26
Peta yekaidi
1 Vidimalile tamu ijo, Mndewa Mulungu kawalongela Musa na Eleazali mwana wa mkulu wa nhambiko Haluni,
2 “Wapeteni Waisilaili wose na ng'holo zawo na wanhu wose weli na miyaka malongo maidi na waja wose wowodaha kuitowa kuna ing'hondo.”
3 Musa na mkulu wa nhambiko Eleazali walonga na wanhu kuna dibawe da Moabu habehi na lwanda lwa Yoludani uli malola na bululu da Yeliko. Wawalongela,
4 “Wapeteni wanhu kwandusila weli na miyaka malongo maidi na kugendelela, fana Mndewa Mulungu viyamulagilize Musa.”
Wawo wakala Waisilaili wowalawile muna iisi ya Misili.
5 Lubeni kakala mwana wa udele wa Isilaili, welesi wa Lubeni wakala lukolo lwa Henoki na lukolo lwa Palu
6 na lukolo lwa Heziloni na lukolo lwa Kalimi.
7 Zino zikala ng'holo za Lubeni. Wanhu wose wowapetigwe wakala 43,730.
8 Mwana wa Palu kakala Eliabu.
9 Wana wa Eliabu wakala Nemueli na Dasani na Abilamu. Niiyo wawo Dasani na Abilamu wowasaguligwe na mting'hano mbali wawabiduka Musa na Haluni, wailumba na bumbila da Kola lusita viwamulekile Mndewa Mulungu.
10 Isi igubuka na kuwamela. Wadanganika hamwe na Kola na bumbila jake lusita moto viuwadanganize wanhu 250, dikala lamulo kwa wanhu.
11 Mbali lukolo lwa Kola hawadanganike.
12 Welesi wa Simeoni wakala lukolo lwa Nemueli na lukolo lwa Yamini na lukolo lwa Yakini
13 na lukolo lwa Zela na lukolo lwa Shauli.
14 Zino izo ng'holo za kabila da Simeoni, peta yawo wakala walume 22,200.
15 Welesi wa Gadi wakala lukolo lwa Sefoni na lukolo lwa Hagi na lukolo lwa Shuni
16 na lukolo lwa Ozini na lukolo lwa Eli
17 na lukolo lwa Alodi na lukolo lwa Aleli.
18 Zino izo ng'holo za kabila da Gadi, peta yawo wakala walume 40,500.
19 Welesi wa Yuda wakala Eli na Onani. Wawo wadanganikila muna iisi ya Kanaani.
20 Welesi wa Yuda wakala lukolo lwa Shela na lukolo lwa Pelesi na lukolo lwa Zela.
21 Welesi wa Pelesi wakala lukolo lwa Hesiloni na lukolo lwa Hamuli.
22 Zino izo ng'holo za kabila da Yuda, peta yawo wakala walume 76,500.
23 Welesi wa Isakali wakala lukolo lwa Tola na lukolo lwa Puva
24 na lukolo lwa Yashubu na lukolo lwa Shimuloni.
25 Zino izo ng'holo za kabila da Isakali, peta yawo wakala walume 64,300.
26 Welesi wa Zabuloni wakala lukolo lwa Seledi na lukolo lwa Eloni na lukolo lwa Yaleeli.
27 Zino izo ng'holo za kabila da Zabuloni, peta yawo wakala walume 60,500.
28 Wana wa Yosefu wakala Manase na Efulaimu.
29 Welesi wa Manase wakala lukolo lwa Makili na lukolo lwa Gileadi mwanage.
30 Welesi wa Gileadi wakala lukolo lwa Yezeli na lukolo lwa Heleki
31 na lukolo lwa Asilieli na lukolo lwa Shekemu
32 na lukolo lwa Shemida na lukolo lwa Hefeli.
33 Selofehadi mwana wa Hefeli heleke wana wa chilume mbali wana wa chike muhala. Mazina yawo yakala Mala na Nuhu na Hogila na Milika na Tiliza.
