2
Yesu bhɔ ‑kɔ ‑dhiang 'ö Dhukö ‑ya zë
(Matiö 1,18-25)
1 ‑A "tʋ̈ng do bha ꞊në‑ 'gü 'yö "sɛkɔɔnmɛ 'kpii‑ 'ö gun Wlɔmö ‑sɛ ‑gɔ "dhiʋ̈ 'wo gun‑ ‑dhɛ sië Sezaa Wogisi bha 'ö mɛ bɔ ‑a ‑bha "sɛ ‑ta ‑dhɛ ꞊gban "pɛpɛ 'gü kö ‑wo mɛ ꞊gban dhʋng.
2 Mɛ dhʋng ‑kɔ ‑blɛɛsü 'ö "dhʋ̈ bha 'ö ‑kë kö 'mɛ 'ö ‑gblüdë bha‑ ‑kɔdhiʋ̈mɛ 'ka Siidhi ‑sɛ 'gü ‑wa ‑dhɛ Kidhinisö.
3 'Yö mɛ ꞊gban "pɛpɛ 'wo ‑ya 'dho ‑sü ‑bha wo 'kpɔpö ‑nu 'gü kö ‑wo wo dhʋng mü.
4 'Ö gun "dhʋ̈ kö Zosɛfu ‑yö ‑ya ‑sü 'ka 'pödhɛ 'wo‑ ‑dhɛ Nazadhɛtö 'ö Gadhidhe ‑sɛ 'gü bha‑ 'gü. ꞊Dhɛ 'ö ꞊yaa‑ ma ꞊dhɛ mɛ ꞊gban ‑wo 'dho sië wo 'kpɔpö ‑nu 'gü, 'yö ꞊wlü 'pö 'yö dho Betedhɛmö, ‑gblüdë Davi ‑bha 'pödhɛ 'ö Zude ‑sɛ 'gü bha‑ 'gü; ‑a ‑gɛn ‑mü ꞊dhɛ ‑yö go Davi ‑gɔ 'kɔɔdhö, Davi suu 'gü ‑në ‑mü ‑a 'ka.
5 ‑Yö ‑dho "dhʋ̈ kö 'ö waa‑ Madhi wo dhʋng mü, ‑a ‑gɛn ‑mü ꞊dhɛ 'ö gun "dhʋ̈ kö ꞊ya Madhi ‑za dɔ kö 'ö‑ 'sü dhe 'ka. 'Sa 'wo gun 'dho sië‑ "dhʋ̈ "tʋ̈ng 'ö‑ 'ka bha kö Madhi ‑yö 'gbiödhe 'ka.
6 ꞊Dhɛ 'ö ꞊wa 'dho ꞊wa ꞊loo Betedhɛmö, 'ö Zosɛfu 'dhö 'wɔn bha‑ 'gü ‑ziö ‑nu wo sië, 'yö Madhi "bɔ bho "tʋ̈ng ‑yö ꞊loo.
7 'Yö ö ‑bha 'nëgɔɔn ‑blɛɛsü bha‑ kpɔ 'kɔ 'wo gun‑ 'gü bha‑ 'gü. ꞊Dhɛ 'ö 'në bha ꞊ya bhɔ, 'yö sɔ bɔ‑ ‑bha 'yö‑ ‑wɔ ‑tuʋ̈ ‑nu pë ‑bhö ‑dhɛ 'gü; ‑a ‑gɛn ‑mü ꞊dhɛ 'ö gun "dhʋ̈ kö ꞊wa ‑dhɛng ꞊yëë bho 'kɔ 'wo gun‑ 'gü bha‑ wɔdhɛ ‑zë 'gü.
8 ‑Tuʋ̈ ‑maakëmɛ 'bha ‑nu ‑wo ‑gun Zude "sɛgɔ bha‑ gbɛɛtadhɛ 'bha 'gü mü.
