yesu kpɑɣɑ sʋlʋm nɑ kɔpʋ, nɑ ɩ́ sɛɛ Ɩsɔ kɛ́ ɩ́ nɑ tǝmlɛ nɑ ɩ́ tɔ sɩ: Ɩ́ mʋ-wɩ nɑ ɩ́ nyɔɔ mǝ tǝnɑ.
18 Pǝ tɑɣɑ pʋlʋ, mɑ heeliɣi-mɛ sɩ pǝ kpɑɣɑʋ pǝnɛntɛ tɔ mɑ kɑɑ tɑsɑ sʋlʋm nyɔɔʋ hɑlǝnɑ Ɩsɔ kɔɔ nɑ ɩ́ tɔɣɔ ɩ Kɑwulɑɣɑ nɑ pǝ́cɔ́.
19 Pǝ wɑɑlɩ kɛ́ Yesu kpɑɣɑ potopoto nɑ ɩ́ sɛɛ Ɩsɔ kɛ́ ɩ́ nɑ tǝmlɛ, ɩlɛnɑ ɩ́ fɑɣɑ-ɩ nɑ ɩ́ cɛlɛ-wɛ nɑ ɩ́ tɔ sɩ: Potopoto ɩnɛ ɩ kɛnɑ mɑ tɔnʋɣʋ ŋku pǝ hɑ mǝ tɔɔ tɔ. Ḿpʋ́ɣʋ́ ɩ́ kɑ́ lɑkɩ nɑ ɩ́ tɔɔsǝɣɩ mɑ tɔɔ.
20 Pɑ tɛmɑ tɔɣɔʋ ɩlɛnɑ Yesu kpɑɣɑ kɔpʋ kɛ mpʋ tɔtɔ nɑ ɩ́ tɔ sɩ: Kɔpʋ ɩnɛ ɩ kɛnɑ Ɩsɔ nɔɣɔ pɛɛlʋɣʋ kʋfɑm yoo, nɑ mɑ cɑlǝm mpi pǝ kpemɑ mǝ tɔɔ tɔ mpɩ pǝ hʋlǝnɑ pǝ tɑmpɑnɑ.
21 Ɩ́ nyɩ teu sɩ wei ɩ tʋɣʋ-m kolontunɑɑ niŋ tɑɑ tɔ ɩ wɛ cǝnɛ, nɑ mɑ nɑ-ɩ tǝ tɔkǝnɑ.
22 Tɑmpɑnɑ tɔɔ Yʋlʋ Pǝyɑɣɑ mɑ́ mɑɑ tɛɛ kɛ́ ɩsɩɩ Ɩsɔ kɑ́ sɩɩʋ tɔ. Amɑ wei ɩ tʋɣʋ-m kolontunɑɑ niŋ tɑɑ tɔ ɩ tɔm wɛ wɑɩyo.
23 Tǝnɑɣɑ Yesu ɩfɑlɑɑ sʋʋ tǝmɑɣɑ pɔɔsʋɣʋ sɩ: Ɩlɛ tɑ́ tɑɑ ɑwe kɑ́ lɑnɑ ntɛɣɛ mpʋ?
Sɔsɔɔntʋ tɔɔ hɔm
24 Ḿpʋ́ɣʋ́ Yesu ɩfɑlɑɑ sʋʋ hɔm kɛ pɑ tɑɑ pɑ tike sɩ pɑ nɑɑ wei pɑɑ nyǝnǝɣɩ sɔsɔ tɔ.
25 Tǝnɑɣɑlɛ Yesu sɩ: Piitimnɑɑ ɑwulɑɑ sɔsɑɑ ŋmɑkǝlǝɣɩ pɑ yǝlɑɑ kɛ́. Nɑ mpɑ pɑ kɛ́ toŋtʋnɑɑ tɔ, pɛlɛ pɑ cɑɑ pɑ́ cuɣusiɣi-wɛɣɛ tɑ cɑɑ tɑ cɑɑ kɛ́.
26 Amɑ mɛ ɩlɛ pǝ́ tɑɑ wɛɛ ḿpʋ́ɣʋ́ mǝ kiŋ. Mǝ tɑɑ sɔsɔ ɩ́ pǝsɩ ɩ tǝɣɩ mǝ sǝkpelu, nɑ wei ɩ kɛ́ wulɑʋ tɔ, ɩ́ pǝsɩ ɩ tǝɣɩ tǝmlɛ lɑtʋ.
