3. BAB-JEHOVÁʼSE-GOLED-NEG-SOBLEGOED-IGAR
28
(28:1–29:30)
1 David Jerusalén-neggweburgi bela we-Israel-dummagan-onmaksad:
Israel-dulemar-e-dummagan-negsedimalad,
Israel-wagan-sogambe-gakabogwad-e-dummagan (12),
sorda-bila-onomalad-danar-danar-bukwad-e-dummagan,
reyga-muchub-muchub-arbamalad,
sordamar-bila-onomalad-milibalid-e-dummagan (1,000),
sorda-bila-onomalad-e-dulataled-e-dummagan (100),
bela-nainu-dakmalad-e-dummagan,
reyga-ibmar-durgan-dakmalad-e-dummagan,
rey-machimala-e-ibmar-dakmalad-e-dummagan,
reyneggi dule-arbamalad-e-dummagan,
dule-gandikmalad,
degi, e-sordamar-bur bulegan,
David bela we-dulemar-onmaksad.
2 Degidgi, Rey-David gwisguded, agi geb sogded:
“Gwenadgan, nue an-itomalo. Sordamar, nue an-itomalo. An Bab-Dummadse-goled-neg-soboye an sogsanad, agi Bab-Jehová-Dadganbo-Igar-Maid-Ulu sigegar. Degi, Bab-Jehová egi nue-mai mag-itolebaligar. Bela an ibmar guakwaa urbisgusanad.
3 Degi-inigwele, Bab-Dummad anga sogsad: ‘Be bila-onosad-dulesoggu, be ablis-bukidar eosadsoggu, bee, be anga anse-goled-neg sobosurye.’
4 ”Degi-inigwele, Israel-e-Bab-Dummad-Jehová an-gwenadgan-abargi Israel-reyga degisadegu-megega an-sunonikid. Agala, Bab-Jehová, e-Israel-dulemar-seegala, Judá-sunonikid. Degi, Judá-wagan-abargi, an-gwenadgan-sunonikid. Deginbali, an-iamar-abargi Israel-yargi reyga-megega an-sunonikid.
5 Deginbali, Bab-Jehová, masmala-bukidar-anga-uksad-abargine, rey-gangi-sigegala, degi, Israel-yar-seegala, an-machi-Salomón-sunonikid.
6 ”Degine, Bab-Jehová anga sogsabalid: ‘Be-machi-Salomón anse-goled-neg, degi, neg-ubebmar anga soboedye. Ar we-machi, an-machiga an na imakoye, degi, e-babyob an gunonikoye.
7 Ar Salomón, igi emi-iba an-Igar-Maidba nanadii, igi an-gayaburba-maidba nanadibali, ar deyob-nanadiile, e-yar-seoed an ega bar-ogannogoye, degisadegu reyga megoye.’
8 ”Emide, bela Israel-dulemar, Bab-Jehová-dulemar-gued-bukwadi, anmar-sunmaknaid anmar-itobukwad. Degisoggu, we-ibagine, wemar-asabin, bemar bela Bab-Dummad-Jehová-Igar-sogmaidba be ibsamalo, eba be dobekwaa nanamalo. Ar unnila deyobi, geb be we-yar-nuedgi nabir gudii gumaloed, degi, deyob geb bee, be-mimmiganga we-yar degisadegu be obemarbaloed.
9 ”Emisgi, Salomón, be an-machi-guedgi, be an-Bab-Dummad be mag-dake nanaergebed. Innikigwadba ega be arbaergebed, gandikidgi, degi, weligwaledgi eba be ibsaergebed. Ar Bab-Jehová dule-binsaed bela wissoggu, dule ibmar-imakbiele, bela magasar-daked. Ar be Bab-Jehová-nue-ami-sogele, e-amiega be-imakoed. Ar be Bab-Jehováʼba ibsasurdibe, Bab-Jehová degisadegu be-obanoed.
10 Mer be iego, Bab-Jehová ega ese-goled-neg-sobega be-onug-imaksad. Degisoggu, gandik na be imako, ega be ese-goled-neg sobsun.”