9 'Mɛ 'wo bha 'wo dho "kan wo ‑ta kö Atanna ‑bha "kië do ꞊ya ‑wo ‑nu ‑ta kö‑ ‑bha ‑gblüdëdhɛ 'bhü 'ö ꞊dhɛ 'yënng‑ 'bhü 'dhö bha ꞊ya 'sɔ‑ ‑nu ‑ta, 'yö pɛng ‑yö ‑kan ‑nu ‑bha "wɛ ‑budhö, 'yö "suʋ̈ ‑ziisü ‑yö ‑da ‑nu 'gü.
10 "Kɛɛ 'yö Atanna ‑bha "kië bha 'ö‑ pö‑ ‑nu ‑dhɛ 'ö‑ pö: «"Suʋ̈ 'ya 'dho ka kë, ‑a ‑gɛn ‑mü ꞊dhɛ naɔ 'a nu‑ dɔ ka ‑gɔ bha‑ 'gü ‑wɔn ‑dho dhi "sɛgümɛ ‑nu ꞊gban "pɛpɛ ‑dhɛ 'ö‑ ‑nu ꞊nii ‑da ꞊dedewo.
11 Yö ‑mü ꞊dhɛ Atanna ‑bha bɔmɛ Klisi 'ö‑ ‑ya Mɛdhamɛ 'ka, kwa Dëmɛ bha ꞊në ꞊ya bhɔ ꞊dɛɛ Davi ‑gɔ 'pödhö.
12 (‑Ka 'dho kö 'ka ‑wo mü), ꞊ya kë ꞊dhɛ 'ka 'dho 'ka ꞊loo mü, pë 'ka dho‑ 'suan‑ bho‑ ‑bha ꞊dhɛ 'wɔn 'a‑ pö bha tɛan‑ ‑mü, ꞊dhɛ Mɛdhamɛ bha ꞊ya bhɔ, yö ‑mü ꞊dhɛ ka ‑dho ‑kpan 'në do 'ö sɔ 'dhö bɔ ‑sü 'ka‑ ‑bha ‑a ‑bha kö ‑wa wɔ ‑sü 'ka ‑tuʋ̈ ‑nu pë ‑bhö ‑dhɛ 'gü.»
13 ꞊Dhɛ 'ö Atanna ‑bha "kië bha ꞊yaa‑ pö "dhʋ̈, 'wo dho "kan 'zü wo ‑ta kö‑ kpö 'kpii‑ 'bha ꞊ya nu 'zü kö ꞊wa ‑da mɛ 'dhɛ bha‑ ‑bha kö ‑wo "yʋʋ 'sü sië Atanna ‑dhɛ ("tan 'ka) 'wo‑ pö:
14 «Atanna 'i dhang‑ 'gü, kwaa‑ "yʋʋ ‑mü! Kwaa‑ "yʋʋ ‑mü! I 'tɔ ‑yö bhɔ, ‑a ‑gɛn ‑mü ꞊dhɛ "kpʋngtaamɛ ‑nu ‑dhɔ ‑yö i ‑kë, ‑a ‑wɔn 'gü 'bha i ‑bha zuë" ‑ya "gblʋ̈ʋ̈‑ 'ö dhang‑ 'gü bha‑ nu‑ ‑nu ‑dhɛ.»
15 ꞊Dhɛ 'ö Atanna ‑bha "kië ‑nu bha ꞊wa ‑wawa bho "dhʋ̈ 'ö ꞊wa wo yee kë ꞊wa 'dho dhang‑ 'gü, 'yö ‑tuʋ̈ ‑maakëmɛ ‑nu bha 'wo‑ pö wo 'ko ‑dhɛ: «‑Ka nu kö 'kwa 'dho Betedhɛmö kö 'wɔn ‑së 'ö Atanna ‑ya ‑kë 'ö‑ "blɛɛn‑ ‑zɔn kwa ‑dhɛ bha kwa "yan ‑yö ‑da ‑dhɛ 'gü!»
