34
Mhaka za Kanaani
1 Mndewa Mulungu kamulongela Musa,
2 “Walagilize Waisilaili na uwalongele, ‘Vondamwingile muna iisi ya Kanaani, isi ino izakuwa uhazi wenu, mhaka za hanhu baho zizakuwa fana vino.
3 Ubanzi wa kusi mhaka yenu izakuwa kulawa chuwala cha Sini kufosela ubanzi wa Edomu. Izakwandusila ulawilo wa zuwa ubanzi wa kusi kuuhelelo wa Bahali ya Munyu.
4 Maabaho izafosela kusi kuhita ubanzi wa Akilabimu na kufosela Sini mbaka Kadeshi Balinea, ubanzi wa kusi. Kulawa uko, mhaka izafosela Hasali Adali na kufosa mbaka Azimoni.
5 Kulawa Azimoni mhaka izafosela kuna ichizanda cha Misili na izahelela muna Ibahali ya Meditelaniya.
6 “ ‘Mhaka yenu ya ubanzi wa uswelo wa zua izakuwa Bahali ya Meditelaniya.
7 “ ‘Mhaka yenu ya ubanzi wa kasikazi izakuwa fana vino, kulawa Bahali ya Meditelaniya, mwizatula mkuza mbaka kuna umulima wa Holi,
8 na kulawa mulima wa Holi mwizatula mkuza mbaka Hamasi. Maabaho mhaka izahita mbaka uko Sedadi,
9 na izagendelela mbaka Zifiloni na kuhelela uko Hazali Enani. Iyo izakuwa mhaka yenu ya ubanzi wa kasikazi.
10 “ ‘Mhaka yenu ya ubanzi wa ulawilo wa zua mwizatula mkuza kwandusila Hazali Enani mbaka Shefamu.
11 Mhaka izalawa Shefamu kuhita Libila, ubanzi wa ulawilo wa zua wa Aini, maabaho izagendelela na kufika ubanzi wa lamba da Galilaya.
12 Maabaho mhaka izafosela lwanda lwa Yoludani na kulawilila kuna Ibahali ya Munyu. Iyo izakuwa isi yenu fana mhaka viili.’ ”
13 Maabaho Musa kawalagiliza Waisilaili, kalonga, “Ino niiyo isi yondamuihazi kwa kutowa mhiya, isi ija Mndewa Mulungu iyalagilize weng'higwe makabila kenda na nusu.
14 Kwaviya ng'holo za kabila da Lubeni na kabila da Gadi na nusu ya kabila da Manase wapata uhazi wawo kuilinga na ng'holo zawo.
15 Makabila yano maidi na nusu yahokela uhazi wawo kwandusila kuumwambu wa lwanda lwa Yoludani, habehi na Yeliko, ubanzi wa ulawilo wa zua.”
Walangulizi wa makabila wondawagole isi
16 Mndewa Mulungu kamulongela Musa,
17 “Mkulu wa nhambiko Eleazali na Yoshua mwana wa Nuni, niiwawo wondawawagolele wanhu isi kuwa yawo.
18 Sagula mulangulizi imwe kulawa chila kabila muladi wakutaze kuigola isi.
19 Yano ni mazina ya walume. Kulawa kabila da Yuda kakala Kalebu mwana wa Yefune.
20 Kulawa kabila da Simeoni kakala Shemueli mwana wa Amihudi.
21 Kulawa kabila da Benjamini kakala Elidadi mwana wa Kisiloni.
22 Kulawa kabila da Dani kakala Buki mwana wa Yogili.
23 Kulawa kabila da Manase mwana wa Yosefu kakala Hanieli mwana wa Efodi.
24 Kulawa kabila da Efulaimu mwana wa Yosefu kakala Kemueli mwana wa Shifitani.
25 Kulawa kabila da Zabuloni kakala Elisafani mwana wa Palinaki.
26 Kulawa kabila da Isakali kakala Palitieli mwana wa Azani.
27 Kulawa kabila da Asheli kakala Ahihudi mwana wa Shelomi.
28 Kulawa kabila da Nafutali kakala Pedaheli mwana wa Amihudi.”
29 Wano niiwawo wanhu waja Mndewa Mulungu woyawalagilize wawagolele Waisilaili uhazi muna iisi ya Kanaani.