34 Zino izo ng'holo za kabila da Manase, peta yawo wakala walume 52,700.
35 Welesi wa Efulaimu wakala lukolo lwa Shusela na lukolo lwa Bekeli na lukolo lwa Tahani.
36 Welesi wa Shusela wakala lukolo lwa Elani.
37 Zino izo ng'holo za kabila da Efulaimu, peta yawo wakala walume 32,500.
Zino ni nyelesi za Yosefu kwa kusondelela ng'holo zawo.
38 Welesi wa Benjamini wakala lukolo lwa Bela na lukolo lwa Ashibeli na lukolo lwa Ahilamu
39 na lukolo lwa Shufamu na lukolo lwa Hufamu.
40 Welesi wa Bela wakala lukolo lwa Alidi na lukolo lwa Naamani.
41 Zino ni ng'holo za kabila da Benjamini, peta yawo wakala walume 45,600.
42 Welesi wa Dani wakala lukolo lwa Shuhamu.
43 Luno ni lukolo lwa Shuhamu, peta yawo wakala walume 64,400.
44 Welesi wa Asheli wakala lukolo lwa Imina na lukolo lwa Ishivi na lukolo lwa Belia.
45 Welesi wa Belia wakala lukolo lwa Hebeli na lukolo lwa Malikieli.
46 Asheli kakala na mwana wa chike zina jake Sela.
47 Zino ni ng'holo za kabila da Asheli, peta yawo wakala walume 53,400.
48 Welesi wa Nafutali wakala lukolo lwa Yeseli na lukolo lwa Guni
49 na lukolo lwa Yaseeli na lukolo lwa Shilemu.
50 Zino ni ng'holo za kabila da Nafutali, peta yawo wakala walume 45,400.
51 Walume wose wa Isilaili wowapetigwe wakala 601,730.
52 Mndewa Mulungu kamulongela Musa,
53 “Makabila yano yezagoliligwa isi iwe uhazi wawo, kwa kusondelela peta ya mazina yawo.
54 Kabila kulu dizakwing'higwa hanhu hakulu na kabila dodo dizakwing'higwa hanhu hadodo. Chila kabila dizahokela uhazi wake fana viili peta ya wanhu wake.
55 Mbali isi izagoligwa kwa kutowa mhiya. Chila kabila dizakwing'higwa isi kwa viili mazina ya lukolo lwawo.
56 Uhazi wa chila kabila wizagoligwa kwa kutowa mhiya. Chila kabila dizapata kwa viili ukulu wake hebu udodo wake.”
57 Zino ni ng'holo za Walawi zozipetigwe hamwe na nyelesi zawo, lukolo lwa Gelishoni na lukolo lwa Kohasi na lukolo lwa Melali.
58 Iviya welesi wa Walawi wakala lukolo lwa Libini na lukolo lwa Hebuloni na lukolo lwa Mahili na lukolo lwa Mushi na lukolo lwa Kola. Kohasi kamweleka Amilamu.
59 Zina da muke wa Amilamu dikala Yokebedi, mwelesi wa Lawi, iyo yoyelekwe na Lawi kuna iisi ya Misili, nayo kamwelekela Amilamu wana waidi wa chilume, Haluni na Musa na Miliamu lumbu jawo.
60 Haluni kamweleka Nadabu na Abihu na Eleazali na Isamali.
61 Mbali Nadabu na Abihu wadanganika viwalavile moto haulondeka haulongozi wa Mndewa Mulungu.
62 Walume wowapetigwe, kwandusila weli na mwezi umwe na kugendelela wakala 23,000, mana wawo hawapetigwe mwa Waisilaili kwaviya wawo haweng'higwe isi kuwa uhazi hagati yawo.
63 Wawo ni walume wowapetigwe na Musa na mkulu wa nhambiko Eleazali, viwawapetile Waisilaili muna dibawe da Moabu habehi na lwanda lwa Yoludani uli malola na bululu da Yeliko.
64 Habule hata munhu imwe yasigale mwa iwaja wapetigwe na Musa na Haluni yeli mkulu wa nhambiko muna ichuwala cha Sinai.
65 Mana Mndewa Mulungu kawalongela, “Waisilaili wano wezadanganikila muna ichuwala.” Hasigale hata imwe viweli, ila Kalebu mwana wa Yefune na Yoshua mwana wa Nuni.