20
Sofari anaamba uyi una maripho
1 Phahi Sofari kula Naama wajibu achiamba,
2 “Maazo gangu gananihenda nijibu,
kpwa sababu nina more.
3 Nasikira kudemurirwa kunako niusira nguma yangu,
na kuelewa kpwangu kunanihenda nijibu.
4 Vino ukale kumanya gano kula kare,
hangu mwanadamu aikpwe duniani,
5 kukala chitseko cha atu ayi ni cha muda mfupi,
na kuhererwa kpwa asiomuogopha Mlungu ni kpwa muda tu.
6 Dzagbwe ngulu za asiyemuogopha Mlungu zikafika hadi mlunguni,
na chitswache chikafika mainguni,
7 iye andaangamika hata kare na kare dza mavige gaangamikavyo,
hara ariomuona andauza, ‘Akuphi?’
8 Andayalwa dza ndoso na kandaonewa tsona,
andafutika dza ruwiya ya usiku.
9 Iye ariyemuona, kandamuona tsona,
na pho phatuphe taphandamtarajiya tsona.
10 Anae andalonda asaidiywe ni achiya,
na mikonoye indauyiza utajiriwe.
11 Mifuphaye i tele nguvu za uhanani,
ela indalazwa photsi mtsangani phamwenga naye.
12 Dzagbwe uyi u mtswano mwakpwe kanwani,
dzagbwe anaufwitsa tsini ya lilimire,
13 dzagbwe kaweza kuurichira uphiye,
ela anauzuwiya mo mwakpwe kanwani,
14 chakuryache chindagaluka utsungu mo mwakpwe ndanini
chindakala dza sumu ya nyoka mo ndani.
15 Iye nkuiya utajiri wa atu, naye andauhaphika,
Mlungu andamuhenda auhaphike.
16 Andafyondza sumu ya nyoka,
andafwa kpwa kuondzwa ni bafwe.
17 Iye kandaishi kufwahirwa ni vidzuho,
myuho ichiyoodzala asali na maziya.
18 Cho arichochiphaha kpwa jasho
andachiuyiza bila ya kuchirya,
na yo fwaida ya bisharaye
taindamuhenda akale na raha.
19 Mana akaonera achiya na kuaricha bila chitu,
akahala kpwa nguvu nyumba ambazo kazidzengere.
20 Kpwa kukala urohowe tauna mwisho,
kandativya chochosi ambacho chindamuhenda akale na raha.
21 Bada ya kurya, taphana ndichosala,
kpwa hivyo kuongokerwakpwe takundadumu.
22 Wakati wa kukala na vinji andaphahwa ni mashaka,
na shida za chila aina zindamphaha.
23 Phapho ndiphomvuna,
Mlungu andamtiya adabu,
na tsukizize zimmwagikire dza mvula.
24 Iye andachimbira silaha ya chuma,
andafuriswa muvwi urio na chigumba cha shaba.
25 Muvwi undafutwa kula mwakpwe mwirini,
chigumba chakungʼala chindamuhumbula chihumbo utsungu,
naye andainjirwa ni wuoga.
26 Chilungulungu cha jiza chinagodzera akibaze,
moho ambao tauasirwe ni mwanadamu undamuocha,
na cho ndichokala chikasala mo mwakpwe hemani chindaphya.
27 Ko mlunguni kundaika wazi uyiwe,
na dunia indalavya ushuhuda chinyumeche.
28 Mali za mwakpwe nyumbani zindatsukulwa ni mafuriko,
zindahalwa ni madzi pho siku ya tsukizi za Mlungu.
29 Uhu ndio mtalo wa mutu mui,
urisi arioikirwa ni Mlungu.”