8
1 Bab-Jehová soged: “A-ibagangine, reymar-garmar, degi, Judá-dulemar-garmar-neg-uangi-mamaid bela onomaloed. Degine, dule-irwa-Bab-Dummadse-gormalad-garmar, Bab-Dummad-gayaburba-barsogmalad-garmar-mamaid bela onomarbaloed. Deginbali, Jerusalén-dulemar-garmar bela onomarbaloed.
2 Bela-a-garmar dad-abin, degi, nii-abin, degine, niisgwamar-abin urbilegoed. Ar ade, wemar dad, nii, degine, niisgwamar sabgusmalad, ega ibmar imaksamalad, degine, we-ibmarmarse ibmar egichismalad, e-nugmar odummosmarbalid. Dulemar we-garmar-digega bar garmar weosulid. ¡Ibmar-isganamaryob napagi omiledoed!
3 Ani an Bab-Jehová-Bela-Gangued-Nikad soged: An we-dule-isganamar galagwensuli aisakis urboed. Amar dula bar gudii gubigudagosurmalad, burgwebi bur gudamaloed. Ar deyob guoed.”
Isgued, degi, sabsur-odurdakleged
4 “Jeremías, we-dulemarga be sogbalo, Bab-Jehová weyob sogye:
‘Dulemar aimukusale, ¿gwichibin imakdasursi?
Dule wis igar-noaledba-aibatele, ¿gannar igar-nabirid-amidasursi?
5 Degite, ¿ibiga bemar igar-noaledba aibatemarsunna?
Jerusalén-dulemar, ¿ibiga be nue-an-obachamarsunna?
Unnila gakan-igargi be alamakdimalad,
gwen anse gannar be dagbisurmalad.
6 Dule-sunmaked nue an itodii gusanad,
dakega, dule-wargwen igar-nuedba sunmakdiidibeye.
Dulemar e-isguedga gwen bukib binsasurmalad,
e-ibmar-isgana-imaksamalad aku itomalad.
Bela dulemar, igi moli bila-onolenaidgi-abarmakwisdae,
deyobi, e-itoleged-e-itolegedba nanabukmalad.
7 Ar dabgalamarbela ibagan-nagumaid wisid.
Sapur-nuumar, degi, wirsobmarbela wisid,
sanase neg-baidse obakmaloe.
Ar bemardi, an-dulamar-gumaladi, an-igar-mamaiddi gwen wissurmalad.’
8 ”Ar ibiga be sokardamala:
‘Anmar binsaed-ibegana, anmar Bab-Jehová-Igar-Maid sedimala.’
Ar dule-garda-narmakmaladbela gakansaar odurdakmalad,
Bab-Dummad-igar weyob-maiye sogdidamalad.
9 We-dule-binsaed-ibegan nue-bingegumaloed,
na dukin ise-yardaklegar gumaloed.
Ar an-gayaburba itossurmalad,
degisoggu, ¿bia e-binsaed-nikagued nadsunna?
10 A-ulale, an e-omegan machergan-baiganga ukoed,
degi, an e-nainumar dule-baiganga ukbaloed.
Ar bipigana, serganse-bakale, igar-maisulidba ibmar-nikuedgi binsamalad.
Bab-Dummad-gayaburba-barsogmalad,
dule-irwa-Bab-Dummadse-gormaladse-bakale,
ibmar-amimalagala, emar-yardakar arbadimalad.
11 Unnila asginbi an-dulamar-nudakdimalad.
Unnila ega sokardamalad: ‘Nueganbi, bonisuli.’
Ar degi-inigwele, nueganbi-dasulid,
aka bur bule neg ege naid.”
12 Bab-Jehová soged:
“Weyob ibmar-isgana-imaksamaladba, degite, ¿bingedar-itosurmarde?
Suli, degite amba bingedar itosurmalad.
¡Ar bingegued wissurmalad!
A-ulale, dulemar-sabsur-odurdaklegoedba, wemar sabsur-odurdaklemogoed.
An we-dulemar sabsur-odurdakalile, bela wilemaloed.”
13 Bab-Jehová soged:
“Bela an bemar-obelogoed,
uva-san e-nainugi berguedyob an bemar-obelogoed.
Higo-san e-sapigi satedaeyob an bemar-imakoed.
Degine, e-gagan-dinnaganbi-nanaidaeyob an bemar-imakoed.
A-ulale, an bela bemarga ibmarmar-uksadi, gannar an bemar-annik suoed.”
14 Geb dulemar sogdemalad:
“¿Ibi anmar wegi gannaa sabukwa?
Dage, anmar neggwebur-gandikmaladse nae,
agi anmar itoba burgwemaloed.
Ar anmar Bab-Dummadgi dummad-isgusad-ular, anmar-Bab-Dummad-Jehová anmar-obelonaid.
Dii-ina-nusubiid-gobega anmar-imaksad.
15 Nueganbi-naoye anmar bisanad,
degi-inigwele, anmar ibmar-nued gwen daksasulid.
San-nued-gumaloye an bisanad,
degi-inigwele, anmarga dobed-dummad uksad.
16 Dan-neggwebur-akale, molimar-abarmakdanikid itoleged.
Molimar gotele, bela yala giglimakdedaed.
Yala-naid obelodanikid, bela yalagi-ibmar-bukwad obelodanikid.
Neggweburgi-siid, degi, bela e-dulemar-bukwad obelodanikid.”
17 Bab-Jehová soged:
“An bemargi naibe-nuegan barmidoed, bemargi warmakoed.
We-bonigan-nudakegala, inamar sulid.”
Jeremías, e-dulemar-ular nue-wile-itoged
18 An bela-belad nue-nunmak-itogedbali,
an-gwage-ulubgi an burgwebidar itogusad.
19 Bela neggwebur-imbaba an-dulemar-ogormakbukwad itoleged,
“¿Bab-Jehová Sión-yalagi bar gudisursi?
¿E-reyde a-yargi bar maisurmosi?”
Bab-Dummad abin-sogded:
“¿Ar ibiga bemar be-bab-dummagangi an-ourwega an-imakmala?
¿Ibiga be-bab-dummagan-ibmar-nuedga-gusurmaladgi an-ourwega an-imakmala?”
20 Israel-dulemar sogded:
“Ibmar-weed-ibagan bergus, neg-yolad bergus,
ar anmardi gwen bendaklessurmalad.”
21 Geb an abin-imaksad:
“An-dulemar-nunmak-itogedbali, an nunmak-itomogad.
An nue bukib-binsaedba, bela-belad angi dobednagusad.
22 ¿Ar Galaad-yalagi ina-wawadikid sursi?
¿Agi ina-duledmarde sursi?
¿Ar ibiga an-dulemarde bonigan-abgadii gumalosunna?”