5
Kʋtɔntʋ wɑɑʋ kɛ lɩɩlɛ nɔɣɔ
1 Pǝlɛ pǝ wɑɑlɩ Yutɑ nyǝ́mɑ Ɩsɔ sɛɛʋ ɑcimɑ nɑɑlɩ ɑ tɑlɑɑ, nɑ Yesu polo Yosɑlɛm.
2 Lɩɩlɛ nɑtǝlɩ tǝ wɛ heeŋ nɔnɔɣɔ cɔlɔɣɔ Yosɑlɛm, nɑ ɑkelenɑɑ sɑkɑsɩ tɑkɑ kɑkpɑsɩ sǝŋɑ tǝnɑ. Tǝnɛ ɩnǝɣɩ pɑ yɑɑ sɩ Pɛtɑsɑtɑ kɛ Alɑɑmee nyǝ́mɑ tɔm tɑɑ.
3 Nɑ kʋtɔntʋnɑɑ sɛlǝtɑ lɑŋɑsɩ nsɩ sɩ tɛɛ kɛ́ sɔsɔm. Yʋlʋmɑɑ nɑ kɑɑkɑlɑsɩ, nɑ mpɑ kʋtɔmǝŋ tʋʋlɑɑ tɔ. [Pɑ tɑŋɑ lʋm lɑŋtʋɣʋ.
4 Pǝ tɑɣɑ pʋlʋ, ɩsɔtɑɑ tillu tiikɑɣɑ wɑɑtʋ wɑɑtʋ kɛ lɩɩlɛ tɑɑ, nɑ ɩ́ lɑkɩ nɑ lʋm lɑŋtǝɣɩ. Nɑ wei ɩ́ lɑɑlɑ tiiu kɛ wɑɑtʋ wei lʋm lɑŋtǝɣɩ kpɑkpɑɑ tɔ pǝ wɑɑ-ɩ, pɑɑ ɩ kʋtɔŋ kɛ ŋku.]
5 Apɑlʋ nɔɣɔlʋ ɩ kɑ wɛ tǝnɑ nɑ ɩ hǝntɑ kʋtɔŋ tɔ pɩɩsɩ pǝlefɛɩ nɩɩlɛ kɔlɔ.
6 Yesu nɑ-ɩ nɑ ɩ́ hǝntɑ mpʋ, nɑ ɩ nyǝmɑ́ sɩ ɩ tɑɑŋɑ tǝnɑɣɑ sɔsɔm, ɩlɛnɑ ɩ́ pɔɔsɩ-ɩ sɩ: N cɑɑ pǝ wɑɑ-ŋ kɛ?
7 Ḿpʋ́ɣʋ́ kʋtɔntʋ cɔ Yesu sɩ: Mɑ cɛ, mɑ fɛɩnɑ nɔɣɔlʋ sɩ ɩ́ tisi-m lʋm tɑɑ kɛ́ wɑɑtʋ wei pǝ lɑŋtǝɣɩ tɔ. Nɑ mɑ́ polɑɑ sɩ mɑ tiiki, nɔɣɔlʋ nɑ́ɑ́ lɑɑlɩ-m.
8 Ḿpʋ́ɣʋ́ Yesu heelɑ-ɩ sɩ: Kʋlɩ nɑ ń kpɑɣɑ nyɑ́ kʋhǝntʋɣʋ nɑ ń tɔ.
9 Tǝnɑɣɑ pǝ wɑɑ kʋtɔntʋ kɛ kpɑkpɑɑ, nɑ ɩ́ kɛlɩ ɩ kʋhǝntʋɣʋ nɑ ɩ́ tɔŋ. Pǝ pɑmnɑ kʋyɑkʋ kʋhɛɛsʋɣʋ wule.
10 Ḿpʋ́ɣʋ́ Yutɑ nyǝ́mɑ tɔmɑ wei pǝ wɑɑ mpʋ tɔ sɩ: Sɑŋɑ kʋyɑkʋ kʋhɛɛsʋɣʋ kɛ́, pǝ fɛɩ sɩ ń sǝɣǝlɩ nyɑ́ kʋhǝntʋɣʋ kɛ mpʋ.
