18
Igar-naboged-isganagi Jesús sunmaksad
1 Degi, Jesús na e-sapingan-odurdakega burbar sunmakded, amarga sogded: “Bab-Dummadse-goled nue-abeleged, melle be galakumalo.”
2 Jesús burbar sogdesun: “Ibagwengi, neggweburgi dule-igar-naboged maigusad. A-dulede, Bab-Dummad-gwen-dobsulid, degi, dulemargi gwen binsaed-nikaa dasurbalid.
3 ”A-neggweburgi mukwa-wargwen ei-sui-burgwisad gudigusmogad. A-mukwade, dule-igar-nabogedgi gannar-gannar alamaknaidaed, ega sognonidaed: ‘Dule-isdar-an-dakdiid-ebo anga igar-nabiroye.’
4 Gebe, dule-igar-naboged yapa mukwaga igar-naboge guargusad.
”A-undaradgine, dule-igar-naboged na ulubgi sokalid: ‘Bab-Dummad an dobsur-inigwele, degine, dulemargi-gwen-binsaed-nikaa an dasurbar-inigwele,
5 ar we-mukwa angi alamaknaigusoggu, ega igar an nabogoye. Ar degiile, abakalegi anse-nanagwichidba budar an dakalirye.’ ”
6 Geb degi, Dummad-Jesús sogdebar: “Nue be itomalana, dule-igar-naboged-isganadaed-ibmar-sogsadi igi-sogsagusa.
7 Ar bemar insagu, Bab-Dummad na e-dulemar-susadi ese mutikidba, degine, ibginedba gordimaladga igar-napiragwad ¿imakosur be insae? Imakoe. ¿Bab-Dummad abgayala abinsaosur be insae? Eye.
8 An bega sogmar, Bab-Dummad abga e-sordamarga igar-napiragwad imakoed.
”Ar ani Dule-Machi, we-napnegse gannar danikir, ¿dulemar we-napneggi Bab-Dummadgi-bensurmalad-nika daknoniko be insae?”
Fariseoʼgi, degi, dule-manigaedgi sunmaklesad
9 Ar dulemar, na dukin nuedye, baigandi isganaye, sogdimaladga, Jesús we-igar-burbar-maidgi-sunmaklegedgi sogded:
10 “Ibagwengine, machergan-warbo Bab-Dummadse-goled-negse nadmalad. Gwensak Fariseo, baiddina Roma-dummadga-manigaedgi-arbaed-dule.
11 ”Fariseo gwichi Bab-Dummadse gorgwichid, na dukin weyob soggwichid: ‘Bab-Dummad, dog-nuedye an bega soged, an dulemar-baidyob dasulid, an atursilisulid, igar-innikigwadbi aimarga an imaked, ome-dikarba an yoledisulid, degine, we-dule-Roma-dummadga-manigaedgi-arbaeddaedyob an dasulid.
12 Bab-Dummadse-golega itoged-irgwengi, ilabo an mas-gunsuli gudidaed, bela an mani-onoged-irba ambegi-gwensak (10%) an ukdaed.’
13 ”Ar dule-Roma-dummadga-manigaedgi-arbaeddi Bab-Dummadse gorgwisgu, bannabaa gwichi, nonose-bakar, gwen onakbisur gwichid, na e-binasgar sarsogwichid, na soggwichid: ‘Bab-Dummad wile be an-dake, an dule-isgudiid-duled.’
14 ”Ani Jesús, an bega sogmar, ar we-dule Fariseoʼba bur gwage nugus-naddo.
”Ar ade, dule-wargwen na nug dummarbaa saele, a-dule, bur nug bipii guoed. Ar dule na nug bipii saerdi, adi, a-dule, bur nug odummolegoed.”
Jesús mimmigangi nued binsasad
(Mateo 19:13-15; Marcos 10:13-16)
15 Degine, Jesúsʼse mimmigan-sedanigusmalad, Jesús ega ebugegar. Adi, Bab-Dummad nued mimmigangi binsaegar. Jesús-sapingan deyob dakarmargu, dulemar-mimmigan-senonimaladse uluarmalad.
16 Ar Jesús e-sapinganse-gochagu, ega sogded:
—Mer ese urwemar. Akarsuli, itoba mimmigan anse dagoed, mer be igar-gamar. Ar Bab-Dummad-e-negdakmaid we-mimmiganyob-damaladgadid.
17 Napira an bemarga sogmalad, ar dule-wargwen Bab-Dummad-e-negdakmaid mimmiganyob abingasulile, geg Bab-Dummad-e-negdakmaidse doged.
Dule-mani-ibed Jesúsʼse nonikid
(Mateo 19:16-30; Marcos 10:17-31)
18 Dule-wargwen nue-nug-nikagwad Jesúsʼse nonikid, ese egisnonikid:
—Odurdaked-saila-nued, burba-geg-bergued an abingaega, ¿ibi an imakergebe?
19 Jesús, abin-sogded:
—¿Ibiga dule-nuedye be anga soge? Dule-nued sulid, unnila Bab-Dummadbi wargwennaa dule-nued gued.
