5
Ok viri viri wa panameniwa
1 Watat aigap wandiniwa naniwa nutup gapan ok da sean viri viri warane ame ware wanden, ame ne bet inan yawan. Ok ame yamu yamu sen inamat nani yamu dere batamen.
2 Anea amunu dena da yawana amba me nop uma singui anega wan, “Apan kakaewa ansena da inamat nani yamu dere wagegetaveta ok viri viri warane wat veseta?”
3 Go kiman gapan amba piup aigap den yop tan, ok viri viri warane ame wat vese batnage yavepi apane da ya yaven.
4 Apan kakae iragena da ok viri viri warane ame wat vese batnage yavepi apane da ya yaveni menan ne irip baware wan.
5 Irip waingina waenapan kwayup taine apane da inanap anega wan, “Irip ae ve. Yao. Watageta apane Devit naewa dugup yaua Diuda ayop apanewa da koewa iravi garao mumen. Me ok viri viri warane inamat nani yamu dere wagegetavepen menan me di wat veseta,” ap anega wan.
Man sip otua noa
6 Amba God man sip mega otua Iesu, kasiga mena manao taini da bayabayapa yaumakap watat mega gapan yonen amba waenapan kwayup taine nagirewa enpanane ne yawan. Man sip otua ameme waenapan tone boeni guine wandia. I donewa nani yamu dere amba nani yamu dere yamewa ne den yawan. Yamewa ameme God guewa mega nani yamu dere watu enamon piup at at iragi amone.
7 Man sip otua ae ok viri viri warane ame watat gagap wandiniwa apanewa naniwa nutup gapan wareni ame waseasen.
8 Waseaseni kasigawa mena manao taini da bayabayapa amba waenapan kwayup taine nagire apane daiton apan naniwa degede (24) man sip otua namup nikapu enun. Mu daiton daiton, sinao pepetawa mini nanip tambun sip gwayayame yananagaet den nanip tambun. Sip gwanap iu irane daginewa ame God waenapan megawa God inap mup muga wainewa.
9 Mu wak ewakewa Iesu inap anega wan,
Ge kakae iragen, menan ok viri viri warane,
inamat batamene di wagegetao.
Iwa waenapan togene bogitaana denip gega viseni menan,
God at piup waenapan, dugup ge nop ge at ugu ugupe nagirewa den,
koewa muga garewa wat musen.
10 Waenapan ameme God pirisi mega nagirewa diamoan menan,
mu God navewa taine waenapan kwayup taiwanumune,
amba piup ayop tata aroewa munaan.
Mu piup gapan ayop tain.
Wak ap anega waiwanumun.
11 Amba ne Dion yangut sia tana watat yaumakap kasiga mena manao taini da bayabayapa waenapan kwayup taine nagire den anea aru arugataet da miniwa batnak mumeta ikukuk enpanamon.
12 Mu wak uma anega waiwanumun,
Man sip otua waenapan tone boeni me kakae iragen.
Aro amun anut puraput iravi wariwandapen.
Namup yonat viriwa tainampen, yaua ao warinampen,
amba wa atonasinampen.
Anea ap anega wan.
13 Waenapan iravi, man tap amba dim dim iragi piupawa kimaniwa piup gauarapewa, puimaniwa den iravi wak anega wane ne anun,
Watat gagap wandiniwa man sip otua den.
Wam wam pot pot namup yonat viriwa tainampen,
yaua ao warinampen amba aro amun wariwanumampen,
usenagaet wande aiwandata.
14 Iragi ap wane kasiga mena manao taini da bayabayapa gare anega wan, “Ame umap.” Wane boge waenapan kwayup taine nagirewa nikapu enun wa taragasen.