5
Jerusalén-dulemar-isgusad, Judá-dulemar-isgusad
1 Bab-Dummad soged:
“Jerusalén-galimbaba be bipirmaknamar,
nue be miamakmalo.
Dulemar-ambikuedgi nue be dulemar amimalo.
Bemar dule-ibmar-inniki-imaked,
dule-ibmar-napira-soged amismalale,
an, Jerusalén-neggwebur bar an sabsur-imakosulid.
2 Ar dulemar sogdamalanad: ‘Bab-Jehová-nuggi an napira sogye,’
degi-inigwele, yamo sogdamalad.”
3 Ani Jeremías sogded:
“Bab-Dummadga an weyob sogded:
Bab-Jehová, ¿ar be dule-innikidamalad amisursi? Eye, be amienad.
Ar dulemar be sabsur-odurdaksa-inigwele, degite, gwen bai-itossurmalad.
Be we-dulemar-e-ibmarmar-obelos-inigwele, gwen gwage-nuguedgi binsasurmalad.
Akwaba bur bule e-gwage dutusuli nadmalad,
gwen e-isguedga bukib itossurmalad.
4 ”An weyob binsaenad:
‘Unnila dule-wilemaladbi, binsaedsuli ibmar imakye.
Be-Igar-Maid gwen magar itosurmarye.
Be-ibmar-abemaid gwen imaksurmarbarye.’
5 Agala, sapin-dummaganse an naoed,
an ega sunmaknaoed.
Ar we-dulemardi, Be-Igar-Maid wismalad,
be-ibmar-abemaidi, wismarbalid.
”Degi-inigwele, amba be-sogedba ibmar-imaksasurmarmogad,
Be-Igar-Maidgi annasmarmogad.
6 A-ulale, achumigur-nono-wawaadse gullemaloed,
achu-burburud-nega-dulesulidganbalidse ichimaklegoed.
Achu-barbad e-neggwebur-ebiris bina itos gudiid.
Bela dulemala neggweburgi-nodmalale, ese ibitolegoed.
Ar we-dulemar dogdar begi yolesmalad,
ar we-dulemar dogdar begi uayasuli gusmalad.”
7 Bab-Dummad sogded:
“¿Ibiga isgussulidyob an bemar-dakosunna?
Ar be-mimmigan an-obachamalad,
bab-dummagansurmalad-nuggi ise-sogar sogdamalad.
An bemarga mas unnitiba uksad,
degite, bemar galagwensuli gudmalad.
Bela bemar danagwen galagwensuli gambanuchumarba be gudii gusmalad.
8 Moli omegi-nakwebigudiyobi, be gudimalad.
Dule-baigan-omeganbina be yaisur-gordii damalad.
9 Ani an Bab-Jehová bemarga soged:
A-ular, ¿an bemar-sabsur-odurdakosur be insae?
¿Buged-mai an bemar-imakosurde?
An bemar-odurdakergebed.
10 ”Israel-dulemar-e-uvaʼdub-digarmaladba be dagmar,
maad-maad be imakdamar,
degi-inigwele, mer bela be obelomalo.
E-muumar be ungemalo,
ar we-muumar bar angadsulid.
11 Ani an Bab-Jehová soged:
Israel-dulemar, Judá-dulemar, uayasuli angi gudmalad.
12 ”Bemar an-obachamalad,
‘Bab-Dummad maisurye’ be sogmalad.
‘Bilagi anmar odurdaklegosurye’ be sogdamalad.
‘Ukumesedgi anmar odurdaklegosurye’ be sogmarbalid.
13 ‘Bab-Dummad-gayaburba-barsogmaladdi, binsa-ee-gordimarye’ be sogmarbalid,
‘ar Bab-Jehová-gayaburba egi naisurye’ be sogmalad.
‘Bab-Dummad-gayaburba-barsogmalad deyob-sunmaksamaladba sabsur-odurdaklemarsunye,’ be sogmalad.”
14 Degisoggu, ani an Bab-Dummad-Jehová-Bela-Gangued-Nikad bega soged:
“Weyobi, dulemar sogsamarsoggu, Jeremías, an-gayaburba be-gayagi sooyobi guoed.
We-dulemardi, sapanyobi gumaloed, bela bergumaloed.”
15 Ani an Bab-Jehová bemarga soged:
“Israel-dulemar, dule-dikasurmalad an bemarse barmidagoed.