16 'Yö 'wo dɔ ‑bɛang ‑bha 'wo dho 'mü. 'Yö 'wo dho 'wo ‑kpan Zosɛfu waa‑ Madhi ‑a ‑nu ‑bha kö 'në bha 'pö ‑yö wɔ sië ‑tuʋ̈ pë ‑bhö ‑dhɛ 'gü ‑a ‑nu "sɔɔ mü.
17 ꞊Dhɛ 'wo 'në bha‑ yö, 'yö 'wɔn 'ö Atanna ‑bha "kië ‑ya pö‑ ‑nu ‑dhɛ 'në bha‑ ‑bu 'gü bha 'wo‑ ‑gɛn dɔ 'pö.
18 'Wɔn 'ö ‑tuʋ̈ ‑maakëmɛ ‑nu ‑wa ‑gɛn dɔ bha mɛ "pɛpɛ 'kö 'wo‑ ma, 'yö‑ 'wɔn ‑ya ‑nu ꞊gban kɔn,
19 "kɛɛ kö Madhi ‑zë ‑ya 'kun ꞊në wo sië ö zuë" "piʋ̈ 'ö ö "yan ‑ta 'gü 'ö dho‑ 'ka.
20 ꞊Dhɛ 'ö 'wɔn bha ꞊ya kë "dhʋ̈, 'yö ‑tuʋ̈ ‑maakëmɛ ‑nu bha 'wo wo yee ‑kë 'wo dho wo ꞊plöö kö ‑wo Atanna nuɛ" bho sië 'ö 'wo 'tɔ ꞊loo‑ ‑bha 'wɔn ‑nu 'ö‑ ‑nu "yan 'dhö ‑da 'gü waa‑ 'dhɛ ‑nu 'wo‑ ma bha kë 'ö‑ wo tɛan‑ 'ka ꞊dhɛ ‑kɔ 'ö‑ ‑bha "kië ‑ya pö 'ka‑ ‑nu ‑dhɛ ‑a 'dhö bha‑ ‑wɔn 'gü.
Yesu 'kpɔmɛ ‑nu ‑bha Moizö ‑bha 'tɔng‑ ‑nu 'gü ‑wɔn kë ‑kɔ ‑dhiang 'ö Dhukö ‑ya zë
21 ꞊Dhɛ 'ö Yesu ꞊ya bhɔ 'ö‑ ‑dhɛkpaɔyi ꞊ya kë "saaga, 'yö mɛ ‑nu ‑wo nu kö ‑wa kë 'gbannë 'ka. 'Yö‑ 'tɔ 'ö Atanna ‑bha "kië ‑ya kpɔ kö 'wii‑ ‑gu ‑zian 'sü ꞊kö bha 'wo‑ ‑ya ‑bha, 'yö 'wo‑ pö ‑wa ‑dhɛ Yesu.
22 ꞊Dhɛ 'ö ‑dhɛkpaɔyi 'ö dhebhɔ 'ö ꞊ya "bɔ bho 'ö‑ ‑kë 'kɔɔdhö 'yö gun ‑na 'dho Atanna ‑dhɔkëgükɔ 'gü ꞊dhɛ ‑kɔ 'ö ‑bɛn zë ‑sü 'ka‑ 'ka ‑a ‑bha 'tɔng‑ 'sëëdhɛ 'ö Moizö ‑ya ‑bɛn zë bha‑ 'gü bha‑ 'dhö, 'ö‑ ‑dhɛkpaɔyi ‑kaɔng ‑yiisiö 'ka bha ꞊ya zun 'ko "dhiʋ̈, 'yö Zosɛfu waa‑ Madhi 'wo Yesu sü 'wo dho‑ 'ka Zedhizadhɛmö kö 'wo‑ "kplëng bho kwa Dëmɛ ‑dhɛ
23 ꞊dhɛ ‑kɔ 'ö ‑bɛn zë ‑sü 'ka‑ 'ka Atanna ‑bha 'tɔng‑ 'sëëdhɛ 'gü ꞊dhɛ:
«'Nëgɔɔn ‑blɛɛsü "pɛpɛ 'ka dho‑ 'kpɔ,
ka ‑dho ‑a "kplëng bho Atanna ‑dhɛ» bha‑ 'dhö.