27 Kʋtɔɣɔʋ lɑtʋ nɑ wei pɑ lɑkɩ-kʋ tɔ, ɑwe kǝlǝnɑ? Pǝ tɑɣɑ wei pɑ lɑkɩ-kʋ tɔ. Aŋhɑ, mpʋ ɩnǝɣɩ nɑ mɑ́, mɑ wɛ mǝ hɛkʋ kɛ́ ɩsɩɩ kʋtɔɣɔʋ lɑtʋ.
28 Mɛ mǝ tɔkɑ mǝ tǝɣɩ teu nɑ ɩ́ tɑ kisi-m mɑ wɑhɑlɑnɑɑ tɑɑ.
29 Pǝ tɔɔ kɛ́ mɑ tʋɣɩ-mɛɣɛ kɑwulɑɣɑ ɩsɩɩ mɑ Cɑɑ nɑ́ tʋɣʋ mɑ tɔ.
30 Mɑ́ nɑ-mɛ tɩɩ tɔkǝnɑ nɑ tǝ́ nyɔɔkɩ mɑ kɑwulɑɣɑ tɑɑ, nɑ ɩ́ kɑ́ cɑɣɑ kumlee tɔɔ nɑ ɩ́ hʋʋkǝnɑ Ɩsɛɣɛlɩ kpekɑ nɑɑnʋwɑ nɑ nɑɑlɛ.
Simɔŋ kpɛɛsʋɣʋ tɔm kpɑɑlʋɣʋ
(Mɑtiyee 26:31-35; Mɑlǝkɩ 14:27-31; Yohɑɑnɩ 13:36-38)
31 Ḿpʋ́ɣʋ́ Yesu tɔmɑ sɩ: Simɔŋ Simɔŋ Simɔŋ, ke ŋkpɑŋŋ. Sɑtɑnɩ sǝlǝmɑ nɔɣɔ nɑ pǝ́ hɑ-ɩ sɩ ɩ pɑɣɑlǝɣɩ mǝ tǝnɑ ɩsɩɩ pɑ pɑɣɑlʋɣʋ tɔɣɔnɑɣɑ pee nɑ pɑ́ lǝsǝɣɩ lɔɔtʋ tɔ.
32 Amɑ mɑ sǝlǝmɑ Ɩsɔ kɛ́ nyɑ́ tɔɔ sɩ pǝ́ tɑɑ kɔɔ nɑ ń yele Ɩsɔ kɛ́ nyɑ́ tɑɑ tɛmmɑʋ. Nyɑɑ kɔmɑ nɑ ń lɑɣɑsɩ ɩlɛ nyɑɑ sɔɔsɩ nyɑ́ tɑɑpɑlɑɑ kɛ ɑpɑlʋtʋ.
33 Tǝnɑɣɑ Piyɛɛ tɔmɑ Yesu sɩ: Tɑcɑɑ, mɑ tɛmɑ mɑ tǝɣɩ tɔkʋɣʋ kɛ́, pɑɑ sɑlǝkɑ pɑ́ tǝkɩ mɑ nɑ-ŋ, nɑ pɑɑ sǝm mɑ nɑ-ŋ tɩɩ sǝnɑ.
34 Ḿpʋ́ɣʋ́ Yesu cɔ Piyɛɛ sɩ: Piyɛɛ, mɑ heeliɣi-ŋ tǝfoo sɩ mpi pɩɩ tɑkɩ kɑmpɑɑʋ koou kɛ sɑŋɑ tɔ, n tɛmɑ tɔm toosoɣo kpɛɛsʋɣʋ sɩ n tɑ nyɩ-m kɛ́ n tɑ nyɩ-m.