11 Amɑ kʋtɔntʋ nɑ cɔ-wɛ sɩ: Wei ɩ wɑɑsɑ-m tɔ ɩnɩ ɩ heelinɑ-m sɩ mɑ́ kɛlɩ mɑ kʋhǝntʋɣʋ nɑ mɑ́ tɔ.
12 Ḿpʋ́ɣʋ́ Yutɑ nyǝ́mɑ cɔ kʋtɔntʋ sɩ: Aweɣe pʋntʋ nɑ ɩ́ heelɑ-ŋ sɩ ń kɛlɩ nyɑ́ kʋhǝntʋɣʋ nɑ ń tɔ?
13 Amɑ wei pǝ wɑɑwɑ tɔ ɩ tɑ nyɩ Yesu. Pǝ tɑɣɑ pʋlʋ, ɩ́lɛ́ ɩ kɑ sɑɑlɑ sɑmɑɑ wei ɩ suwɑ tǝnɑ tɔ ɩ tɑɑ.
14 Pǝlɛ pǝ wɑɑlɩ Yesu nɑ́ ɑpɑlʋ ɩnǝɣɩ Ɩsɔ tǝsɛɛlɛ tɑɑ nɑ ɩ́ heeli-ɩ sɩ: Nyǝnɩ, pǝnɛntɛ pǝ wɑɑ-ŋ ɩsǝntɔ tɔ, tɑɑ tɑsɑ ɩsɑɣɑtʋ lɑpʋ tɔtɔ. Pǝ́cɔ́ pǝ tɑɑ kɔɔ nɑ ŋku kʋlɛ kʋ kǝlɑ mpʋ tɔ kʋ mɑɣɑnɑ-ŋ.
15 Tǝnɑɣɑ ɑpɑlʋ ɩnɩ ɩ polɑɑ nɑ ɩ́ heeli Yutɑ nyǝ́mɑ sɩ: Yesu wɑɑsǝnɑ-m.
16 Pǝ tɔɔ kɛ́ Yutɑ nyǝ́mɑ sʋʋ Yesu kɛ́ kʋnyɔŋ tʋɣʋ kɛ ɩ lɑpʋ ḿpʋ́ɣʋ́ kʋyɑkʋ kʋhɛɛsʋɣʋ wule tɔ pǝ tɔɔ.
17 Mpʋ pǝ yelinɑ nɑ Yesu yɔɣɔtɩ sɩ: Mɑ Cɑɑ nɑ́ tɔŋɑ tǝmlɛ lɑpʋ kɛ tɑm kɛ́. Pǝ tɔɔ kɛ́ mɑ tɔtɔ mɑ tɔŋnɑ lɑpʋ.
18 Tɔm tǝnɛ tǝ mɑɣɑmɑɣɑ tǝ tɔɔ Yutɑ nyǝ́mɑ mʋ sɔɣɔnɑ kɛ teu sɩ pɑ lǝsǝɣɩ Yesu weesuɣu. Sɩ pǝ tɑɣɑ kʋyɑkʋ kʋhɛɛsʋɣʋ tike kɛ ɩ wɑkǝlɑɑ, pǝ kpɛnnɑ ɩsǝnɑ ɩ kɛɛsɑ ɩ tɩ nɑ Ɩsɔ nɑ ɩ́ yɑɑ-ɩ ɩ mɑɣɑmɑɣɑ ɩ Cɑɑ tɔ pǝ tɔɔ tɔtɔ.
