☰ Peta 16
16
Kola na Dosani na Abilamu wolema kulangulizigwa na Musa
1 Kola mwana wa Ishali, mwana wa Kohasi, mwana wa Lawi, kasola wanhu, hamwe na wanhu watatu wa kabila da Lubeni, watatu wawo wakala Dasani na Abilamu wana wa Eliabu na Oni mwana wa Pelesi, 2 wawo wose hamwe na Waisilaili wamwenga, wanhu magana maidi na malongo matano, walangulizi wakulu wowasaguligwe na wanhu, weli na nhogolwa, wenuka haulongozi wa Musa kwa ichimu cha kumulema. 3 Waiting'hana haulongozi wa Musa na Haluni na wawalongela, “Mweye muiyoha! Mting'hano wose wela, chila munhu kela na Mndewa Mulungu kahamwe na cheye wose. Mbona mweye moitenda wakulu wa wanhu wa Mndewa Mulungu?”
4 Musa viyahulike ivo, kaibwanha chingubingubi. 5 Maabaho kamulongela Kola na bumbila jake, “Igolo imitondo Mndewa Mulungu kezalagusa welihi weli wake na welihi welile, na yelihi yondayamkwenhukile, mana yondayamsagule niiyo yondayamkwenhuse kumwake. 6 Weye Kola na bumbila jako jose molondeka mutende vino. Soleni vetezo, 7 igolo muvigume moto na ubani, maabaho muvigale haulongozi wa Mndewa Mulungu. Munhu yosaguligwa na Mndewa Mulungu kokuwa kela. Mweye Walawi yofaya!”
8 Musa kamulongela Kola, “Tegelezeni mweye wana wa Lawi! 9 Vino mugesa kuwa mbuli ndodo kumwenu kuwa Mndewa Mulungu kambagulani mweye mwa Waisilaili wose muladi mumkwenhukile habehi na musang'hane hana dihema da Mulungu da Mndewa Mulungu na kwima haulongozi wa wanhu wose muladi kuwasang'hanila? 10 Kamtendani mweye hamwe na Walawi wamwenga wose muwe habehi nayo. Lelo molonda kusola hata sang'hano ya wakulu wa nhambiko? 11 Ivo weye na bumbila jako jose mumulema Mndewa Mulungu. Mweye mumulongelela Haluni, mbali ukweli momulongelela Mulungu.”
12 Maabaho Musa kalagiliza wakatangigwe Dasani na Abilamu, wana wa Eliabu, mbali wawo walonga, “Cheye hachizakwiza. 13 Vino ni mbuli ndodo weye kuchigala kulawa Misili, isi ili na ulongo unogile muladi uchikomele kuichuwala? Iviya koitunhiza weye mwenyewo muladi uwe mkulu wetu? 14 Huchigalile muna iisi ili na ulongo unogile, hebu huching'hile uhazi wa migunda, na migunda ya mizabibu, vino kolonda kuwatula yameso wanhu wano na kuwavwizila? Cheye hachizakwiza!”
15 Maabaho Musa kapata ludoko na kamulongela Mndewa Mulungu, “Sekeutogole nhambiko zawo. Niye sisolile hata chihongwe imwe kumwawo, hebu simulumize hata munhu imwe viweli.”
16 Musa kamulongela Kola, “Weye na bumbila jako jose, igolo mwize hano haulongozi wa Mndewa Mulungu, weye na wawo na Haluni. 17 Chila munhu muna dibumbila jake yasole chetezo chake na kuchiguma ubani, mugale vetezo magana maidi na malongo matano haulongozi wa Mndewa Mulungu. Iviya weye na Haluni muwe na vetezo.” 18 Ivo chila munhu kasola chetezo chake na kachiguma moto na ubani, na kwima na Musa na Haluni hana ihanhu ha kwingilila muna dihema da Mulungu. 19 Kola viyawaduganye Waisilaili wose muladi kuwalema Musa na Haluni hana ihanhu ha kwingilila muna dihema da Mulungu, utunhizo wa Mndewa Mulungu uwalawilila wanhu wose. 20 Mndewa Mulungu kawalongela Musa na Haluni, 21 “Muibagule mwa wanhu wano, muladi niwadanganize sambi.”
22 Mbali Musa na Haluni waibwanha chingubingubi na walila, “Weye Mulungu, Mulungu uweng'hile ugima wanhu wose, vino munhu imwe yahabananga kowehila wanhu wose?”