Liɣitee nɑ lɑɣɑtɛ pǝ tɔkʋɣʋ tɔm
35 Pǝlɛ pǝ wɑɑlɩ kɛ́ Yesu pɔɔsɑ ɩ ɩfɑlɑɑ sɩ: Mɑɑ tiluɣu-mɛ nɑ ɩ́ tɛɛ mpʋ tǝyǝlǝyǝlɩ, liɣitee fɛɩ, huluɣu fɛɩ, ŋtɑnkpɑtɛ fɛɩ tɔ, ɩ́ lɑŋɑ pʋlʋpʋ cǝcǝkɑ nɑ? Pɑ cɔ-ɩ sɩ: Aɑɩ tǝ tɑ lɑ-ŋ pʋlʋ.
36 Ḿpʋ́ɣʋ́ Yesu tɔmɑ ɩ ɩfɑlɑɑ sɩ: Tɔʋ, pǝnɛntɛ wei ɩ́ wɛnɑ liɣitee, pʋntʋ ɩ́ tɔkɩ ɩ tɔɔ, nɑ wei ɩ́ wɛnɑ huluɣu ɩ́ tɔkɩ-kʋ, nɑ wei ɩ́ fɛɩnɑ lɑɣɑtɛ, pʋntʋ ɩ́ pɛɛtɩ ɩ toko nɑ ɩ́ yɑnɑ.
37 Mɑ heeliɣi-mɛ tǝfoo sɩ, nti pɑ ŋmɑɑ Ɩsɔ Tɔm tɑɑ sɩ: Asɑɣɑɑ tɑɑ kɛ́ pɑ tʋ-ɩ tɔ, pǝ wɛɛ kɛ́ sɩ pǝ́ lɑ ḿpʋ́ɣʋ́ mɑ nyʋɣʋ tɑɑ. Nɑ nti ŋmɑɑtʋ tɑɑ yɔɣɔtɑ ḿpʋ́ɣʋ́ mɑ tɔɔ tɔ tɩɩ lɑ teitei kɛ́.
38 Tǝnɑɣɑ Yesu ɩfɑlɑɑ tɔmɑ sɩ: Tɑcɑɑ, lɑɣɑlɛɛ ntɔ cǝnɛɣɛ nɑɑlɛ. Ɩlɛnɑ Yesu cɔ-wɛ sɩ: Aɑɩ, ɩ́ yele tǝlɛ.
Yesu sǝlǝmʋɣʋ kɛ Olifinɑɑ pʋɣʋ tɔɔ
(Mɑtiyee 26:36-46; Mɑlǝkɩ 14:32-42)
39 Ḿpʋ́ɣʋ́ Yesu kʋlɑɑ nɑ ɩ́ lɩɩ, nɑ ɩ́ polo Olifinɑɑ pʋɣʋ tɔɔ, ɩsɩɩ ɩ tɩɩ lɑkʋɣʋ tɔ, ɩlɛnɑ ɩ ɩfɑlɑɑ tǝŋ ɩ wɑɑlɩ.
40 Pɑ tɑlɑɑ ɩlɛnɑ Yesu tɔ-wɛ sɩ: Ɩ́ sǝlǝmǝɣɩ Ɩsɔ nɑ pǝ́ tɑɑ kɔɔ nɑ ɩ́ hoti mɑɣɑsʋɣʋ tɑɑ.
41 Tǝnɑɣɑ Yesu yelɑ-wɛ nɑ ɩ́ hɑtǝlɩ pǝ́cɔ́ ɩsɩɩ yʋlʋ ɩ́ lɔɣɔ pǝlɛ tɩɩ tɑlɑ timpi tɔ, ɩlɛnɑ ɩ luŋ ɑkulɑ, nɑ ɩ́ sǝlǝmɩ Ɩsɔ sɩ:
42 Hɑɩ, mɑ Cɑɑ, ye n nɔkɑɑ, kɔɔlɩ wɑhɑlɑ sɔsɔ ɩnɛɣɛ mɑ nyʋɣʋ tɑɑ. Ɩlɛ pɑɑ nɑ mpʋ lɑ mpi n nɔkɑɑ tɔ, yele mɑ kʋnɔkǝm.
[
43 Tǝnɑɣɑ ɩsɔtɑɑ tillu nɔɣɔlʋ ɩ lɩɩ Yesu tɔɔ, nɑ ɩ́ sɔɔsɩ-ɩ ɑpɑlʋtʋ.
44 Ḿpʋ́ɣʋ́ lɑŋwɑkǝllɛ sɔsɔɔlɛ kpɑ Yesu, ɩlɛnɑ ɩ́ sɛɛsɩ ɩsǝlɛ tǝkɑŋkɑŋ nɑ Ɩsɔ sǝlǝmʋɣʋ. Nɑ hɑŋɑɣɑ lɩɩkɑɣɑ ɩsɩɩ cɑlǝm nɑ kɑ́ tosiɣi ɑtɛ.]
