3
Atanna ‑bha Pɔdhö ‑ya dhiang zë 'mɛ 'waa Zuifö 'ka ‑a ‑nu ‑dhɛ ‑mɛ 'ka ‑sü ‑dhiang 'ö‑ zë
1 'Wɔn 'ö‑ ‑wɔn 'gü 'yö mang Pɔdhö ‑mɛ 'ö 'a Yesu Klisi ‑bha gwëëmi 'ka, 'a ‑kaso 'gü ‑a pö 'a‑ wo 'mɛ 'kaa Zuifö 'ka 'ka kë Atanna ‑bha 'në 'ka ‑a ‑wɔn 'gü, 'a ꞊bhɛa‑ ‑dhɛ ka ‑wɔn 'gü bha 'yö bha.
2 ‑Yö n 'gü ꞊dhɛ n ‑ya 'ö Atanna ‑ya wo ö ‑bha "klʋsëdhɛ bha‑ 'gü ka "dhiʋ̈ ‑ziö wo ‑mɛ 'ka bha, 'yaa ka tii' 'ka ‑wɔn ‑zë 'ka.
3 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Klisi ‑wɔn 'ö Atanna yöö do ꞊në gun‑ dɔ sië, 'ö mɛ 'bha 'yaa gun‑ 'gü yö sië bha, yöö ꞊dede ꞊në‑ ‑ta ‑pʋ n ‑dhɛ. "Kɛɛ 'sa 'wɔn 'ö "dhʋ̈ bha ꞊në 'a go‑ 'gü pö ka ‑dhɛ ‑wʋ 'dengdeng 'në 'ka bha.
4 ‑Wʋ ‑nu 'wo "dhʋ̈ bha ꞊në 'ka dho‑ 'wɔn dɔ‑ ‑bha ꞊dhɛ Klisi ‑wɔn 'ö gun ‑bin ‑sü 'ka "dhʋ̈ bha a 'wɔn 'në bha ‑dɔ 'gü.
5 'Wɔn bha‑ ‑ta "pʋ ‑kɔ 'ö Atanna ‑ya ‑pʋ 'ka ö ‑bha 'Nii‑ "slʋ̈ʋ̈slʋ̈ ‑kɔ 'ka Klisi ‑bha bɔmɛ ‑nu waa‑ ö ‑wʋdhiʋ̈loomɛ ‑nu "slʋ̈ʋ̈slʋ̈ 'wo ꞊dɛɛ ya‑ 'gü ‑a ‑nu ‑dhɛ bha 'yii‑ ‑blɛɛsü kë 'nu "dhʋ̈ mɛ 'bha ‑mɛ 'bha ‑dhɛ do.
6 "Kɛɛ 'sa 'wɔn 'ö‑ ‑ta ‑pʋ "dhʋ̈ bha yö ‑mü ꞊dhɛ naɔ ‑së 'ö ‑gban Yesu Klisi ‑bha 'wo‑ dɔ ka ‑gɔ bha‑ 'saa‑ 'gü, 'mɛ 'ö 'kaa Zuifö 'ka bha, kaa Zuifö ‑nu 'ka kë do, ‑dhɛkpaɔ dhia" saan 'ö Atanna ‑ya ‑ya 'nu ö ‑bha 'në ‑nu bha‑ ‑nu ‑gɔ bha ka ‑bha ꞊ya ‑da 'gü, kɛng‑ ‑nu 'ka kë mɛ do ꞊në‑ 'ka. 'Wɔn do 'ö Atanna ‑ya "plüün bho‑ ‑nu ‑dhɛ bha, 'ka kë‑ ꞊slɔɔmɛ 'ka 'pö Yesu Klisi 'saa‑ 'gü.
7 Kë 'a‑ wo Atanna ‑bha naɔ ‑së bha‑ dɔ ‑mɛ 'ka bha, yöö ꞊dede ꞊në‑ ‑bhɔdhɛ bhɔ n ‑dhɛ ‑a ‑bha "klʋsëdhɛ 'ka ‑a ‑bha 'gügbɩɩdhɛ ‑kɔ 'ka.
