SAMUEL-GARDA-SOGBOGWAD
2 SAMUEL
GEBE-SOGLENAID
Garda-nug
Samuel-Garda-Sogbogwad. We-garda, garda-idualedbo gwadilenaid, amba a-igarba sunmaklenaimogad. Degi-inigwele, Rey-Davidʼgi bur bule sunmaklenaid.
Samuel-Garda-Sogbogwadgi weyob sunmaklenaid.
We-gardagine, oyonaid igi-David, Rey-Saúl-sorbali, Reyga-megnoniki. David, Hebrón-neggweburgi-gudii, Judá-e-reyga nug-imaklesad. Deunni, David birga-durgwen-gakambe (30) nikad. Geb Israel-dulemar-e-reyga David nugsalesbalid. Bela birga-dulabo (40) negsemai gusad.
We-gardagine, weyob ilemakar sunmaklenaid:
1. David Reyga megnonikid (1:1–5:10).
2. David yar-sealid (5:11–8:18).
3. David Reyga-maigu, bonigan nosad (9:1–20:26).
4. David Gabaón-dulemarbo igar-nudaksad, degi, masdummagan-oburgwisad (21:1-22).
5. David-e-namaked (22:1-51).
6. David-napi-sunmaksad, degi, e-sorda-dummagan (23:1-39).
7. Israel-sordamar ebislesad (24:1-25).
Be itogua.
1. DAVID REYGA MEGNONIKID
1
(1:1–5:10)
David, Rey-Saúl-burgwisad wisgunonikid
1 Rey-Saúl-burgwisad-sorbali, David, Amalec-dulemargi-nakwisbargua, Siclag-neggweburse nonikid. Agi, ibabo gudii gusad.
2 Ibapaagusgua, dule-gwensak Davidʼse nonikid. We-dule Rey-Saúl-sordagan-bukmaladgi danikid. E-mor-yoid siir-siir-nonikid, e-nono olli-sichi nonibalid. We-dule Davidʼse nonigua, David-asabin dulluu napase imakded.
3 Geb David ese egisded:
—¿Bia be daniki?
We-dule David-abin sogded:
—Israel-sordamar-danar-danar-bukwadgi an wakicha-danikid.
4 David ese egisdebalid:
—¿Igi neg-gusa? Bela anga sogo, mer angi odukuo.
We-sorda abin-sogdebalid:
—Israel-sordamar bila-ononagu, bela sikirmakdemalad, bukidar oburgwilesmalad. Degine, Saúl, e-machi-Jonatánʼbogwa oburgwilesmogad.
5 David sorda-ega-gayaburba-senonikidga sogded:
—¿Igi be nabir wisi, Saúl, e-machi-Jonatánʼbogwa oburgwilesa?
6 We-sapingwa-ega-gayaburba-senonikid abin-sogdebalid:
—Gilboa-yar-nugadse binsa an atakdinad. Agi an Rey-Saúl, eswargi-akani-gwichi an dakalid. Aginbali, e-isdarmalad egi ebirdani an daksabalid. E-isdarmalad ur-napaginmaladgi egi daniki, degi, moli-birgi-sii egi danimarbali an daksad.
7 Saúl ansik-aibiriargua, an-daksad, geb anse gollalid. Agine, an abin-imakdemogad: ‘Degite, sogdeen.’
8 ”Geb anse egichialid: ‘¿Be doawa?’ Geb an abin-imakded: ‘An Amalec-duled.’
9 ”Geb Rey-Saúl anga sogdebalid: ‘Be an-oburgwe, an geggusa, an-bar-guosuli.’
10 ”Agi, an ese nadsunnad. An dakdegua, Saúl bar-san-onogosuli, an oburgwissundo. Dummad, Rey-Saúl-ibe an e-ologurgin susad, or-swidagi-nagumaladse-bakar e-ibe an susbalid, bega-sedagega.”
11 David bela itosgua, naibid-dummad itononikid. A-ular, e-mor-yoid na siir-imaksad. David-e-sordagan itosmarmogua, deyob imaksamarmogad.