Kë 'pö "dhʋ̈ kö‑ 'dhɛ 'ö ‑bɛn zë ‑sü 'ka 'pö ꞊dhɛ ꞊ya kë 'zü "dhʋ̈:
24 «'Ka ‑tong ꞊plɛ "ɛɛn ‑a suu 'bha 'ö mü bha‑
"gbɔng ꞊plɛ nu "saabhomɛ ‑nu ‑dhɛ
kö ‑wo "saa‑ bho‑ 'ka Atanna "dhiʋ̈» bha ‑wa 'gü ‑wɔn kë ꞊dhɛ ‑kɔ 'ö ‑bɛn zë ‑sü 'ka‑ 'ka ‑a 'dhö (kë "dhʋ̈ 'pö kö Madhi ‑yö kë "slʋ̈ʋ̈slʋ̈).
Simeɔn ‑bha Atanna ‑wʋ "dhiʋ̈ ꞊loo ‑kɔ ‑dhiang 'ö Dhukö ‑ya zë
25 ‑A "tʋ̈ng do bha‑ 'gü kö gɔndë do 'bha ‑yö Zedhizadhɛmö ‑pö bha‑ 'gü 'wo‑ ‑dhɛ Simeɔn. 'Mɛ 'ö ꞊sɔng 'bha 'yaa‑ ‑bha, 'ö Atanna ꞊bhlëë ‑ya ꞊dedewo ꞊në gun gɔndënë bha‑ 'ka. 'Sa 'ö gun "dhʋ̈ kö ‑yö ö "yan 'to sië 'mɛ 'ö dho Izraɛdhö ‑mɛ ‑nu dha bha ꞊në‑ ‑gɔ. Atanna ‑bha 'Nii‑ "slʋ̈ʋ̈slʋ̈ ‑yö ‑gun 'gü.
26 'Ö gun "dhʋ̈ kö Atanna ꞊ya bɔ 'nu ö bha 'Nii‑ "slʋ̈ʋ̈slʋ̈ ‑ta kö Yesu bhɔ "tʋ̈ng ‑zian 'yii ꞊loo ꞊kö kö ꞊yaa‑ pö Simeɔn ‑dhɛ ꞊dhɛ 'yii 'dho ga kö 'yii ö "yan ‑kpan ꞊kö 'mɛ 'ö kwa Dëmɛ ‑ya ‑ya Izraɛdhö ‑mɛ ‑nu Dhamɛ 'ka bha‑ ‑bha.
27 ‑A ‑bha 'Nii‑ "slʋ̈ʋ̈slʋ̈ do bha ꞊në zun 'zü‑ ‑dhɛ "dhiʋ̈ 'yi bha‑ 'ka 'yö dho‑ 'ka Atanna ‑dhɔkëgükɔ 'ö Zedhizadhɛmö bha‑ 'gü. ꞊Dhɛ 'ö ꞊ya 'dho ꞊ya ꞊loo mü, 'ö dho ‑dhɛ ‑ga kö Yesu dë ‑nu ‑wo nu sië‑ 'ka kö 'pë 'ö Atanna ‑bha 'tɔng‑ ‑ya pö bha ‑wa 'gü ‑wɔn kë.
28 ꞊Dhɛ 'ö ꞊yaa‑ ‑nu yö, 'yö ö ‑kɔ kpɔ 'në bha‑ ‑gɔ 'yö 'tɔ ꞊loo Atanna ‑bha 'ö‑ pö:
29 «‑A "tʋ̈ng ꞊ya ꞊loo ꞊tɔn, n Dëmɛ,
kö 'i i ‑kɔ bho ma 'a i ‑bha gwëëmi 'ka bha n 'gü,
kö 'a nu i "piʋ̈ zuëniida 'ka
꞊dhɛ ‑kɔ 'ö i ‑wʋ ‑ya pö‑ 'ka ‑a 'dhö;
‑a ‑gɛn ‑mü ꞊dhɛ 'wɔn 'i‑ yi to "dhiʋ̈
'i‑ "plüün bho yi ‑dhɛ bha‑ 'gü ‑wɔn ꞊ya kë.