45 Yesu tɛmɑ Ɩsɔ sǝlǝmʋɣʋ, ɩlɛnɑ ɩ́ kʋlɩ nɑ ɩ́ mǝlɩ ɩ ɩfɑlɑɑ cɔlɔ nɑ ɩ́ mɑɣɑnɑ ɩsǝnyǝŋlɛ kpɑ pɛlɛ nɑ hɑlɩ pɑ́ cɑŋ pɑ too.
46 Ḿpʋ́ɣʋ́ ɩ pɔɔsɑ-wɛ sɩ: Suweɣelɛ ɩ́ tookuɣu mpʋ tɔ? Ɩ́ kʋlɩ, ɩ́ sǝlǝmǝɣɩ Ɩsɔ, pǝ tɑɑ kɔɔ nɑ ɩ́ hoti mɑɣɑsʋɣʋ tɑɑ.
Yesu kpɑʋ
(Mɑtiyee 26:47-56; Mɑlǝkɩ 14:43-50; Yohɑɑnɩ 18:3-11)
47 Yesu tɔŋnɑ ḿpʋ́ɣʋ́ yɔɣɔtʋɣʋ, ɩlɛ yǝlɑɑ sɑmɑɑ tɑpɑɣɑlɛ, nɑ ɩfɑlɑɑ nɑɑnʋwɑ nɑ nɑɑlɛ tɑɑ lɛlʋ Yutɑɑsɩ tɛɛnɑ-wɛɣɛ nɔɣɔ nɑ ɩ́ kɔnɑ-wɛ. Ḿpʋ́ɣʋ́ ɩ kpǝtǝnɑ Yesu sɩ ɩ kpɛkǝɣǝnɑ-ɩ.
48 Tǝnɑɣɑ Yesu pɔɔsɑ-ɩ sɩ: Yutɑɑsɩ, kpɛkǝnɑʋ kɛ n hʋlǝɣǝnɑ kolontunɑɑ sɩ pɑ́ kpɑ Yʋlʋ Pǝyɑɣɑ mɑ́ nɑ?
49 Mpɑ pɑ wɛ Yesu tɔɔ tɔ, pɑ nɑ́ mpi pǝ cɑɑ lɑpʋ tɔ, ɩlɛnɑ pɑ́ pɔɔsɩ-ɩ sɩ: Tɑcɑɑ tǝ yoonɑ tɑ lɑɣɑlɛɛ kɛ?
50 Tǝnɑɣɑ Yesu tɔɔ nyǝ́mɑ mpɛ pɑ tɑɑ lɛlʋ lomɑ kɔtʋlʋ sɔsɔ tǝmlɛ tʋ ntɔɣɔŋ ŋkpɑŋʋɣʋ nɑ ɩ́ kɔɔlɩ tǝfeŋ.
51 Ɩlɛnɑ Yesu tɔ-wɛ sɩ: Ɩ́ yele mpʋ pǝ mɑɣɑnɑɑ.
Ḿpʋ́ɣʋ́ Yesu tokinɑ yʋlʋ ɩnɩ ɩ ŋkpɑŋʋɣʋ, ɩlɛnɑ kʋ mǝlɩ ɩsɩɩ kɩɩ wɛʋ tɔ.
52 Pǝ wɑɑlɩ kɛ́ Yesu pɔɔsɑ kɔtǝlɑɑ sɔsɑɑ nɑ Ɩsɔ tǝsɛɛlɛ tɑŋlɑɑ tɑɑ sɔsɑɑ nɑ Yutɑ nyǝ́mɑ tɑɑ nyʋɣʋ nyǝ́mɑ nyʋɣʋ nyǝ́mɑ mpɑ pɑ kɔmɑ-ɩ kpɑʋ tɔ sɩ: Ɩ́ kɔŋ nɑ ɩ́ nɔkɩ nɑ ɩ́ kpɑɣɑ lɑɣɑlɛɛ nɑ kpɑtǝŋ tɔ, mɑɣɑ ŋmɩɩlʋ ɩsɑɣɑʋ kɛ?
