6. BAB-JEHOVÁ, JOBʼGA SUNMAKSAD
38
(38:1–42:6)
Bab-Dummad dulemar-sunmaksad-abin-sogsad
1 Bab-Dummad burwa-ooreged-bipirmaknaidba Jobʼga sunmakded. Weyob ega sogded:
2 “¿Be doasunna? Emide be, an-binsaed-nikarbadgi be bengunaigu.
Emide be, binsaedsuli sunmaknaigu.
3 Be an-abin gwisgudena, an bese egisodo,
bule be an-abin-imakodibe.
4 ”An napneg-e-sailamar-urbenaigua, ¿bia be gudiinsunna?
¡Anga be sogena, be nue-ibmar-wisye soged!
5 ¿Doa napneg-naid-e-dungued imaksa?
¿Doa napneg-dungued wilubdaknai gusa?
6 Napneg-e-sailamar, ¿ibu-birgi bukwasunna?
¿Doa degite, e-akwasaila sisasunna?
7 Deunni, niis-buksurmar namaknanaigu,
degi, baliwiturmar yeer-itogedba oichomaknanaigu, ¿be gudii? Be gudisulid, be sated.
8 ”Deunni, demar napagi-nagudgua,
¿doa ega abingued-igar mesissunna?
9 An demargala moryobi mogirmar nasiksagua,
degi, ega garsonyobi mogirmar-gudureged nasiksabargua, ¿be gudii?
10 Ani an demarga abingued-igar nasiksagua, yawagak-dummaganyob ega an nasiksagua,
e-yawagakgi yabiyob ega an nasiksabargua, ¿be gudii?
11 Demarga an weyob sogsagua: ‘Wese be warmakoed, bar be naosurye.
Be-daomakedi, wese iirmakbukwa guoye,’ ¿deunni be gudii?
12 ”¿Negmeegwad-naguega bolegoedga be sogsa,
naguye?
13 ¿Negmeegwad bela napneggi-naguye be sogsa,
adi, dule-isganamar magar daklegegar?
14 Neg-meegwadbali napneg-e-yar-mullugana magar daklenonidaed,
e-daklegedi morgi-morgomar-akar-akar-odolesayob daklenonidaed.
15 Degidbali, dule-isganamar negmeegwad-abin ambikuosurmalad,
dule-isgana-e-garganguedi, bela bergunonikoed.
16 ”¿Ar be wila-arad-naid-solase be aideapi?
¿Bela be dii-ulakbali bipirmaksa?
17 Deginbali, ¿burgwed-negse be aideapbali?
¿Dule-burgwarmalad-e-galuse be arbi?
18 ¿Napneg-dungued be wisi?
Ar be we-ibmar nue-wisile, degite, be anga sogdo.
19 ”Deginbali, ¿be wisbali, bia gwallu-meegwad-neg sii?
¿Be wisbali, bia negsichid-neg sibali?
20 ¿Sunna be we-ibmarmar e-igarmarba-moed be imake?
¿Sunna be gannar e-negse sedabali?
21 Be wisirgebed, ar be deunni bato be gwalulesargebed.
Ar be dikasurgus gudisursi.
22 ”¿Ar dambed-sibudikmalad-sabolebukwad be dakapsi?
¿Dii-ologan-akwaga-binyarmalad-sabolebukwad be dakapsi?
23 An dii-ologan-sabolebukwadi,
naibid-dummad-ibagi-ebugega an sabobukwad.
Degi, bila-onoged-ibagangi-ebugega,
urweleged-ibagi-ebugega an sabobukwad.
24 ¿Be wisi, negmeegwad bia noardae, degi, igi nasguddae?
¿Be wisi, dad-nakwedsik-burwa-goled igi onoardae?
25 ”¿Be wisbali, doa dii-dummad owie?
¿Doa dii-dummadba-mesa mar-ogollomakmai imake?
26 ¿Doa nega-dulesulidganba dii owie?
¿Doa dule-buksurmaladba napaneg oge?
27 ¿Doa gaganmar-aradik-oniega, dii owie?
¿Doa napa-dutuu-imakega, dii owie?
28 ”¿Dii-wiedde bab nikasi?
¿Doa boo ogwalulesibali?
29 Be anga sogena, ¿bia dii-gwamakaled soblesii?
¿Doa dii-sibudikid onisibali?
30 ¿Doa dii akwayob-dutusuli imake?
¿Doa demar-dummad-naid osatelegega imake?
31 ”¿Sunna be niisgwamar-Pléyadesʼye-nugad danar-danar-naguega imake?
¿Sunna be niisgwamar-Oriónʼye-nugad aisakiega be imake?
32 ¿Sunna be bolegoedba niisgwamar-danar-danar-nanaid,
e-wachiba-onogega be imake?
¿Sunna be niisgwamar-Osa-Mayorʼye-nugad, degi, Osa-Menorʼye-nugad nabir-bipirmakega be imake?
33 ¿Be nibneg-seleged-igarmar-mamaid, be wisi?
¿Sunna be a-igarmar-mamaidba be napneg see?
34 ”¿Sunna be mogirga sogsale,
begi dii-dummad owiye?
35 ¿Be-sogedba mar gotedae?
¿Be sunmakdele, bebali mala yoga ibsaardae?
36 Degite, be anga sogdo, ¿doa gannir-macheredga binsaed uksa?
¿Doa sikwi-gikamarga binsaed daksa?
37 ¿Sunna be mogirmar ebise?
¿Doa napamar-sergudele, dinnaa nadele,
38 dutuu-imakegala dii owie?
39 ”¿Sunna be achumigurmarga masgunned amie?
¿Sunna e-mimmigan masgi be omae?
40 Achumigur e-negyaba dukumamaile, sapur-yaba masbina gudimalale,
¿sunna ega be mas amie?
41 ¿Ar bee be sikwisichimar masgi omae?
E-burwigana yoggusgudimalale,
degi, mas-satedba ukudmaad-gudiidba, anse gordimalale,
¿ega be mas amie?”