7
At Isurero nagirewa 144,000
1 Amba sia ne bet ine inana manega yawan, anea degede piup ginewa gapan ise use ase ma yonane. Piup, puiman gapan amba oma ugup ugup berip den taik da ya tau aepen men wataniwanum.
2 Anea dawa God wandiniwa yatup mega paua ame ware wam dotouini arewa gapan ma oniwandin, ne yawan. Amba anea degedeawa, mu God amun muneni gapan piup puiman wa koeragam mumapen amone, amba anea dawa mu inamup uma
3 anega wan, “God nao mega taine nagire yatup mega paua namu bonap batam mumait amba piup ge puiman amba oma den ta koeragam mumai,” ap anega wan.
4 Yatup paua batam mumane nagirewa arugataet 144,000 paua muga wadianegene ne anun. Mu at Isurero nagirewa dugup aonagaet nani yamu dere daiton daiton gapan yatup paua batam mumane.
5 Dugup yaua Diuda gapan paua batamene
nagirewa arugataet 12,000.
Dugup yaua Ruben gapan paua batamene
nagirewa arugataet 12,000.
Dugup yaua Gat gapan paua batamene
nagirewa arugataet 12,000.
6 Dugup yaua Asa gapan paua batamene
nagirewa arugataet 12,000.
Dugup yaua Naptali gapan paua batamene
nagirewa arugataet 12,000.
Dugup yaua Manasa gapan paua batamene
nagirewa arugataet 12,000.
7 Dugup yaua Simion gapan paua batamene
nagirewa arugataet 12,000.
Dugup yaua Livai gapan paua batamene
nagirewa arugataet 12,000.
Dugup yaua Isaka gapan paua batamene
nagirewa arugataet 12,000.
8 Dugup yaua Sebulon gapan paua batamene
nagirewa arugataet 12,000.
Dugup yaua Diosep gapan paua batamene
nagirewa arugataet 12,000.
Dugup yaua Bendiman gapan paua batamene
nagirewa arugataet 12,000.
God yatup mega paua ap anega batam mumane.
God waenapan mega aruga arugataet
9 Amba waenapan aruga arugataet da miniwa batnak mumeta bet ine inana gapan ne yawamon. Mu dugup ge nop ge at ugu ugupe nagirewa God watat mega man sip otua dere namumup yonan. Wanup nononga pomponu enan amba kitat baewa nanip tamon, God inap gaun wapen menan.
10 Nop uma anega wane, “God nugawa watat gagap wandiniwa man sip otua dere inak ewakewa nuninewa,” ap anega wan.
11 God watat megawa amba ona kasiga mena manao taini da bayabayapa amba kwayup taine nagirewa yaumakap wanumune amba anea uruga ikukuk iragi enpanamon. Amba watat ame namup mu iravi nikapu enun God wa taragasen.
12 Mu wane,
Ame umap!
Wam wam pot pot wa taragat, oya oya, nop dima,
gaun nuga, ayamat, aro amun ame iragi God wariwandan.
Ame umap!
13 Kwayup taine apane da singui anega wayawanegen, “Waenapan wanup nononga pomponu enane mu ian ambe at ansena nagirewa?”
14 Ne gare wan, “Ayop negawa, ne oare. Ge asigigap di menan ge wa.” Me sia anega wan, “Itan bagu sisi piup taueni wamewa gapan mu wanumone. Koewa muga wanup pompunu mini man sip otua deniwa gapan bigi waran endi mame pomponu tan.
15 Ap menan mu endi God watat mega namup wanum amun. God Paewa gwanap mum wam pot pot wat agoat wanum. Watat gagap wandiniwa apanewa mu tantan muga taini apanewa.
16 Menan enup da sia ya aramota amba megamu da sia ya pakaraeta, amba wam ananewa da sia ya aramota gaup amun da ya doramota.
17 Iwa man sip otua watat yaumakap yonini sip kwayup taini mini mu kwayup tamota. Menan me naumo kaum urewa tanam amo napi gapan yaibobot wanumoin. God yamamu dogewa uruga wat museta.”