53 Mɑ́ nɑ-mɛ tɩɩ wɛnnɑ Ɩsɔ tǝsɛɛlɛ tɑɑ kɛ́ kʋyɛɛŋ tǝnɑ nɑ ɩ́ tɑ́ pɛɛkɩ sɩ ɩ́ kpɑ-m. Amɑ mǝ nɑ ɑhoo sǝkpɛtʋɣʋ tɛɛ ɑsɑɣɑɑ sɔsɑɑ mǝ wɑɑtʋ tɑpǝnɑ sɑŋɑ.
Piyɛɛ kpɛɛsʋɣʋ
(Mɑtiyee 26:57-58,69-75; Mɑlǝkɩ 14:53-54,66-72; Yohɑɑnɩ 18:12-18,25-27)
54 Ḿpʋ́ɣʋ́ pɑ kpɑ Yesu nɑ pɑ́ ponɑ kɔtʋlʋ sɔsɔ tǝyɑɣɑ, nɑ Piyɛɛ tǝŋɑɣɑ ɩ wɑɑlɩ kɛ́ tɑ́ɑ́lǝ́ḿ tɔɔ.
55 Pɑɑ tɑɣɑnɑ kɔkɔ kɛ tɑɣɑ hɛkʋ tɑɑ. Tǝnɑɣɑ Piyɛɛ polɑɑ nɑ ɩ́ sɔtɩ mpɑ pɑ pɑmnɑ kɔkɔ ŋkɛ tɔ pɑ hɛkʋ tɑɑ.
56 Tǝmlɛ tʋ ɑlʋnyǝŋ nɔɣɔlʋ ɩ nɑ-ɩ kɔkɔ kpeeŋɑ nɑ ɩ́ cɑɣɑɑ, ɩlɛnɑ ɩ́ nyǝnɩ-ɩ tǝpǝŋŋ nɑ ɩ́ tɔ sɩ: Ɩ́ nɑ ɑpɑlʋ ɩnɛɣɛ.
57 Tǝnɑɣɑ Piyɛɛ kpɛɛsɑɑ sɩ: Alʋ nyɑ́, ɑɑɩ, mɑ tɑ nyǝmɩ-ɩ yoo.
58 Pǝ lɑpɑ lɑɣɑsɑɣɑ kɛ pǝcɔ, ɩlɛnɑ nɔɣɔlʋ tɔtɔ nɑ́ɑ́ nɑ Piyɛɛ, nɑ ɩ́ tɔ sɩ: Pɑ tɑɑ wɛɣɛlɛ nɑ nyɑ́ tɔtɔ. Amɑ Piyɛɛ cɔ ɑpɑlʋ ɩnɩ sɩ: Pǝ tɑɣɑ mɑ.
59 Pǝ tɑsɑ lɑɣɑsɑɣɑ kɛ lɑpʋ, ɩlɛnɑ nɔɣɔlʋ tɔtɔ nɑ́ɑ́ sɛɛsɩ ɩsǝlɛ sɩ: Tɑmpɑnɑ tɔɔ, ɑpɑlʋ ɩnɛ nɑ Yesu kɛ́. Pǝ tɑɣɑ pʋlʋ tɔɔ, ɩ kɛ́ Kɑlilee tʋ kɛ́.
60 Tǝnɑɣɑ Piyɛɛ cɔwɑ sɩ: Nti ɑpɑlʋ nyɑ́ n yɔɣɔtǝɣɩ tɔ mɑ tɑ nyɩ-tɩ.
Ɩ nɔɣɔ tɑ tɩɩ tiitɑ ɑtɛ ɩlɛ kɑmpɑɑʋ koo kpɑkpɑɑ ɩnǝɣǝlɛ.
