5
Edede Bedi papeo pico naqquini idijaro
1 Nadsapa deni tojahicca huihuittari bicabotedsa huittari canahihuaji qqui onaneje pohua dsepe nahatoniccadsa papeo pico naqquini dsojo tojidsajari. Bodihuaji dsodo, huapihuaji dsodo najaro. Nepi tamaroni 7 nehe cajijaro.
2 Diocca dodosse dacorabote ojaria qqui onajari. Pohua atti mohui tadsa huati tajari: —¿Nejecojarina ima jijirade bicabote deni tojajari? Najarina papeo pico naqquini nepi nacossaridsani ssoja ijidsadsa inahabanijine bica tahi −nahi omittade.
3 Naraha aja memehuajicca, namihuajicca, nami bodihuajicca naco papeo pico naqquini inahabamananijine huapima pajiramanaja cama-jarahi. Bodicca ima qqui quinanijine naqui pajiramanaja cama-jarahi.
4 Nadsapi oji oji onade. Jaho, madija ima jijirade bicabote deni tojajari papeo pico naqquini inahabanijine nohuerahi. Qquide naco pajiramanaja cama-jarahi, onade.
5 Naraha nahihuaji cacahuadedeni jassi nahuajanijari 24 quinajari ojaria ohuadsa huati tajari: —Oji tejeraji, aja Isaraeri bedi Joda potemahi dacorehe cajijari pina dsomajissa najari. Najaripa Isaraeridenicca tamine Dabi Potemahi. Pohuana dsoqquehedsa deni tojajari. Papeo pico naqquini inahabanijine pajirahi. Pohuana nepi nacossanicca 7 nehe ssoja ijidsaridsanijine bica tahi −nade ohuadsa.
6 Nadsapa deni tojahicca huihuittari bicabotedsa huittari canahihuaji qqui onanaja Edede Bedi Jeso pina inanadsoqque-manapojarissa naraha hua canajari. Pohuapa camittehe cajimanajarideni 4 quinajari, cacahuade 24 quinajari domodeni huahi nocconidsa huajari. Aja ori 7, nocco 7 najaripa Dio Corime 7 naha dsama huapimadsa qquide jahiridsahijine Dio dosse inabaqquijari.
7 Nadsapa Edede Bedipa papeo pico naqquini idinijine deni tojahicca huihuittari bicabotehuaji toccajari. Nahidsa huittarijari dsepe nahatoniccadsa papeo dsojo ijidsajaro idijaro.
8 Najaro papeo ididsapi camittehe cajimanajarideni 4 quinajari, cacahuadedeni 24 quinajari tedseje Edede Bedi pohua tocattahihuaji pohuadeni pitodsa jassi tajari. Pohuadenipa titire oni arpa cajimanajari. Pohuadeni dsepedsa tasao oro nahatoni bodidsa nahatohui majo bicabote caji naha dsojo dsojo tojidsamaneri najari. Majo bicabote tohuessidsa jami-mi canajaripa Diocca madija Pohuadsa huati huati totoquina nahicca ima.
9 Pohuadenipa ajie dsati jiri icanamanadsapi ajama quinajari:
—Tiana bicabote deni tijani ojari tajaro. Papeo pico naqquini tidijaro bica tani.
Nepi tamaroni 7 nehe cajiraha ssoja tijidsanijine bica tani.
Tiana tia inanadsoqque-manadsa temene toccajarodsa Diodsa toquejenahijine mitta tinabaqquijaride.
Aja madija dsama onihi onihidsa madiridsamanajarideni mota, tohuatti onihi onihi cajiridsamanajarideni mota, huapideni onihi onihi cajiridsamanajarideni mota tijine Diodsa toquejenaridsajari.
10 Tijinepi Abi Diocca cacahuehedsa tamine toquejenaridsajari.
Tijinea Abi Diodsa dsepedeni ihijimana najari. Pohuadsa huahuati toqquimade toquejena, dada toqquimade toquejena najari. Pohuadsa jiri jiri quiquinanajaripaja.
Aji namihuaji madimanajarideni huapima dossede toquejenaridsahitohui −quinade, jiri jiri quinadsa.
11 Nadsapi qqui onaneje deni tojahicca huihuittari bicabote cahittarinihuaji Diocca dodosse tabaqqui memehuajicca huapima attideni omittajaro. Nahi huihuittari cahittarinihuajipi camittehe cajimanajarideni domo huahuajani, cacahuadedeni naco domo huahuajani nahi idedenihuaji Diocca dodosse tabaqqui qqui onabaqquiraha siba tahi.
12 Najaridenipa jiri jiri quinadsa attideni mohui taha ajama quinajari:
—Edede Bedi dsoqquepojaripa deni tojajari.
Pohuana huapimadsa dosse dosse nahi pajirahi, bica tahi.
Dsama huapimacca biquehe pohuadsa tojanijine bica tani.
Pohuana bodi nahato tahi ojari nahi.
Pocca dacorehe deni tojani bica tani.
Huapima attidenipa: “Tiana icca Tamine deni tojahicca.
Ticca deni tojehe nema dsanapona” quinana, inajaro.
Pohuadsa etidsedsa: Tiana bica tinani, deni tijani, inanijine bica tani −quinade.
13 Nadsapa Diocca nahatonaja huapima attideni omittajaro. Memehuajicca, namihuajicca, nami bodihuajicca, passo imenicca jiri jiri quinadsa ajama quinajari:
—Deni tojahicca huihuittari bicabotedsa huittari canajaridsa,
Edede Bedi pohuadsa naco etidsejaro.
Pohuadenidsa etidsedsa: Tiadenina icca Tamine deni tiquejenanicca.
Ticcadeni deni tojehe nema dsanapona, inajaro.
Ticcadeni dacorehe deni tojani, bica tani, inajaro.
Najaro ima bicani nemanehepi tiadenidsa nema dsanaponitohui, inajaro −quinade.
14 Nadsapa camittehe cajimanajarideni attidenipa: —¡Pajissa nema nana! −quinade. Nadsapa cacahuade 24 quinajarideni pohuadeni pitodsa jassi tadsa deni tojahicca huihuittari bicabotedsa huittari canajaridsa huatidsemanajari. Edede Bedidsa naco huatidsemanajari.