Ɩsɔ Pǝyɑɣɑ pǝsʋɣʋ kɛ yǝlɑɑ tɔɔ
19 Ḿpʋ́ɣʋ́ Yesu tɔmɑ-wɛ sɩ: Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ. Pǝyɑɣɑ mɑ mɑ kɑɑ lu nɑtǝlɩ nɑ mɑ́ lɑ. Amɑ nti mɑ Cɑɑ tɔŋɑ lɑpʋ nɑ mɑ́ nɑɑkɩ tɔ ntǝɣɩ mɑ tǝŋǝɣɩ. Mɑ Cɑɑ lɑkɩ pǝ tǝnɑ mpi tɔ, Pǝyɑɣɑ mɑ mɑ lɑkɩ-wɩ tɔtɔɣɔ.
20 Pǝ tɑɣɑ pʋlʋ, mɑ Cɑɑ sɔɔlɑ-m kɛ́, nɑ ɩ́ hʋ́lɩ́-m pǝ tǝnɑ mpi ɩ lɑkɩ tɔ. Ɩ kɑ́ hʋ́lɩ́-m tǝmɑ sɔsɔɔnɑ nnɑ ɑ kǝlɑ ɑnɛ tɔ sɩ mɑ́ lɑ, nɑ pɩɩ lɑ-mɛɣɛ hɑ.
21 Ɩsɩɩ mɑ Cɑɑ feesiɣi sǝtɑɑ nɑ ɩ́ mǝnnɑ-wɛɣɛ weesuɣu nyǝ́mɑ hɛkʋ tɔ, mpʋ ɩnɩ tɔtɔɣɔ Pǝyɑɣɑ mɑ́ mɑ tʋɣɩ weesuɣu kɛ mpɑ mɑ nɔkɑɑ tɔ.
22 Tǝlɛ tǝ pɑɑsi mɑ Cɑɑ ɩɩ hʋʋkǝnɑ nɔɣɔlʋ. Amɑ ɩ tʋ hʋʋlɛ tǝnɑɣɑ Pǝyɑɣɑ mɑ mɑ niŋ tɑɑ.
23 Ɩlɛnɑ pɑ tǝnɑ pɑ se-m ɩsɩɩ pɑ seekuɣu mɑ Cɑɑ tɔ. Yʋlʋ ɩ́ tɑ se Pǝyɑɣɑ mɑ, ɩ kɑɑ pǝsɩ nɑ ɩ́ se mɑ Cɑɑ wei ɩ tilɑ-m tɔ.
24 Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ, ye wei ɩ nɩɩ mɑ tɔm nɑ ɩ́ tɛ ɩ tɑɑ nɑ wei ɩ tilɑ-m tɔ, ɩ tɛmɑ weesuɣu ŋku kɩɩ tɛŋ tɔɣɔ hikuɣu, pɑ kɑɑ hʋʋnɑ-ɩ. Amɑ ɩ tɛmɑ weesuɣu tʋ kɛ pǝsʋɣʋ kɛ́.
25 Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, pǝ wɛɛ pɩɩ kɔɔ, hɑlɩ pǝ tɩɩ tɛmɑ kɔntɛ te. Sǝtɑɑ kɑ́ nɩɩ Ɩsɔ Pǝyɑɣɑ mɑ́ mɑ nɔɣɔ, mpɑ pɑɑ nɩɩ-kɛ tɔ, pɑɑ fe nɑ pɑ́ kʋlǝnɑ pɑ ɩsɛ.
26 Ɩsɩɩ Tɑcɑɑ Ɩsɔ wɛnɑ weesuɣu kɛ ɩ tɑɑ tɔ, mpʋ tɔtɔɣɔ ɩ yelɑɑ sɩ Pǝyɑɣɑ mɑ mɑ́ wɛɛnɑ weesuɣu kɛ mɑ tɑɑ.