61 Tǝnɑɣɑ Tɑcɑɑ pǝsɑɑ nɑ ɩ́ yɑɣɑ Piyɛɛ kɛ ɩsǝlɛ. Ɩlɛnɑ Piyɛɛ tɔɔsɩ nti Tɑcɑɑ kɑ yɔɣɔtɑ-ɩ tɔ tǝ tɔɔ sɩ: Mpi pɩɩ tɑkɩ kɑmpɑɑʋ koou kɛ sɑŋɑ tɔ n tɛmɑ tɔm toosoɣo kpɛɛsʋɣʋ sɩ n tɑ nyɩ-m kɛ́ n tɑ nyɩ-m.
62 Ḿpʋ́ɣʋ́ ɩ tukɑɑ nɑ ɩ́ lɩɩ, ɩlɛnɑ ɩ́ wii ɩsɩɩ ɩ sǝkɩ ɩ sǝkɩ.
Yesu tʋʋʋ nɑ ɩ mɑpʋ
(Mɑtiyee 26:67-68; Mɑlǝkɩ 14:65)
63 Yǝlɑɑ mpɑ pɑ tɑŋɑ Yesu tɔ, pɑ pɑɑkɑɣɑnɑ-ɩ, nɑ pɑ́ mɑkɩ-ɩ.
64 Pɑ tɑkɑ ɩ ɩsɛntɔɔ kɛ́ nɑ pɑ́ tɔŋɩ-ɩ sɩ: Kpeɣe, ɑwe mɑpǝnɑ-ŋ?
65 Pɑ yɔɣɔtɑ-ɩ tɔmnɑɑ tɔmnɑɑ kʋwǝwɩɩtʋ kɛ pɑɣɑlɛ tɔtɔ.
Yesu ponɑʋ kɛ kotuɣu sɔsɔɔʋ
(Mɑtiyee 26:59-66; Mɑlǝkɩ 14:55-64; Yohɑɑnɩ 18:19-24)
66 Kʋ femɑ, ɩlɛnɑ Yutɑ nyʋɣʋ nyǝ́mɑ nyʋɣʋ nyǝ́mɑ nɑ kɔtǝlɑɑ sɔsɑɑ nɑ Ɩsɔ Tɔm sɛɣɛsǝlɑɑ pɑ́ koti pɑ tǝmɑ. Ḿpʋ́ɣʋ́ pɑ ponɑ Yesu kɛ́ pɑ kotuɣu sɔsɔɔʋ tɑɑ.
67 Nɑ pɑ́ pɔɔsɩ-ɩ sɩ: N kɛ́ Mesii? Cɔ-tʋ nɑ tǝ nɩɩ.
Ḿpʋ́ɣʋ́ Yesu cɔ Yutɑ nyʋɣʋ nyǝ́mɑ sɩ: Mɑ heeliɣi-mɛɣɛ nɑ ɩɩ tisiɣinɑ-m.
68 Ye mɑ pɔɔsɑ-mɛɣɛ kʋpɔɔsʋtʋ nti, ɩɩ cɔɔ-m nɑtǝlɩ.
69 Amɑ pǝ kpɑɣɑʋ pǝnɛntɛ tɔ, Yʋlʋ Pǝyɑɣɑ mɑ́ mɑɑ cɑɣɑ Ɩsɔ toŋ tǝnɑ tʋ kɔŋkɔŋ tɑɑ.
70 Tǝnɑɣɑ Yutɑ nyʋɣʋ nyǝ́mɑ tǝnɑ pǝsǝnɑɑ sɩ: Ye mpʋ n kɛ́ Ɩsɔ Pǝyɑɣɑ ntɔ?
Ḿpʋ́ɣʋ́ Yesu cɔ-wɛ sɩ: Tǝ mɑɣɑmɑɣɑ tǝ lɩɩnnɑ mǝ nɔɔsɩ tɑɑ, mɑ kɛ́ Ɩsɔ Pǝyɑɣɑ kɛ́.
71 Tǝnɑɣɑ Yutɑ nyʋɣʋ nyǝ́mɑ tɔmɑ sɩ: Tǝ lɩɩnɑ ɩ nɔɣɔ nɑ tɑ́ mɑɣɑmɑɣɑ tǝ nɩɩ ɩlɛ, tǝ tɑsǝɣɩ ɑseetɑ nyǝ́mɑ kɛ pɛɛkʋɣʋ sɩ tǝ lepe?