30-31 ‑A ‑gɛn ‑mü ꞊dhɛ Mɛdhamɛ 'i‑ bɔ
'ö 'i‑ ‑ya "sɛgɔ ꞊gban "pɛpɛ Dhamɛ 'ka bha,
mang ꞊dede n "yanga ꞊plɛ ꞊ya ‑kpan ‑a ‑kponggüdhɛ ‑bha.
32 'Mɛ 'ö dho kë "sɛgɔ "pɛpɛ ꞊gban 'gü ‑mɛ ‑nu ‑bha ‑dhɛpuudhɛ 'ka,
'ö dho‑ ‑nu "yan "dhiʋ̈ "pʋ kö ‑wo i dɔ,
'ö dho Izraɛdhö ‑mɛ ‑nu 'i yi sü
'i yi ‑ya ‑dɩ ‑ta i ‑bha 'ka bha
yi 'tɔ ‑wo bha 'ma‑ yö.»
33 Dhiang ‑nu 'ö Simeɔn gun‑ zë sië Yesu ‑bu 'gü "dhʋ̈ bha, ‑ya dhe waa‑ dë ‑a ‑nu ‑kɔn.
34 ꞊Dhɛ 'ö ꞊ya kë "dhʋ̈, 'yö 'dhuë‑ ‑kë ‑nu ‑bha, 'yö go mü 'ö‑ pö Yesu dhe Madhi ‑dhɛ:
«'Në 'i‑ kpɔ bha,
Atanna ‑ya ‑ya kö ‑yö kë Izraɛdhö ‑sɛgümɛ ‑nu
'bha ‑nu ‑pö ‑bha ‑pë 'ka,
"kɛɛ kö ‑yö kë mɛ 'bha ‑nu ‑dɩ 'pö ‑a ‑nu ‑wlübhamɛ 'ka.
‑Yö ‑dho kë Atanna ‑bha 'wɔn 'suan‑ ‑bho ‑bha ‑mɛ ꞊në‑ 'ka;
‑a ‑gɛn ‑mü ꞊dhɛ mɛ "bhɩɩ‑ ‑nu ‑dho wo ꞊taa zun‑ ‑gɔ.
35 Yö ꞊në dho kë 'wɔn ‑nu 'wo ‑gblɛn 'kpɔ ‑sü 'ka
mɛ 'gbɛ zuë" "piʋ̈ bha‑ ‑nu ‑wo zangtamɛ 'ka.
"Kɛɛ bhi ‑zë, i ‑bha 'ka zuë" "dhiʋ̈ "tɛɛ‑ ‑dho i zuë" ‑gi
꞊dhɛ ‑kɔ 'ö ‑siangga ‑yö mɛ zua 'ka bha‑ 'dhö.»
Anö ‑bha Atanna ‑wʋ "dhiʋ̈ ꞊loo ‑kɔ ‑dhiang 'ö Dhukö ‑ya zë
36 ‑A "tʋ̈ng do bha‑ 'gü, Atanna ‑wʋ "dhiʋ̈ ꞊loo ‑dhe do 'bha ‑yö ‑gun "sɛ bha‑ 'gü 'wo‑ ‑dhɛ Anö, 'ö kë Fanuɛ 'dhu 'ka, 'ö go Asɛɛ ‑gɔ 'kɔdhi 'gü. Dhebhɔ bha 'ö gun "dhʋ̈ kö ꞊ya kë zii ꞊dedewo, "kɛɛ kö 'ö dho gwaan‑ ‑bha ‑yö ‑kwɛ ‑kë mü "saɔplɛ, 'yö‑ ‑bha gɔn ‑yö ga.