20 Bab-Dummad-Igar-Mesisad be wisid:
‘Melle be be-abirginsulid-ebo galagwensuli nanao.
Melle be dule-oburgo.
Melle be ibmar-atursao.
Melle be gakansaar aimargi sunmako.
Be-bab-nug-odummodii, degi, be-nan-nug-odummodii be nanamalo.’
Éxodo 20:12-16; Deuteronomio 5:16-20
21 Dule, abin-sogded:
—Gusgu an sapingwagwad-akar bela we-Igarmar-Mamaidba an nanadiid.
22 Jesús, weyob dule-ega-soge itosgu, ega sogded:
—Ibmar-gwensak amba be napi. Bela ibmar-be-nikadi manigi be uknae, geb agi, mani wileganaga be mimioed. Geb degiir nibneggi ibmar-nued be nikuoed. Geb a-sorba, an-sapinga-guega anba be dagoed.
23 Dule, weyob Jesús-ega-soge itosgu, nue-bukib binsaded. Ar ade, dulede nue-mani-ibedid.
24 Jesús, dule-nue-bukib-binsa-ito daksagu, sogded:
—Ibiyobi dule-mani-ibganga Bab-Dummad-e-negdakmaidse-doged-igar dutusuli. Ar ade, dogdar maniginbi binsamalad.
25 Ar ade, bur moli-yargan-mureged iko-ibyagi bursursunna dogsaled. Ar dule-mani-ibeddi bur-beedse Bab-Dummad-e-negdakmaidse doged.
26 Ar dulemar weyob Jesús-ibmar-soge-itosmalad, sogdemalad:
—Ar degite, ¿doa nabir abonolegosunna?
27 Jesús, dulemar-abin sogded:
—Ar dulemargardi, ibmar-geg-guedi, Bab-Dummadgardi, bela ibmar guedbiid.
28 Geb degi, Pedro, Jesúsʼga sogded:
—¿Anmardina? Emide, wegi anmar ibmar-nikamalad bela an na obesmalad, adi, anmar beba naegar.
29 Geb degi, Jesús, abin-sogded:
—Napira an bemarga soged, ar dule Bab-Dummad-e-negdakmaid-ular,
na e-ome-obesale,
e-mimmigan-obesale,
e-babgan-obesale,
degine, e-neg obes-nadele,
30 bur bule, we-napneggi ibmar-obesadba ibmar abingaoed.
Degine, yoedse amba deyob burba-geg-bergued nikubaloed.
Jesús, ilapaagus gannar e-burgoedgi sunmaksad
(Mateo 20:17-19; Marcos 10:32-34)
31 Jesús na e-sapingan-warambe-gakabogwad (12) bachikii sesgua, ega sogded: “Anmar Jerusalénʼse nadapid. Bab-Dummad-gayaburba-barsogmalad bela angi Dule-Machigi narmaksadba igargan anga guedsegad.
32 ”Ani Dule-Machi, Bab-Dummad-wissurmaladse uklegoed, amar angi dodomaloed, isdar angi sunmakmaloed, degi, angi wii-agmarbaloed.
33 Geb sabsur an-bibyosmalad-sorba, an-oburgwemaloed. Geb ibapaagwadgi gannar an durguoed.”
34 Ar Jesús-e-sapingan-ambe-gakabogwad (12) Jesús-ega-ibmar-sogedi magasaila-itossurmalad. Aku-itosmalad, ibiga ega deyob soge.
Jesús, Jericóʼgi dule-aku-ataked-nudaksad
(Mateo 20:29-34; Marcos 10:46-52)
35 Ibagwengine, Jesús Jericó-neggwebur-modanigua, deunni dule-ibyasulidi, igar-naba sii, mani egichii gusad.
36 Dule-aku-ataked dulemar-bukidar duurmaknadap itoargu, amarse egichided:
—¿Igi neg-gunai?
37 Ega sogdemalad:
—Jesús-Nazaretʼgined nadapye.
38 Geb degi, dule-aku-ataked binnasur goted, sogded:
—Jesús, Rey-David-wagwa, ¡wile be an-dake!
39 Dulemar-Jesús-iduar-nadapmalad dule-aku-atakedse uludmalad, adi, mer binnasur golegar. Ar dule-aku-ataked aka bur bule binnasur gorsigisad:
—Rey-David-wagwa, ¡wile be an-dake!
40 Geb degi, Jesús gwisgusgua, dule-aku-ataked ese sedagega imaksad. Dule-aku-ataked ese nonigu, Jesús ese egichialid,
41 ega sogded:
—¿Ibu bega imakbi be an-abege?
Dule-aku-ataked, Jesús-abin-sogded:
—Dummad, magar-atak be an-imake.
42 Jesús ega sogded:
—Magar-atak be gusun. Be an-bengussursoggu, be nugusun.
43 Geb degi, dule magar-atake gussunnad. Dule-nugusad Jesúsʼba nadapgu, Bab-Dummad-nug-ogannonadap gusad. Bela-dulemar dule-nugusad-daksamargu, Bab-Dummad-nug ogannodmarsunnad.