22
1 “One uhamuwona ng'ombe hebu ng'hondolo wa mkaya miyago kaga, sekeumuleke, mbali umbweleze kwa mwenyewo.
2 One ukaye kwa mkaya miyago kuhawa kutali hebu one hummanyile, basi hita nayo ukaye yako, ukakale nayo mbaka mwenyewo vondayeze, umbwelezele.
3 Iviya tenda ivo ivo uhawona chihongwe hebu mawalo hebu chinhu chimwenga chochose chondayagize mkaya miyago. Sekeuleke kumtaza.
4 “One chihongwe hebu ng'ombe wa mkaya miyago kagwa hasi mumgwazo wa nzila, sekeumuleke, mwinule yeme kwa magulu yake kaidi.
5 “Muke sekeyayawale viwalo va chilume na mulume sekeyayawale viwalo va chike. Mndewa Mulungu, Mulungu wenu, komwihila munhu yotenda mbuli zino.
6 “One uhawona chisanza cha ndege china makinda hebu mafinga, na ndege mwene makinda yayo kayagubika makinda yayo hebu mafinga, sekeumsole ndege na makinda yake.
7 Kodaha kusola kinda da ndege, mbali umuleke mami yake yahite. Uhatenda ivo kwizatemeligwa mate na kwizakala siku nyingi.
8 “Vondauzenge kaye, zenga ng'huta banzi zose za digulu, muladi sekeugale ubananzi muna ikaye yako munhu yahagwa uko.
9 “Sekeuhande mizabibu yako hamwe na matunda yamwenga, wahatenda ivo, matunda yose yezakuwa yambula mwiko, siyo yaja youhandile muhala, mbali na matunda ya mizabibu iviya.
10 “Sekeulime mgunda kwa kusang'hanila ng'ombe na chihongwe hamwe.
11 “Sekeuyawale mawalo yasonigwe kwa sufu na chitani hamwe.
12 “Funga mahambo muna zimhembe nne za walo jako.
Malagilizo kusonhela mbuli za sola
13 “One munhu yahasola muke na kumbandama na hamwande kalamula kumwasa,
14 na kumulongeleza mbuli za chinyala na kamulonga vihile, kalonga, ‘Nimsola muke ino na vinimbandame, siwonile umhambe wake,’
15 maabaho tata na mama wa mwanamke iyo wezasola chitambala cha chilagusa kuwa muke iyo kakala mhambe na kuchilagusa kwa walala kuna ulwivi lwa dibululu.
16 Maabaho tata wa mwanamke iyo kezawalongela walala, ‘Mulume ino nimwing'ha mwanangu yamsole, mbali sambi hamulonda kaidi.
17 Kavwiza na kalonga kuwa viyamsolile hakalile mhambe bule. Mbali chino ni chilaguso chochilagusa kuwa mwanangu kakala mhambe.’ Maabaho tata na mama wa muke ija wezakunjula chitambala haulongozi wa walala wa bululu.
18 Maabaho walala wa bululu wezamsola mulume ija na kumulanha mibalati.
19 Iviya wezamulongela mulume iyo yalave vihande gana va hela na kumwing'ha tata wa mwanamke iyo, kwaviya kamguma chinyala mwanamke iyo wa Isilaili. Nayo kezagendelela kuwa muke wake na hezamwing'ha chibuwa cha nyasa ugima wake wose.
20 “Mbali one mbuli iyo ihawa kweli na habule ukalangama wa umhambe wake,
21 wezamgala kunze ya lwivi lwa kaye ya tati yake, walume wa bululu jake wezamtowa na mabwe mbaka yadanganike. Kwaviya kaiguma chinyala isi ya Isilaili kwa kugona na mulume yang'hali hanasoligwa, kuno yang'hali kokala muna ikaye ya tati yake. Kwa kutenda ivo mwizasegeza wihi kumwenu.
22 “One mulume yahagwiligwa ugoni na muke wa munhu imwenga, wose waidi wolondeka wakomigwe. Kwa kutenda ivo, mwizasegeza wihi uwo muna iisi ya Isilaili.
23 “One mulume yahagwiligwa mudibululu kombandama mhambe yoyauzigwe na mulume imwenga,
24 wose waidi mwizawalava kunze ya bululu na muwatowe na mabwe mbaka wadanganike. Muke iyo kolondeka yakomigwe kwaviya hagutile ng'hondo kupula yatazigwe, ingawa kakala muna dibululu. Na mulume kolondeka yakomigwe kwaviya kamguma chinyala muke wa miyage. Kwa kutenda ivo mwizasegeza wihi uno vimwili.
25 “Mbali one mulume yahaiting'hana na muke yoyauzigwe na mulume imwenga kuchuwala, yahamgwila na kumbandama, mulume muhala niiyo yondayakomigwe.
26 Muke iyo sekeyatendigwe chinhu chochose kwaviya hatendile uhasanyi wowose wa kumtenda yakomigwe. Mbuli ino ilinga fana munhu yomzumhila miyage na kumkoma.
27 Mulume iyo kamgwila mhambe iyo kwa nguvu kuna ichuwala, ingawa kaguta ng'hondo kupula yatazigwe, mbali hapatile munhu wa kumtaza.
28 “One mulume yahafikigwa kombandama mhambe hanauzigwa,
29 mulume iyo kezamwing'ha tata wa mhambe iyo vihande malongo matano va hela, kwaviya kamguma chinyala muke iyo, nayo kezakuwa muke wake. Halondeka kumwing'ha chibuwa cha nyasa siku zose za ugima wake.
30 “Mulume yoyose sekeyambandame muke wa tati yake, muladi sekeyamgume chinyala tati yake.