5
Rubén-wagan
1 Rubén, Israel-machi-sailaginedid. Rubén e-bab-omegi-dodosad-ular, bar machi-sailaginedyob gunonisulid. Ibmar-egadga-guoenadi, Israel-machi-José-e-masmalaga uklessunnad.
2 Ar Judá bur bule e-gwenadganba gandik-megis-inigwele, degine, e-gwenadgan-dummadga-gusbar-inigwele, degite, ibmar-Rubénʼgadga-guoenadi ega uklessulid. Aka Joséʼga, degi, José-e-waganga uklesad.
3 Israel-machi-sailagined-Rubén-e-masmala, wemalad:
Hanoc, Falú, Hezrón, Carmi.
4 Joel-e-wagan, wemalad:
Joel-e-machi, Semaías,
Semaías-e-machidi, Gog. Gog-e-machidi, Simei.
5 Simei-e-machidi, Micaía.
Micaía-e-machidi, Reaía. Reaía-e-machidi, Baal.
6 Baal-e-machidi, Beera.
Beeraʼde, Rubén-e-sordamar-e-dummadid.
Asiria-e-rey-Tiglat-Pileser Beera-gasa sesa gusad.
7 Beera-e-gwenad-e-gwenadganba, nug-ilemakar-maid, wemalad:
Jeiel, e-gwenadgan-e-dummad, Zacarías.
8 Bela, Azaz-e-machi, Azazʼdi, Sema-e-machi,
Semaʼdi, Joel-e-machi.
Zacarías, degi, Belaʼmala, Aroer-neg-nugadgi gudii gusad. Aroer-akar Neboʼye-neg-nugadse, degi, Baal-Meón-neg-nugadse napa ganonikid.
9 Deginbali, e-moli-bebe-nikamalad Galaad-yargi ichesur mergusbarsoggu, agala, dad-nakwedsik Éufrates-diwar-maid-akale, nega-dulesulidgan-onodedse, neg-ganonibalid.
10 Rey-Saúl-negsemaigua, Rubén-e-wagan, Agareno-dulemargi bila-onos gusmalad, geb egi naknoni gusmalad. Degidba, Rubén-e-wagan, bela Galaad-yar-naidgi dad-nakwedsik megismalad. A-e-negmar-bukwadgi gudii gusmalad.
Gad-wagan
11 Gad-e-wagan, Rubén-e-wagan-bukwad-asabin Basán-yargi ambikusmalad, degi, Salca-yar-naidse ambikusmalad:
12 Joel, Basán-neggweburgi dummadga-megnonikid.
Joel-sorbalid, Safánʼye nugad.
Amar-sorba, Jaanai, Safatʼbogwa megnonikid.
13 E-gwenadgan e-babgangi-danimalad, wemalad:
Micael, Mesulam, Seba,
Jorai, Jacán, Zía, degi, Heber.
Bergwable walagugle (7) gumalad.
14 Wemar-e-babgan weyob danikid:
Abihail, Huri-e-machi, Huriʼdi, Jaroa-e-machi,
Jaroaʼdi, Galaad-e-machi, Galaadʼdi, Micael-e-machi,
Micaelʼdi, Jesisai-e-machi, Jesisaiʼdi, Jahdo-e-machi,
degi, Jahdoʼdi, Buz-e-machi.
15 Degine, Abdiel-machi-Ahí, Guni-e-wagwad. Ahíʼye-nugadi, e-gwenadgan-e-dummadga gudii gusad.
16 Wemar, Galaad-yargi, degine, Basán-yar-naidgi ambikusmalad. Deginbali, Basán-e-neggwebur-burwiganagi, degi, Sarón-nainumargi gagan-moli-mas-nanaidgi, bela e-nainumar-ugakaase, ambikusmalad.
17 Bela e-dadgan-igar-danikidi, Judá-e-rey-Jotam-e-ibagangi, degi, Israel-e-rey-Jeroboam-e-ibagangi narmaklesad.
Israel-wagan-dad-nakwedsikmalad
18 Rubén-e-wagan, Gad-e-wagan, degi, Manasés-e-wagan-negabalad, wemar bela sorda-mili-dulabo-gakabake gaka dulataled-ilagugle gaka dulapaa (44,760) sordamar-gandikmalad nikad. We-sordamarde sigu-abingaed-nikamaladid, es-suid-nikamaladid, degi, sigu-nikamarbalidid. Deginbali, bila-onoged nue-wismarbalidid.
19 Wemar, we-dulemargi bila-onosmalad:
Agareno-dulemargi, Jetur-dulemargi, Nafis-dulemargi,
degi, Nodab-dulemargi bila-onosmalad.
20 Degi-inigwele, bila-onolenaid-abargi, Bab-Dummad-bengussurmaladba Bab-Dummadse ise-gollar imaksamalad. Degi, Bab-Dummad itosgua, bendaksad. Degisoggu, Agareno-dulemar, degi, bela-Agareno-dulemarba-bila-ononanaid ese galakusmalad.
21 Degi, Rubén-e-wagan, Gad-e-wagan, Manasés-e-wagan-negabalad Agareno-dulemar-ibe we-ibmar-durgan susmalad:
Moli-yargan-mureged, mili-dulabo-gakambe (50,000).
Sibad-wawaad, mili-dulataled-ilabo-gaka-dulabo-gakambe (250,000).
Moli-uayasuid, milibo (2,000).
Deginbali, mili-dulatar (100,000) dulemar-gasbalid.
22 Ar bila-onogedgi Bab-Dummad eba gunaisoggu, agala, Agareno-dulemar bukidar girgusmalad. Deyob, Rubén-wagan, Gad-wagan, Manasés-wagan-negabalad, Israel-dulemar-gales-seledmaloed-e-ibaganse, Agareno-dulemar-e-yargi ambikunonimalad.
Manasés-wagan-negabalad
23 Manasés-e-wagan-negabalad bela-bela mergusmalad. Basán-yargi ambikusmalad, bela Baal-Hermón-yarse-bakar, ambikusmalad. Senirʼye-neg-nugadgi ambikusmarbalid, degi, Hermón-yar-siidse-bakar, ambikusmalad.
24 E-neguya-idudii gusmalad, wemalad:
Efer, Isi, Eliel, Azriel,
Jeremías, Hodavías, degi, Jahdiel.
We-dulemar, bila-onogedgi dule-gandikmaladid, nug-nikamaladid,
e-babgan-neggi sordamar-idudimaladid.
25 Aka bur Rubén-wagan, Gad-wagan, Manasés-wagan-negabalad Israel-e-Bab-Dummadgi gwisgudmalad. A-yargi-dulemar-baigan-bukusmalanad-e-bab-dummagan-e-nug odummodmalad. Bab-Dummad a-dulemar-obelos gusad.
26 Agala, Israel-e-Bab-Dummad we-Israel-dulemargi Asiria-e-Rey-Pul-egi-gwisguega imaksad. Pulʼde, Tiglat-Pileser-warbaagwadye (III) nugbalid.
We-Pulʼde, we-negmar-nugadse Israel-dulemar-gasa sesad:
Halah-neg-nugadse, Habor-neg-nugadse,
Hara-neg-nugadse, degi, Gozán-diwarse.
We-garda-narmaklenaidgine, amba agi bukwamalad.