19
Wihi wa Sodoma
1 Wasenga wa kuulanga waidi wafika Sodoma ichigulogulo, Lutu kakala yakalile hana ulwivi lwa dibululu. Viyawawone, kahita kuwahohela na kuwatumbalila mavindi mbaka chihanga chidalisa hasi.
2 Kalonga, “Wenevale wangu, ingileni muna ikaye yangu niye msang'hani wenu. Modaha kunawa nhende na kugona chilo cha diyelo, igolo imitondo modaha kusegela na kugendelela na mwanza wenu.”
Mbali wawo wamwidika, “Bule, chizakala chilo chose hano hana ulubuga.”
3 Lutu kawabembeleza ng'hani mbaka watogola, wahinduka na kwingila muna ikaye yake. Lutu kawasasalila magate hayagumigwe lusu na kasasalila dugila kwa manyambenyambe. Manyambenyambe waja zindiya zisasaligwe.
4 Nyambenyambe wang'hali hawanagona, walume wa Sodoma waizunguluka kaye ya Lutu. Walume wose wa bululu diya, wakulu na wadodo wakala baho.
5 Wamtanga Lutu kunze na wamuuza, “Wakulihi walume waja wezile kumwako? Chilavile kunze muladi chiwabandame.”
6 Lutu kalawa kunze na kahinda ulwivi.
7 Kawalongela, “Mbwiya zangu, nowalamba sekemutende wihi uno.
8 Mbali ninawo wali waidi wang'hali mhambe. Lekeni nimwing'heni wawo na mweye mwizawatenda chochose chimulonda kuwatenda. Mbali wanhu wano sekemuwatende chochose, kwaviya wano ni nyambenyambe wangu, nolondeka niwakalize.”
9 Mbali wawo walonga, “Teng'hu segela hano! Weye kwa nyambenyambe, na weye kwa yelihi kochilongela cha kutenda? Koitenda weye kwa msemi wetu? Ivo chokutenda yehile kufosa wawo wafosanzila wako.” Wamsung'ha Lutu kuchisogo wamsegeza mbaka walonda kulubena ulwivi lwake.
10 Mbali waja iwanhu waidi wowakalile mgati, wagolosa makono yawo, wamkwesa Lutu mgati mwa ikaye na kuluhinda ulwivi.
11 Maabaho kawatenda wanhu wose wowakalile haulwivi watulike yameso, wakulu kwa wadodo, mbaka hawadahile bule kulupata ulwivi.
Lutu kosegela Sodoma
12 Wanhu waja iwaidi wamulongela Lutu, “One kuna munhu yoyose yokala hano, wanago wa chilume na wandele zako na wakoyi hebu ndugu imwenga yokala muna dibululu, uwalave hanhu hano himahima.
13 Chizahananga hanhu hano, kwaviya kuiyalala kwa wanhu wa hano kumfikila Mndewa Mulungu, nayo kachituma chidinange bululu da Sodoma.”
14 Maabaho Lutu kawagendela wakoyi zake wowolonda kuwasola wandele zake na kawalongela, “Segeleni hano himahima, Mndewa Mulungu kohananga hanhu hano.” Mbali wawo wamuwona fana viya kehuka.
15 Vikuchile wasenga waja wa kuulanga wamulongela Lutu, “Lopola na umsole muke wako na wano wandele zako waidi muladi sekemwize kunangigwa lusita bululu dino vondaditagusigwe.”
16 Mbali Lutu kakalama. Kwaviya Mndewa Mulungu kamuwonela ubazi, waja iwasenga wa kuulanga wawamha Lutu na muke wake na wandele zake waidi, wawalava mudibululu.
17 Viwakomeleze kuwalava, imwe wa wasenga waja wa kuulanga kalonga, “Kimbileni muladi muhonyeke. Sekemulole kuchisogo na sekemwime muna dibawe, kimbilileni muna imilima muladi sekemukomigwe.”
18 Mbali Lutu kamwidika, “Siyo, wenevale wangu.
19 Muninogela na kunihonya ugima wangu kwa kunilagusa ulondo. Mbali milima yakutali, ivo kunangigwa kuno kwizanifika ning'hali sinafika uko na nizadanganika.
20 Loleni kuja kuna bululu dodo nodaha kudikimbilila kwaviya dahabehi. Lelo nilekelele nikimbilile uko. Diya ni bululu dodo muhala na uko nizahonyeka.”
21 Nayo kamwidika, “Vinoga, nitogola chiupulile, sizadinanga bululu diya.
22 Kimbila! Himahima! Sizadaha kutenda chochose mbaka vondaufike uko.”
Lutu kaditanga bululu ijo “Soali” fambulo jake “Dodo.”
Kunangigwa kwa Sodoma na Gomola
23 Zuwa dikala dilawile lusita Lutu viyafikile Soali.
24 Maabaho Mndewa Mulungu kagala makala ya moto kulawa kuulanga muna yamabululu ya Sodoma na Gomola.
25 Kayananga mabululu yayo na bawe jose na wanhu wose wowakalile uko na mimeya yose yoikalile muna isi.
26 Mbali muke wake Lutu kalola kuchisogo na kagaluka mhanda ya munyu.
27 Igolo yake imitondo, Bulahimu kahita himahima hoyakalile kema haulongozi ha Mndewa Mulungu.
28 Viyakalile baho, kalola Sodoma na Gomola na banzi zose za dibawe, kalola na kawona yosi dofuka kulawa muna isi, yosi fana viya da tanuli kulu.
29 Baho Mulungu viyanangile mabululu ya dibawe Lutu hoyakalile kokala, kamkumbuka Bulahimu kwa kumulava Lutu muna yamabululu yano, muladi Lutu sekeyanangigwe.
Mwanduso wa Wamowabu na Waamoni
30 Kwaviya Lutu kakala kodumba kukala Soali, yeye na wandele zake waidi wasegela kuna na wahita kukala kuna dituka kuna imilima.
31 Imndele imkulu kamulongela mdodo wake, “Sambi tati yetu mulala na muna iisi habule mulume wa kuchisola chipate wana fana viili muna isi.
32 Lelo chimng'wize upele tati yetu muladi chidahe kwiibandama nayo chimwelekele wana.”
33 Ichilo icho wamng'wiza upele tati yawo, na imndele imkulu kahita kaibandama nayo. Mbali tati yake havimanyile bule lusita imndele wake viyaibandame nayo, kwaviya kakala yakoligwe.
34 Igolo yake imndele imkulu kamulongela imdodo, “Niibandama na tata ichilo, Lelo leka chimng'wize upele kaidi maabaho weye wiibandame nayo, ivo chose chizakweleka nayo wana.”
35 Ivo ichilo icho wamng'wiza upele tati yawo, maabaho ija imndele imdodo, kahita kaibandama nayo. Mbali tati yake havimanyile bule lusita mndele wake viyaibandame nayo, kwaviya kakala yakoligwe.
36 Kwa nzila ino wandele wose wa Lutu weng'higwa wimo na tati yawo.
37 Imndele imkulu keleka mwana na zina jake kamtanga Moabu, iyo niiyo wasaho yawo Wamoabu mbaka diyelo.
38 Imndele imdodo iviya keleka mwana na zina jake kamtanga Benami. Iyo niiyo wasaho yawo Waamoni mbaka diyelo.