4
Umbwiya na vinhu va isi
1 Ng'hondo na ndwagi kumwenu volawa kulihi? Volawa muna zitamaa zenu za madambwa zoziitowa mgati ya ng'huli zenu.
2 Molonda chinhu mbali mwabule chinhu, mokoma na kuwona migongo, mbali hamdaha kupata, kwa ivo motenda ng'hondo na kuitowa. Mwabule chinhu kwaviya hamumpula Mulungu.
3 Iviya muhapula hamuhokela kwaviya mopula vihile, mopula vinhu muladi muvisang'hanile kwa tamaa zenu za madambwa.
4 Mweye wazinzi! Vino hamuvimanyile kuwa mbwiya wa isi yose ni mwihi wa Mulungu? Wanhu wowolonda kuwa mbwiya wa vinhu va isi ni mwihi wa Mulungu.
5 Mogesa kuwa Maandiko Yelile yolonga bule viyalongile, “Mulungu kowona migongo ng'hani kwa ichimu cha muhe ija iyamwikile mgati yetu.”
6 Mbali Mulungu kachitendela unovu ng'hani. Fana Maandiko Yelile viyolonga, “Mulungu kana udugi kwa wanhu woigoda mbali koweng'ha unovu wake wanhu waja woinyendanyenda.”
7 Ivo mtegelezeni Mulungu. Muwe na udugi na Mwihi, nayo kezamkimbilani.
8 Mkwenhukileni Mulungu, nayo kezawakwenhukilani. Sunheni makono yenu mweye wahasanyi! Safyeni mizoyo yenu mweye wadelenya!
9 Muwe na usungu na lileni na kulila kwa giyo giyo na seko zenu zigaluke ziwe ndilo, na ndeng'helelo yenu igaluke kuwa luholozi!
10 Inyendeninyendeni haulongozi ha Mndewa, nayo kezamwinulani.
Lamulo kwa mbuli ya kuwalamulila nhaguso wakaya wayago
11 Ndugu sekemuilonge vihile mweye kwa mweye, yondayamulonge vihile ndugu yake na kumulamulila nhaguso ya Mulungu, iyo koyalonga vihile na kuyalamulila nhaguso malagilizo ya Mulungu. One uhayalamulila nhaguso malagilizo, basi weye huyasondelela malagilizo bule, mbali koyalamulila nhaguso.
12 Mulungu yaidumwe yokwika malagilizo na yotagusa. Yeye yaidumwe yoyodaha kulopola na kunanga. Ivo weye iyo yelihi youwalamulila nhaguso wakaya wayago?
Lamulo kwa mbuli ya magoda
13 Nitegelezeni mweye womulonga, “Diyelo hebu igolo chizahita kudibululu dimwenga mwaka mgima chizachuuza vinhu kupata faida.”
14 Mbali hamuvimanyile ugima wenu vondauwe igolo! Mweye mulinga fana kungugu dodilawilila kwa lusita luguhi na kuhalawa.
15 Ila molondeka kulonga vino, “One Mndewa yahalonda, chizakala na kutenda vino hebu viya.”
16 Mbali lelo moigoda na kuitogoza, magoda yose yalingile ivo yeha.
17 Ivo munhu yoyayamanyile yanogile yoyolondeka kutenda mbali hayatenda, munhu iyo kasang'hana uhasanyi.