18
Napsagi-ibmar-sobed-dulegi burbar-sunmakleged
1 Bab-Jehová weyob anga sognonikid:
2 “Jeremías, napsagi-ibmar-sobed-dule-negse be nae, agi an bega ibmar sogo.”
3 Geb an napsagi-ibmar-sobed-dule-negse nadsunnad, degi, an modapgu, napsa-e-obipirmakedgi ibmar-sobnai an dakdapid.
4 Napsagi-ibmar-sied-sobnaid e-ibe isgunonikile, gannar sobdedabalid, egi bela nued-noedse imakdaed.
5 Agine Bab-Jehová-gayaburba anse nonikid, anga weyob sognonikid:
6 Bab-Jehová soged: “Israel-dulemar, ¿geg an napsagi-ibmar-sobed-duleyob an bemar-imakmosi? Bemar Israel-dulemar, igi-napsagi-ibmar-sobed-dule napsa-imake, deyobi, bemar an-argangi gumalad.
7 ”An dula-bukwad-gwensak-obelogedgi-sunmakbiele, yar-gwensakgindibe, an-itogedba sunna an sunmaked. Sunna an bela we-dulemar-sabsur-odurdakedgi an sunmakbalid.
8 Ar we-dula-bukwad-gwensak-bukwadi, e-isguedga-ulubgi-bukib-binsaele, ibmar-isgana-imaked iemarsogele, an sabsur-odurdakoye-sogsad bar an odurdakosulid.
9 ”Deginbali, an sunna bega neggwebur-onasguedgi sunmakbalid. An sunna neggwebur gangued-nika-imakedgi sunmakbalid.
10 Degi-inigwele, ar emar an-asabin ibmar-isgana-imakele, an-sogedba dasurmalale, bar an emarga ibmar-nued-imakedgi binsaosulid.
11 ”Jeremías, emisgindi, Judá-dulemarga be sogo, degine, Jerusalén-dulemarga be sogbalo. Bab-Jehová weyob sogye ega be sogo: ‘An bemar-idu boni-dummagan urbenaiye, bemar-sabsur-odurdakedgi an binsanaiye. Bemar igar-isganagi bangumarye, be-daed be ogwamarye, be-ibmar-imaked nue be imakmarye.’
12 Degi-inigwele, bega sogdamaloed: ‘Suli, anmar imakosuli. Anmar, anmar-itolegedba ibmar imakoed, anmar ibmar-isgana-abegedba na ibmar-imakdii gumaloed.’ ”
13 Ar Bab-Jehová weyob soged:
“Dule-yar-baid-baidgi na be egismardo:
‘¿Doa weyob ibmar-imakdimar be itosa?’
¡Suli! Weyob ibmar itoledisulid.
Ar Israel-dulemar, ibmar-isgana yeer-gangu imaksamalad.
14 Ar Líbano-yalaganba boo-sibudik-bated, ¿berguoe be insae?
Yalaganba dii-dammipegwad-aryomaid, ¿berguo be insae? ¡Suli! Berguosuli.
15 Degi-inigwele, an-dulamar an-iedmalad.
Bab-dummagan-binsagumaladga ina-wawadikmalad ogumakar ukdemalad.
Igar-nued gebesailagi an ega-uksadgi bangudmalad.
E-igar-isganaba nanadmalad,
igar-gwen-nabirsulidgi gudii gudmalad.
16 A-ulale, e-yar-naid nega-dulesulidga imaksamalad,
egi-dodolegega imaksamalad.
Dulemar egi nasdamaladi, geger-dakedbali, nono-ege-ege imakdemaloed.
17 Dad-ibeler-nakwedsik burwa-goled-neg-imakedyobi, an bemar-imakoed,
an be-isdarmalad-asabin bemar-oaisakioed.
Be sabsur-odurdaklemaloed-ibagi an bemar-bendakosulid,
an bemar-idu wagar-biir imakoed.”
Jeremíasʼgi-gwichigubiguarmalad-igar
18 Dulemar weyob Jeremíasʼgi sogdemalad: “Anmar Jeremíasʼgi-gwisguega igar amimargwelo. Amba anmarga dule-irwa-Bab-Dummadse-gormalad igar-maidgi-anmar-odurdakega surguosulid. Degine, dule-binsaed-ibed anmarga-binsaed-uked surguosurbalid. Anmarga Bab-Dummad-gayaburba-barsoged surguosurbalid. Anmar melle we-dule-ibmar-soged itomalo. Anmar naibid ega ukega, e-sunmaked-egi-aibinega imakmalo.”
Jeremías Bab-Dummadse-gochad
19 Ani Jeremías Bab-Dummadga weyob sogded:
“¡Bab-Jehováʼye, nue be an-itoge!
¡Dulemar angi-gwichigunanaid nue be itoge!
20 ¿Ar ibmar-nued-imaklegedi, ibmar-isgana-imaklegedga gunonidasi?
Ar we-dulemala an-metemalaga, an-idu yaa-dummad-akwisa gunanaid.
Bab-Dummad, an bese-gochagusad be ebinsae,
adi, melle we-dulemar be sabsur-odurdakegar.
21 Agala, e-mimmigan, ukudba be oburgwesunna,
e-isdarmaladse es-suidgi-burgwega be imaksunna.
E-omegan-ibe, e-suimar-oburgwega be imake,
e-omegan, e-mimmigansuli be imake.
E-suimar, gindaklegar be oburgwe.
E-masmala, bilagi es-suidgi-burgwega be imake.
22 Egi, ukiagwale dulemar-ibmar-atursamalad be barmidage,
adi, gwakidedba binnasuli oimakde gumalagar.
An-gamalaga an-idu yaa-dummad akwismalad,
an-nag-gaega an-idu dubmar nasiksamalad.
23 Bab-Jehová, bedi we-dulemar-an-oburgwedgi-binsananaidi be wisid.
Melle e-ibmar-isgana-imaksamalad be baisur-dako,
melle be e-isgusmalad iego.
Bab-Jehová, be-asabin galakumalaga be imako.
Sae-itogedgi be sabsur-odurdako.”