8 'Maa ‑zɔn mɛ "pɛpɛ 'wo bɔ Atanna 'ka 'ö ꞊wa kë "slʋ̈ʋ̈slʋ̈ bha‑ mɛ 'dɛdɛ ‑sü ‑zian 'ö‑ 'gü ‑a 'ka ‑mɛ 'ka, "kɛɛ 'sa Atanna ‑yö ‑gasitɛ bha‑ kë ‑sü 'ka ma ꞊në n ‑dhɛ kö 'a 'wɔn ‑së ‑ziisü 'ö‑ ‑kë mɛ "bhɩɩ‑ ‑nu kwa ‑dhɛ Klisi ‑nu kwa ‑dhɛ ‑sü 'ka bha‑ ‑naɔ ‑pö 'mɛ 'waa Zuifö 'ka ‑a ‑nu ‑dhɛ.
9 Kë "dhʋ̈ kö 'wɔn 'ö‑ ‑zʋ "piʋ̈, 'ö‑ "piʋ̈ ꞊dhɛ 'ö‑ kë ‑dhɛ 'bha ꞊kpaɔ ‑yi ‑bha bha 'a‑ ‑zɔn mɛ ꞊gban "pɛpɛ ‑dhɛ kö ‑wa dɔ. "Kɛɛ 'sa 'wɔn bha ‑yö ‑bhɔ Atanna 'ö pë ꞊gban "pɛpɛ ‑da ‑mɛ 'ka bha‑ ‑zʋ "piʋ̈ 'nu yi 'bha ‑yi 'bha 'ka, "kɛɛ ‑ya ‑ta "pʋ ‑sü 'ka ma ꞊në n ‑dhɛ kwa dɔ ‑kɔ ya‑ 'gü kö 'a‑ ‑ta "pʋ 'pö mɛ ꞊gban "pɛpɛ ‑dhɛ kö 'a‑ 'gü ‑ta 'sü ‑kɔ ‑zɔn ‑nu ‑dhɛ.
10 Kë "dhʋ̈ kö 'gügbɩɩdhɛpë ‑nu waa‑ mɛdhɛkëpë ‑nu 'wo dhang‑ 'gü ‑wa 'wɔn dɔ ꞊dɛɛ ‑yën ya‑ 'gü ꞊dhɛ Atanna ‑bha 'wɔndɔdhe bha‑ ‑gaɔ ‑yö 'gbɛ ‑a ‑bha 'kɔdhigümɛ ‑nu ‑loo 'ko ‑ta ‑sü ꞊gban ‑bu 'gü.
11 "Kɛɛ 'sa 'wɔn bha 'ö gun Atanna ‑zʋ "piʋ̈ ‑kɔ do 'ö‑ ‑bha ‑kpɛawo bha ‑ya ‑kë kwa ‑dhɛ kwa Dëmɛ Yesu Klisi 'saa‑ 'gü yö ꞊në‑ ‑kɔ ‑bha.
12 ꞊Ya kë ꞊dhɛ 'kwa ‑kplü ‑sü ‑zë 'ka Yesu Klisi bha, kö kwa ‑zʋ 'gɔn ‑sü ‑ya ‑dhɛ, kwa ‑mɔɔ ‑bha 'kwa dho Atanna ‑kuu "dhiʋ̈ kwa ‑ta "puu 'ka kö "sika 'bha ‑zian 'yaa kwa 'gü.
13 ‑A ‑kë "dhʋ̈ ‑sü bha‑ 'gü, bhɛa" ꞊në 'a‑ wo sië ka ‑dhɛ kö saan" 'a‑ wo sië ka ‑wɔn 'gü bha 'ya 'dho kë ka 'gü ga ‑gɛn 'ka, "kɛɛ kö ‑yö kë ka "yaan ꞊dhɛ ‑yö ka ‑bha 'ka ‑së.
14-15 'Wɔn "pɛpɛ 'ö Atanna ‑ya ‑kë kwa ‑dhɛ "dhʋ̈ bha ꞊në‑ ‑wɔn 'gü 'yö 'a zun n kpiö 'gü kwa Dë Atanna 'ö 'kɔdhi "pɛpɛ 'wo "sɛ ‑ta "ɛɛn 'wo dhang‑ 'gü 'wo go‑ 'gü bha‑ ‑dhɛ, 'yö 'a ꞊bhɛa‑ ‑dhɛ ka ‑wɔn 'gü.