37 ‑A ꞊gɛandhe ‑sü bha kö‑ ‑kwɛ ꞊ya kë ‑kaɔng "saaga ö ga ‑yiisiö, "kɛɛ 'yaa 'go Atanna ‑dhɔkëgükɔ 'gü tongtongdhö kö ‑yö 'dho ‑dhɛ 'bha 'gü. Kö ‑ya ‑dhɔkë 'yënng‑ 'gü waa gbeng ‑nu ꞊gban 'gü ‑bhɛa ‑a ‑dhɛ ‑sü waa‑ 'sunng‑ 'ma ‑sü ‑nu 'ka ‑kpɛawo.
38 Yöö ‑dɩ 'pö ‑yö ꞊loo mü "tʋ̈ng ꞊dede 'wo dho Yesu 'ka ‑a 'gü mü bha ꞊në‑ 'gü. ꞊Dhɛ 'ö Yesu "blë "puu bha‑ yö, 'yö ‑ya Atanna nuɛ" bho ‑sü ‑bha, 'yö dho‑ ‑wɔn ‑gɛn dɔ ‑sü 'ka mɛ "pɛpɛ 'ö‑ ‑nu "yan ‑yö gun Zedhizadhɛmö ‑dhɛ ‑bho ꞊dhuëngdhɛ 'gü ‑yi ‑gɔ bha‑ ‑nu ꞊gban "pɛpɛ ‑dhɛ.
Yesu 'kpɔmɛ ‑nu ‑bha wo "dhiʋ̈ yee ‑kë kö ‑wo nu Nazadhɛtö waa‑ Yesu ‑bha ‑dho Atanna ‑gɔ 'kɔɔdhö ‑kɔ ‑dhiang 'ö Dhukö ‑ya zë
39 ꞊Dhɛ 'ö 'mɛ 'wo bha ꞊wa 'wɔn 'ö ‑bɛn zë ‑sü 'ka Atanna ‑bha 'tɔng‑ 'gü bha‑ ꞊gban 'gü "ta sü 'ö ꞊ya ꞊mɔɔ "kwëë, 'yö Zosɛfu waa‑ Madhi 'wo wo yee ‑kë 'wo nu ‑a ‑nu ‑gɔ 'pödhö Nazadhɛtö, Gadhidhe ‑sɛ 'gü.
40 'Në bha ‑yö ‑gla 'pö‑ bha ꞊në‑ 'gü, 'yö ‑kë faanmɛ 'ka, ‑yö ‑gun "yaakimɛ ꞊dede 'ka, 'yö Atanna ‑yö gun‑ "piʋ̈.
41 Yesu 'kpɔmɛ ‑nu ‑wo ‑gun 'dho sië Pakö troo ‑ta Zedhizadhɛmö ‑kwɛ ꞊gban "pɛpɛ ‑ta.
42 ꞊Dhɛ 'ö Yesu ‑kwɛ ꞊ya kë ‑kaɔng do ga ꞊plɛ 'ö Pakö yi bha‑ 'bha ꞊ya ꞊loo, 'yö 'wo dho 'zü ꞊dhɛ ‑kɔ do 'wo dho‑ 'ka zii 'kpa ‑a 'dhö.
43 ꞊Dhɛ 'ö ꞊wa 'dho 'ö ꞊wa troo bha‑ kë ꞊ya yën, 'ö 'wo wo yee kë sië kö ‑wo nu wo ꞊plöö, 'yö Yesu ‑yö to Zedhizadhɛmö "kɛɛ ‑a dhe waa‑ dë 'wii 'wɔn ꞊slɔɔ‑ 'gü,
44 kö ‑wo wo ‑zʋ 'gɔn sië ꞊dhɛ ‑yö wo "tayɔɔ ‑nu kpö 'gü. ꞊Dhɛ 'ö ꞊wa ‑dhɛkpaɔyi do "ta sü, 'yö 'wo ‑ya ‑a mɔɔ‑ ‑sü ‑bha woo‑ mɛ ‑nu waa‑ ‑a ‑nu dɔmɛ ‑nu "wɛɛwɛɛ ‑nu kpö 'gü.