11 Degidgi, David e-machi-Salomónʼga neg-soblegoed-garda uksad:
Bab-Dummadse-goled-negyaba e-ubeb-soblegoed-garda.
E-negmar-soblegoed-garda.
Ibmar-nuegan-saboleged-neg-soblegoed-garda.
Neg-aila-nika-soblegoed-garda.
Negyaba-dulemar-ambikued-soblegoed-garda,
degi, Bab-Dummad-dulemarbo-igar-naboged-neg soblegoed-garda.
David, a-gardamar e-machi-Salomónʼga uksad.
12 Deginbali, David, deyopira we-negmar-sobega, e-gardamar-sobaled uksabalid:
Bab-Jehováʼse-goled-neg-imba-sobaled-garda,
e-ambikuleged-negmar-dikarbalid-sobaled-garda,
Bab-Dummadse-goled-negga manimar-saboleged-neg-sobaled-garda,
degi, ibmar-nuegan-swilidikid-ambikuleged-neg-sobaled-garda uksad.
13 Rey-David, deyopira dule-irwa-Bab-Dummadse-gormaladga, degi, Levita-dulemarga, bela Bab-Jehová-neggi danar-danar-arbaega igar mesisad, degi, Bab-Jehováʼse-goled-neggi-ibmar-ebulemaladga igar mesisbalid.
14 Deginbali, e-machi-Salomónʼga ormar-ichesur, manimar-ichesur uksabalid, adi, Bab-Dummadse-goled-neggi-ibmar-ebulemalad orbi-sobega, degi, manibii-sobegar.
15 Deginbali, gwallu-sigmalad ebulegega, soblegega or, degi, mani uksad:
Gwallu-sigmalad-orbi-soblegegala,
e-gwallumar-orbi-soblebaligala,
unnitiba or-uksad.
Degi, gwallu-sigmalad-manibi-soblegegala,
e-gwallumar-manibi-soblebaligala,
unnitiba mani-uksabalid.
16 Amba deyobi, David, ormar uksabalid,
mesemar-madu-ambikued ilibali orbi-soblegegar.
Deyob manimar uksabalid,
mesemar-madu-ambikued ilibali manibii-soblebaligar.
17 David, we-ibmar-soblegega ormar uksabalid:
Wesar-iko, nog-dummagan, dii-sied.
Or-nog-iliba na-e-aidikuedba-soblegega or uksad,
mani-nog-iliba na-e-aidikuedba-soblegega mani-uksabalid.
18 A-ukinbali, we-ibmar-soblegega unnitiba or-uksabalid:
Ina-wawadik-ogumakar-ukleged-ailaga,
degi, baliwitur-querubin-seed-ur-sobega uksad.
We-querubinʼde, Bab-Jehová-Dadganbo-Igar-Mesisad-Ulu-birgi e-sakan nallaa gwisguoed.
19 David sogded: “Bela we-ibmar-soblegoed, Bab-Jehová-e-ibmar-sogedba narmaklesad. Adi, ibmar-soblegoed magar-ito an-imakegar.”
20 David a-uki, e-machi-Salomónʼga sogdebalid: “Gandik na be imako, mer galakuo. Be-arbaed na be imako, Bab-Dummadse-goled-neg be sobo. Mer dobguo, mer be niga-galakuo. Ar an-Bab-Dummad-Jehová beba gudii guoed, begi banguosulid. Ese-goled-neg-oguedse beba gudii guoed.
21 ”Degine, dule-irwa-Bab-Dummadse-gormalad, Levita-dulemar, wegi guakwa bukwamalad. Wemar, Bab-Dummadse-goled-neg-sobedgi arbamaloed. Wemar, be-bendakegala, bela ibmar-soblegedgi be-walik gudimaloed. Deginbali, dule-bela-ibmar-soblegedgi-nergumalad be-bendakmarbaloed. Girmar-dummagan, degi, bela dulemar, be-sogedba ibmar-imakdii gumaloed.”