Neggwebur-gandikmalad, undargus-bukwamalad an bemargi barmidagoed.
Dule gaya-akarsaila-sunmakmalad,
e-gaya-be-aku-itomalad an bemarse barmidagoed.
16 Bela we-dulemala bila-onogedgi buleganad,
e-sigumala, dule-ogilogednanaed.
17 Be-ibmar-wesmalad bei obelomaloed,
be-masgullemalad bei obelomarbaloed.
Be-masmala, be-bunamala, bei oburgwemarbaloed.
Degine, be-sibadmar, be-moli-bebe-nikamalad, bei ogilomarbaloed.
Deginbali, be-uvaʼmar, be-higuera-sapimar, bei obelomarbaloed.
Be-neggwebur-gandikmaladgi, dule-oakalogosurye-egi-be-binsaedi,
bela es-suidgi bei obelolebaloed.”
18 Ani an Bab-Jehová soged: “A-ibagangine, an belallaa dulemar-obelogosulid.
19 Dule bese egichiarmalale, ‘¿ibiga anmar-Bab-Dummad-Jehová weyob anmar-imaksaye?’ Jeremías, ega be sogo: ‘Bab-Dummad sogye: Ar igi-bemar an-obachamala, degine, be-neggweburgi bab-dummad-baiganba be ibsadii gusmala, deyobi, neggwebur-baidgi, dule-baiganga-arbadii be gumaloye.’
20 Jacob-waganga be soge,
Judá-dulemarga be sunmake:
21 ‘Dule-binsaed-satemalad, dule-aku-neg-itomalad, be itomala.
Ar bemar ibya-nika-inigwele, be aku-ibmar-dakmalad.
Ar bemar uaya-nai-inigwele, be aku-ibmar-itomalad.’ ”
22 Ani an Bab-Jehová soged:
“Ar bemar, ¿bar an-dobsurmarde?
Ar bemar, an-dobguewilubmalanad.
Ani an ukub nasiksad, adi, demar-abingunaidga guegar.
Demar-abingunanaid degisadegu-mai guoed, gwen berguosulid.
Amba demar binnasur-arwedago-inigwele, degine, uurmakdago-inigwele, e-igar-abingunanaidgi gwen dogosulid.
23 Ar we-dulemar gwage-dutusurmaladid, uayasuli angi damaladid.
Angi bangus gudimalad, angi aibatemalad.
24 Wis binsasurmalad, na sogsurmalad:
‘Anmar, anmar-Bab-Dummad-Jehová dobee nanamarye.
Anmarga dii-owimaiye, ibagan-sekalaa dii barmimaiye.
Degine, anmarga ibmar-weed-ibagan sekalaa nasikmaiddeeye,’ gwen binsasurmalad.
25 ”Be-isgumaladi, bemargi we-ibmar-nuegan obelosad.
Be-isgumaladi, bei ibmar-nuegan gasa siid.
26 An bensuli, ar bemar-abargi dule-ibmar-isgana-imakmalad gudidiid,
nuu-gaega-nakulemaladyob nakuledimalad,
dule-gaega yamo emar-yardakmalad gudidiid.
27 Sikwimar garbagi-ena-bukwadyobi, e-negmargi ibmar-atursasmaladi, ena-ena bubukwad.
A-ulale, bemar dule-buleganga gudmalad,
deyob, dule-mani-ibmalaga gudmalad.
28 Be wardungudmalad, san-dummarbaa be gudmalad.
Bemar-ibmar-isgana-imakmaladi gege bergued.
Dule-babgan-satemalad nabir-nued-gudigumalaga ega be igar nabosurmalad.
Dule-wilegana-e-ibmar-nikue-wilubmogad be bendaksurmarbalid.”
29 Ani an Bab-Jehová soged:
“¿We-ulale, sabsur-bemar-odurdakosur be an-insae?
Weyob-dule-damaladi, buged-mai ¿imakosur be an-insae? An imakoe.
30 ”Be dakmala we-napneggi, gwayed-dummad naid.
¡We-ibmar-gunaid gwen nabir-daklesulid!
31 An-gayaburba-barsogmalad, unnila gakansaale sunmakmalad.
Dule-irwa-anse-gormalad, na e-itolegedba negsemamaid.
An-dulamarde, weyob-abeye soged.
Ar bela ibmar bergunonikile, ¿bemar igi-gudmalosunna?”