45 ꞊Dhɛ 'ö ꞊waa‑ mɔɔ‑ "dhʋ̈ 'ö 'wii‑ yö, 'yö 'wo wo yee ‑kë 'zü ‑deewo 'wo dho Zedhizadhɛmö ‑a mɔɔ‑ ‑sü 'ka.
46 ‑Wa ‑mɔɔ ‑dhɛkpaɔyi ‑yaaga. ‑A ‑yaaga ‑naa bha‑ 'ka 'yö 'wo dho 'wo ‑kpan ‑bha Atanna ‑dhɔkëgükɔ 'ö Zedhizadhɛmö bha‑ 'gü, kö ‑yö ‑ya sië mɛ ‑nu ‑draan Atanna ‑wʋ ‑bha ‑mɛ ‑nu ‑gɔmɛ "gblʋ̈gblʋ̈ ‑nu bha‑ ‑nu kpö 'gü, 'ö ö "tʋ 'to‑ ‑nu ‑wʋ ‑bha 'ö‑ ‑nu dhɛɛ" ‑nu 'kpɔ.
47 Dhiang ‑yɔ ‑nu 'ö gun‑ bɔ sië, waa‑ dhɛɛ" ‑nu 'ö‑ kpɔ bha 'mɛ 'wo‑ ma, ‑a 'wɔn ‑ya ‑nu ‑kɔn ꞊dedewo ꞊kpaɔdhɛ 'ö gun‑ ‑gɔ waa‑ dhiang ‑yɔ bɔ ‑kɔ ‑nu bha‑ ‑nu ‑wɔn 'gü.
48 ꞊Dhɛ 'ö‑ 'kpɔmɛ ‑nu ꞊waa‑ yö, 'yö‑ 'wɔn ‑ya ‑nu kɔn. 'Yö‑ dhe ‑ya pö‑ ‑dhɛ 'ö‑ pö: «Yesu n gbö, ‑më ‑wɔn suu ꞊në 'i‑ kë yi 'ka "dhʋ̈? 'Bha yi zuë" ‑ya "yi ‑ta "gbɩɩ‑ ‑wa! Yaa‑ i dë 'yi ‑bhɔ i mɔɔ‑ ‑sü 'ka ‑a ‑dhɛkpaɔyi ‑yaaga ‑naa ꞊nɛ.
49 'Yö Yesu ‑ya ‑yɔ bɔ‑ ‑nu ‑gɔ 'ö‑ pö: «Ka n ‑mɔɔ ‑më 'ka? "Ɛɛn ‑a 'wɔn 'yaa ka "yaan ꞊dhɛ ‑a ‑dhɛa ‑bha ꞊dhɛ 'a n dë ‑gɔ ‑wɔn ‑nu kë ‑ee?»
50 "Kɛɛ ‑a pö 'ö Yesu ‑ya wo "dhʋ̈ bha 'wii‑ 'gü ma‑ 'klɔɔ‑ 'ka.
51 ꞊Dhɛ 'ö ꞊ya kë "dhʋ̈, 'yö wɛng‑ ‑nu 'wo ‑ziö 'wo dho Nazadhɛtö, ‑a ‑gɛn ‑mü ꞊dhɛ ‑yö ‑gun ‑a ‑nu ꞊bhlëë ‑ya sië ꞊dedewo. 'Wɔn "pɛpɛ 'wo gun‑ kë sië "dhʋ̈ bha kö ‑a dhe ‑dɩ 'pö ‑ya 'kun sië ö zuë" "piʋ̈ ‑dhɛkpaɔ dhia" ‑wɔn 'gü.
52 Kö Yesu ‑dɩ 'pö ‑yö "gla sië, 'ö‑ ‑bha ꞊kpaɔdhɛ ‑ta ‑yö ‑da, 'ö‑ ‑dhɔ ‑yö Atanna ‑kë waa‑ mɛ "bhɩɩ‑ ‑nu ꞊gban 'dhö.