8
Bildad, Jobʼga sunmaksad
1 Súah-neggweburgined-Bildad, Jobʼga sogded:
2 “¿Ar sanagwadse weyob be sunmakmai guoe?
Be-sunmakedi, burwa-dummad-noedyobi be sunmaked.
3 Bab-Dummad-Bela-Gangued-Nikadi, ¿ibmar-inniki-maid oichogo be ebinsasi?
Bab-Dummadi, ¿ibmar-inniki-imaklegedgi yolego be ebinsasi? Gege yoleged.
4 Ar be-masmala, Bab-Dummadgi yolesmalargebed.
Ar degubinne Bab-Dummadse nabir odurdaklesmalad.
5 Bab-Dummad-Bela-Gangued-Nikad be baramiele,
ega be sogele, wile be an-dakye,
6 be islidik-gudiile, be ibmar akar-imakdisulile,
Bab-Dummad be-bendakoed.
Bega gannar ibmar-iduar-nikusadi ukoed.
7 Ar yoedse be ibmar-nikuoedi, ibmar-nikusadba bur bule be nikuoed.
8 ”Dadganse be nue ibmar egise,
be-babgan-ibmar-bar-amismaladi, be durdake.
9 Ar anmardi geb emicharmaladid, gwen we-ibmar wissurmalad.
Anmar we-napneggi-gudiidi, unnila an sikwas gudimalad.
10 Ar we-dulemardi sunna be-odurdakoed,
ibmar-bukidar-wisguega be-imakoed.
E-ibmar-wismalad bega sogoed.
11 ”Gagan-papiroʼye-nugad neg-matagangi-dungumaladi, ega neg-mata dingudele, ¿sunna dungusi?
Gagan-diigi-dungumaladi, ega dii-dingudele, ¿sunna dungusi?
12 Ar we-gaganmala, amba aramaksiile, degi, amba siklessuli, ega dii-dingudele, yog-dinguar naddaed.
Gagan-bamaladba bur bule itosur dinguddaed.
13 Dulemar Bab-Dummad-ieddamaladi, we-gaganmaryob gumalad.
Dule-isganamar na e-ibmar-edarbediidi degibergudoed.
14 Dule-isgana e-ibmar-edarbediidi ega dub-garagwadyobi gued.
E-bensulid-nikadi, dibamaryob baisursunna e-ibe berguddaed.
15 Ar dule dibagi akaye-sogele, gege egi akaed, ar yoga-itirar naddaed.
Debayobi, e-bensulid-nikadi ega yoga-berguar naddaed.
16 Dule-isganamar, sapi dad-duurmaknaid-abin-gwichiyob gued.
E-anagan-nasgudele, bela napagi-gagan-naid odukued.
17 Degine, e-malimar akwa-imbaba uboddaed,
sabsur-akwagangi e-malimar diglesdaed.
18 Ar dule we-sapi-olasale, dulemar gwen egi bar binsaosurmalad,
we-sapide wegi gwichidaeddeeye.
19 Deyobi, dule-isganamar weligwar-itodiid berguddamogad,
e-sorba baigan dunguardaed.
20 ”Bab-Dummad gwen dule-innikidaed iedisulid,
degine, dule-isganadi ese obanledaed.
21 Bab-Dummad gannar yeer-itogega be-imakoed,
degine, yeer-itogedbali be binnasuli gordii guoed.
22 Dule-isdar-be-dakdimaladi, binge-gudii gumaloed,
degine, dule-isdarmalad-e-neguyamar bela bergudoed.”