27 Mɑ kɛ́ Yʋlʋ Pǝyɑɣɑ tɔɣɔ ɩ hɑ-m mpɑɑʋ sɩ mɑ́ hʋʋnɑ yǝlɑɑ kɛ tɔm.
28 Ɩlɛ pǝ́ tɑɑ lɑ-mɛɣɛ hɑ. Mpi tɔ pɩɩ kɔɔ nɑ pɑ tǝnɑ mpɑ pɑ wɛ pǝlɑɑŋ tɑɑ tɔ pɑ́ nɩɩ mɑ nɔɣɔ,
29 nɑ pɑ́ lɩɩ ɩ tɑɑ. Mpɑ pɑ lɑpɑ kʋpɑntʋ tɔ pɑɑ fe sɩ pɑ́ wɛɛ tɑm tɔɔ. Mpɑ pɛlɛ pɑ lɑpɑ ɩsɑɣɑtʋ tɔ, pɑɑ fe sɩ pɑ́ hʋʋnɑ-wɛ nɑ pɑ́ tʋ-wɛɣɛ sɑlǝkɑ.
Mpi pǝ hʋ́lǝ́ɣɩ́ Yesu tɑmpɑnɑ tɔ
30 Mɑɑ pǝsǝɣɩ nɑ mɑ́ lu tǝlǝɣɩ mɑ mɑɣɑmɑɣɑ. Amɑ ɩsɩɩ Ɩsɔ kɛɛsǝɣɩ-m tɔ, ḿpʋ́ɣʋ́ mɑ hʋʋkǝnɑ, nɑ mɑ hʋʋlɛ tewɑ. Mpi tɔ, pǝ tɑɣɑ mɑ mɑɣɑmɑɣɑ mɑ luɣu nyǝntʋ kɛ mɑ pɛɛkǝɣɩ lɑpʋ. Amɑ wei ɩ tilɑ-m tɔ ɩ luɣu nyǝntʋ kɛ́.
31 Ye mɑ yɔɣɔtǝɣɩ mɑ tɩ tɔm, nɔɣɔlʋ kɑɑ sɑ tɑmpɑnɑ wenɑ mɑɑ hʋ́lɩ́ tɔ.
32 Amɑ nɔɣɔlʋ wɛnnɑ nɑ ɩ́lɛ́ ɩ hʋ́lǝ́ɣɩ́ sɩ mɑ kɛ́ tɑmpɑnɑ tʋ. Nɑ mɑ nyǝmɑ́ sɩ nti ɩ yɔɣɔtǝɣɩ mɑ tɔɔ tɔ tǝ wɛ tɑmpɑnɑ.
33 Hɑlɩ mǝ mɑɣɑmɑɣɑ ɩ́ tilɑ mǝ tillɑɑ kɛ Yohɑɑnɩ kiŋ nɑ ɩ́lɛ́ ɩ hʋlɑ-mɛɣɛ tɑmpɑnɑ.
34 Ye mɑ, pǝ tɑɣɑ ɩsɩɩ mɑ nyɩɩlɑɑ sɩ yʋlʋ nɔɣɔlʋ ɩ́ hʋ́lɩ́ mɑ tɑmpɑnɑ. Amɑ sɩ pǝ sǝnɑ-mɛ nɑ pǝ yɑ mǝ nyʋɣʋ tɔɔ kɛ́ mɑ yɔɣɔtǝɣɩ mpʋ.
35 Yohɑɑnɩ nɑɑ wɛ kɛ́ ɩsɩɩ fǝtǝlɑ wei ɩ mʋɣɩ nɑ pǝ nɑɑkɩ tɔ. Ɩ́ tisɑɑ nɑ ɩ́ yɔɔlǝnɑ fǝtǝlɑ ɩnɩ ɩ nɑʋ kɛ pǝcɔ.
36 Amɑ mɑ wɛnɑ mpi pǝ hʋ́lǝ́ɣɩ́ mɑ tɑmpɑnɑ nɑ pǝ kǝlɩ tǝ tǝnɑ nti Yohɑɑnɩ yɔɣɔtɑ mɑ tɔɔ tɔ. Tǝmɑ nnɑ ɩnɩ mɑ Cɑɑ hʋlɑ-m sɩ mɑ́ lɑ nɑ mɑ tɔŋnɑ ɑ lɑpʋ kɛ ɩsǝntɔ tɔ, ɑnɩ ɑ hʋlǝɣǝnɑ mɑ tɑmpɑnɑ sɩ mɑ Cɑɑ tilinɑ-m.