16 Kë "dhʋ̈ kö ‑ya zë ö ‑bha 'tɔbhɔdhe ‑ziisü bha ‑dhɛ kö ‑yö ö ‑bha ‑gasitɛ bha‑ kë ka ‑dhɛ kö ‑a ‑bha 'Nii‑ "slʋ̈ʋ̈slʋ̈ bha ‑yö ka 'gü ‑gban faan ‑ziisü 'ö‑ 'gü bha‑ 'ka,
17 kë "dhʋ̈ kö Klisi ‑wɔn ‑yö 'to ka zuë" 'gü ‑kpɛawo ka ‑bha ‑zʋ ‑yö ‑a ‑dhɛ ‑sü 'gü. 'Ö 'a ꞊bhɛa‑ ‑dhɛ kö ‑yö ‑to ‑a "piʋ̈ ‑sü bha‑ "sɩ kë ka ‑dhɛ, kö ka ‑gɛn ‑yö ‑gban ꞊dedewo ‑dhɔ 'ö go‑ "piʋ̈ bha‑ 'gü,
18 kë "dhʋ̈ kö ‑kɔ 'ö kwa ‑dhɔ ‑bha Klisi kë ‑kɔ 'dhö‑ ‑bha, ‑ya "sɩ kë ka ‑dhɛ kö kaa‑ mɛ "pɛpɛ 'wo Atanna ‑bha mɛ 'ka 'ka ‑dhɔ bha‑ daɔng ‑bha ‑kë ꞊gblɛɛn ‑sü oo, ‑a ‑bha ‑kë "gbɛa ‑sü oo, ‑a ‑bha ‑kë zong ‑sü ‑sü oo ‑a ‑dɔ ‑gɛan ‑sü ‑bha ‑kë ꞊gblɛɛn ‑kɔ ‑nu 'wo ‑kɔ 'ö‑ ‑bha, kö 'ka‑ dɔ 'kpakpadhö ‑së 'ka.
19 A ‑bhɛa ‑dhɛ 'zü "dhʋ̈ kö Klisi ‑bha ‑dhɔ 'ö‑ ‑kë kwa 'ka, 'ö ‑ziö mɛ "bhɩɩ‑ ‑nu ‑bha 'wɔn 'gü ma ‑naa ‑zë ꞊gban ‑ta bha 'ka‑ 'gü ma, ‑a ‑gɛn ‑mü ꞊dhɛ yö ꞊në ꞊ya kë "dhʋ̈ 'yö 'ka dho ꞊mɔɔ‑ ‑bha 'ka Atanna ‑wɔn ‑gɛn bho ‑kɔ ꞊gban dɔ "pɛpɛdhö 'yö ka zuë" pa ‑kɔ ꞊gban ‑kɔ ꞊gban 'gü.
20-21 "Sɩ ‑yö Atanna ‑dhɛ, ‑a ‑wɔn 'gü ‑yö ‑mɔɔ ‑bha 'ö yë ‑kë kwa 'gü ö ‑bha 'gügbɩɩdhɛ ‑bha, 'yö 'wɔn "pɛpɛ 'kwa ꞊bhɛa‑ ‑dhɛ ‑a ‑wɔn 'gü, waa‑ 'dhɛ ‑zian 'kwa kwa ‑zʋ ꞊në‑ gɔn‑ 'ka bha 'ö‑ "dhiʋ̈ ‑ziö ‑ta ‑kë kwa ‑dhɛ. 'Wɔn 'ö‑ ‑wɔn 'gü 'yö 'a‑ pö ꞊dhɛ yö ꞊në‑ 'tɔ ‑yö bhɔ Atanna ‑bha 'kɔdhigümɛ ꞊gban ‑loo 'ko ‑ta ‑sü kpö 'gü ‑kpɛawo Yesu ‑bu 'gü kö ‑yö 'to‑ 'to ‑kɔ 'ka bha 'yö bha. Kö ‑yö kë "dhʋ̈ bha 'aa ‑yö kë!