12 Rey-Saúl, e-machi-Jonatán-ebo es-suidse ibitosmalad-ulale, dummad-bonanai-guarmalad, bar-mas-itossurmalad, neg-mutikidse. Deginbali, Bab-Jehová-sordamar-ibitosmaladga, degine, Israel-dulemarga, bonanai-guarmarbalid, ar es-suidse ibitosmalad.
13 Geb degine, David, sapingwa-ega-gayaburba-senonikidse egisdebalid:
—¿Be bialidi?
Sapingwa abin-sogded:
—An Amalec-dule, an Israel-dulesuli.
14 David sabsur ega sogded:
—¿Ibiga yogasaar be Rey-Saúl-oburgwisa? Ar wede, Bab-Jehová na nug-imaksa gudinad.
15 Degisoggu, David e-sorda-gwensakse goted, ega sogded:
—¡We-dule anga oburgwe!
Sorda David-sogedba imaksad, Amalec-dule-oburgwissunnad.
16 Degi-gunai, David sogdebalid:
—Na be dukin ablis-eosad, ar dukin na be-barsogsad, ar be sogsad: ‘An Bab-Jehová-dule-nug-imaksa-gudiid oburgwisye.’
David, Saúl-burgwisadba, degi, Saúl-machi-Jonatán-burgwisadba namaksad
17 David, Saúl-ulale, degi, Saúl-machi-Jonatán-ulale bukib-binsadiidba, we-namaked namaknai gualid.
18 A-namaked weyob nug-imaksad, “warsigi-namakleged-igar.” Degine, we-igargi bela Judá-dulemar-odurdakmarbaloye sogsad. We-namaked Jaser-gardagi weyob narmakar maid:
19 “¡Israel-dulemar, nue-wilesmar!
Sordamar-nug-nikamalad, Israel-yalaganba nue-ibitos.
Israel-sordamar-niga-gandikmalad, ibsas oburgwilesmar.
20 ”Gat-neggweburgi mer egi sunmaknai gumalo,
Ascalón-galimbaba mer be a-obardii gumarbalo,
adi, Filistea-omegan, Bab-Dummad-wissur-gudimalad-e-sisgan, egi mer wergumalagar,
ega mer gwirnanai gumarbaligar.
21 ”Gilboa-yalagan, melle bar begi dii wio,
begi bar boo batosulid,
napa-nabir-sanmakedga be bar guosulid.
Ar Gilboa-yalagi Saúl-e-sigu-abgaedgi dodolesad.
Agi Israel-sorda-niga-gandikmalad-e-sigu-abgaed, gutu-nagusadba, e-dakarmaked bergusad.
22 ”Jonatán-warsi, dulemar-abe-eossuli geg aibired,
dulemar-oburgwissuli, geg aibirbalid.
Saúl-es-suid ablis-eogedse damogad.
23 ”Saúl, e-machi-Jonatánʼbogwa an-ai-nueganmalad.
Dula-gudiunni, na bangudsurmalad.
Burgwedgine, na bangussurmarbalid.
Ebogwadi, sulubbali bur gwae-gwae nanamalad,
achumigur-nono-wawaadbali, bur bule gangumarbalid.
24 ”Israel-omegan, Saúl-burgwisadga be bomala.
Saúl, mor-ginnid-nuegan-yoega, degi, lino-mor-nued-yoega, bemar-imaksad,
olo-bired-yoega bemar-imaksabalid,
a-ulale, ega be bomala.
25 ”Israel-dule-niga-gandikmaladi, bila-onogedgi ibiyob wilesmar.
¡Bila-onolegedgi burgwismalad!
¡Jonatán, Gilboa-yalagi oburgwilesad!
26 Jonatán, naibid-dummad be anga uksad.
An-gwenadyob an be-sabgusad,
wilub-obicha be an-akwisad.
Be-sabgued omegan-sabgulegedba bur bule be an-sabgusad.
27 ”¡Israel-dule-niga-gandikmalad, bila-onolegedgi nue ibitosmar!
Gingimar-bila-onogedgi-ebulemalad, bela bibichisad.”