37 Mɑ Cɑɑ wei ɩ tilɑ-m tɔ ɩ hʋ́lǝ́ɣɩ́ mɑ tɑmpɑnɑ tɔtɔ. Mɛ ɩ́ tɑ nɩɩ ɩ nɔɣɔ kɛ pɑɑ tɔm kʋlʋm. Pǝ́cɔ́ ɩ́ tɑ loosi ɩ ɩsɛntɑɑ kɛ́ pɑɑ tɔm kʋlʋm tɔtɔ.
38 Pǝyele ɩɩ sɑŋ ɩ tɔm mʋɣʋ sɩ tǝ́ cɑɣɑ mǝ tɑɑ kɛ́ pɑɑ pǝcɔ. Ɩlɛ ɩɩ tɛŋ mǝ tɑɑ nɑ wei Ɩsɔ tilɑɑ tɔ, pǝ tɔɔ kɛ́ pǝ wɛ mpʋ.
39 Ɩ́ pɛɛkǝɣɩ Ɩsɔ Tɔm tɑkǝlɑsɩ tɑɑ tǝcututu, nɑ ɩ́ tɛɛlǝɣɩ sɩ pǝ tɑɑ kɛ́ ɩ́ kɑ́ hikinɑ weesuɣu ŋku kɩɩ tɛŋ tɔ. Anɩ tɑ́ tɑkǝlɑsɩ kʋlʋmɑsɩ nsɩ sɩ yɔɣɔtǝɣǝnɑ mɑ tɔm.
40 Pǝ nɑ pǝ mpʋ tɔ, ɩɩ sɑŋ sɩ ɩ́ kɔɔ mɑ kiŋ nɑ ɩ́ hiki weesuɣu kʋpɑŋkʋ.
41 Pǝ tɑɣɑ yǝlɑɑ ɩsɑntɛ kɛ mɑ pɛɛkǝɣɩ.
42 Amɑ mɑ nyǝmɑ-mɛ, mɑ nyǝmɑ́ sɩ ɩɩ cɑɑ Ɩsɔ.
43 Mɑ Cɑɑ kɔntɛ kɛ mɑ kɔmɑ nɑ mɩɩ sɑŋ mɑ mʋɣʋ. Amɑ ye nɔɣɔlʋ nɑ́ lɩɩ yem nɑ ɩ́ kɔɔ, ɩ́ mʋ ɩ́lɛ́ tǝkpɑ.
44 Mɛ mǝ sɔɔlɑ mǝ tǝmɑ ɩsɑntɛ kɛ́, ɩɩ pɛɛkǝɣɩ Ɩsɔ wei ɩ tike ntɛ́ Ɩsɔ tɔ ɩ nyǝntɛ. Ɩlɛ ɩsǝnɑɣɑ ɩ́ kɑ́ lɑ nɑ ɩ́ mʋ mɑ tɔm.
45 Ɩ́ tɑɑ hʋʋ sɩ mɑɑ polo mɑ́ kuli mǝ wɑɑlɩ kɛ́ Ɩsɔ ɩsɛntɑɑ. Amɑ Moisi wei ɩ́ tɛɛlǝɣɩ tɔ ɩnɩ ɩ kɑ́ kulinɑ mǝ wɑɑlɩ.
46 Ye ɩ́ kɑ mʋwɑ Moisi tɔm nɑ tɑmpɑm, ɩsǝntɔ tɔ ɩ́ kɑ mʋ mɑ nyǝntʋ tɔtɔ. Pǝ tɑɣɑ pʋlʋ, mɑ tɔm kɛ ɩ́lɛ́ ɩ ŋmɑɑwɑ.
47 Ɩ́ tɑ tisi nɑ ɩ́ mʋ nti Moisi ŋmɑɑwɑ tɔ, ɩlɛ ɩsǝnɑɣɑ ɩ́ kɑ́ tisi nɑ ɩ́ tʋnɑ mɑ tɔm nti mɑ heeliɣi-mɛ tɔ.