23 Maabaho Mndewa Mulungu kamulongela Musa, 24 “Walongele wanhu wasegele hana yamahema ya Kola na Dasani na Abilamu.”
25 Musa kenuka na kahita kwa Dasani na Abilamu, walala wa Isilaili wamsondelela. 26 Kawalongela wanhu wose, “Segeleni hana yamahema ya wanhu wano wehile! Sekemudalise chinhu chawo chochose, buleivo mwizadanganizigwa, mana wawo wose watenda uhasanyi.” 27 Ivo wasegela hana yamahema ya Kola na Dasani na Abilamu. Dasani na Abilamu walawa kunze, wema hana ihanhu ha kwingilila muna yamahema yawo, hamwe na wake zawo na wana wawo wose mbaka wana wokong'ha.
28 Maabaho Musa kalonga, “Kwa mbuli ino mwizavimanya kuwa Mndewa Mulungu kanituma nitende mbuli zino zose, kuwa sitendelile kwa magesa yangu. 29 One wanhu wano wahadanganika fana viwodanganika wanhu wose bila kugazigwa na Mndewa Mulungu, baho Mndewa Mulungu hanitumile.
30 “Mbali one Mndewa Mulungu kalumba chinhu cha sambi na isi iyo igubuka na kuwamela hamwe na wose wowakalile nawo, nayo iwamela wang'hali wagima nawo wezahita kuzimu. Baho mwizavimanya kuwa wanhu wano wamzeha Mndewa Mulungu.”
31 Bahaja viyakomeleze kulonga mbuli izo zose, isi iyakalile Dasani na Abilamu igubuka. 32 Iwamela wanhu wawo na kaye zawo, hamwe na bumbila jose da Kola na vinhu vawo vose. 33 Ivo wawo na vinhu vawo vose wagidimila kuzimu. Isi iwagubika, wose wadanganika. 34 Waisilaili wamwenga wowakalile habehi viwahulike kuguta kwawo, wakimbila na walonga, “Chikimbile, isi yodaha kuchimela na cheye iviya!”
35 Maabaho Mndewa Mulungu kagala moto na uwalunguza wanhu magana maidi na malongo matano wowafukize ubani.
36 Maabaho Mndewa Mulungu kamulongela Musa, 37 “Mulongele Eleazali mwana wa mkulu wa nhambiko Haluni yakasegeze vetezo hana umoto, mana vetezo ivo vela. 38 Vela kwaviya wanhu wano wavigala hana ulupango lwa Mndewa Mulungu. Ivo visole vetezo va wanhu wawo wowakomigwe kwa ichimu cha uhasanyi wawo, vovihondigwe kuwa visisili muladi viwe ngubiko ya lupango. Dino dizakuwa lamulo kwa Waisilaili wose.”
39 Ivo Eleazali mkulu wa nhambiko kasola vetezo va shaba vovigaligwe na wanhu waja, vihondigwa kuwa ngubiko ya lupango. 40 Dino diwe kumbukumbu kwa Waisilaili kuwa munhu yoyose yeli siyo mkulu wa nhambiko, yani yeli siyo wa welesi wa Haluni, sekeyahite hana ulupango kumfukizila ubani Mndewa Mulungu. Buleivo kezadanganizigwa fana Kola na bumbila jake. Yano yose yatendeka fana Mndewa Mulungu viyamulagilize Eleazali kufosela Musa.
Haluni kowakombola wanhu
41 Igolo yake Waisilaili wose wawalongelela Musa na Haluni. Walonga, “Muwakoma wanhu wa Mndewa Mulungu.”
42 Mbali mting'hano wose viwaiting'hane haulongozi wa Musa na Haluni muladi kulongelela, wahinduka kulola dihema da Mulungu, wawona wingu digubika hema da Mulungu na utunhizo wa Mndewa Mulungu ulawilila hanhu baho. 43 Musa na Haluni wahita kwima haulongozi wa hema da Mulungu, 44 na Mndewa Mulungu kamulongela Musa, 45 “Segeleni kwa wanhu wano, muladi niwadanganize sambi!”
Mbali wawo waibwanha chingubingubi. 46 Musa kamulongela Haluni, “Sola chetezo chako uchigume moto woulawa hana ulupango, maabaho uchigume ubani uhite nacho kwa wanhu himahima ukawatendele kuilumba. Ludoko lwa Mndewa Mulungu luwafikila na hulo jandusa kuwapata.” 47 Haluni katenda fana Musa viyamulagilize. Kasola chetezo chake na kakimbila mbaka hagati ya wanhu wowaiduganye hamwe. Viyawone hulo jandusa, kaguma ubani muna ichetezo na kuwatendela wanhu kuilumba. 48 Viyatendile ivo, hulo ijo dileka, nayo kasigala hagati ya wanhu wadanganike na weli wagima. 49 Peta ya wanhu wowadanganike kwa hulo ijo wakala 14,700, bila kuwapeta waja wowadanganike kwa ichimu cha kuleka kwaminika kwa Kola. 50 Hulo vidikomelezeke, Haluni kabwela kwa Musa hana ihanhu ha kwingilila muna dihema da Mulungu.
☰