60
4b. Yoedse Jerusalén gandikidba yeer-daklegoed
(60:1–66:24)
Jerusalén neggwebur-gwapidga guoed
1 Bab-Jehová soged:
“¡Jerusalén-dulemar, be gwichigu!
¡Bela ibegwale be gumar!
¡Be-neg-ibegwaledi bese warmaknonikid!
Ani Bab-Jehová-gued.
An-gangued-yeerdaklegedi begi ibegwar naid.
2 Be dake, neg-gubyagwaledi napneg-gasanaid.
Degi, negsichidi, dulemargi naid.
Degi-inigwele, an-ibegwaledi begi mee-gaoed.
¡Begine, an-gangued-yeerdaklegedi oyolegoed!
3 Dule-yar-baid-baidgi-bukmaladi, be-neg-meegwadba gudii gumaloed,
degi, reymar be-neg-ibegwaledba nanadii gumaloed.
4 ”Nue be atake, be-dikarba be nue neg-dake:
Bela danar-ambikusmalad, bese danimalad.
Be-mimmigana dikasuli bese danimaloed.
Be-bunamala argangi-annikaa nidanimaloed.
5 Weyob be dakoed,
degi, weligwaledba be yeer itodoed,
ise-weligwaledba be-gwage dik-dik naguoed.
Degi, be-gwage ise-yeer itonaoed.
Ar begala neggwebur-demar-gakagi-bukmalad-e-ibmar-nuegan senonimaloed.
Degi, dulemar-yar-baid-baidgi-bukmalad-e-ibmar-nuegan bese warmaknonikoed.
6 Be-walik moli-yargan-muremalad engudoed.
Madián-dulemar-e-moli-yargan-muremalad, Efa-dulemar-moli-yargan-muremalad engudoed.
Bela Sabá-neggweburginmaladi bese nonimaloed,
bega ina-wawagana, degi, ormar senonimaloed.
Degine, an-nug-odummogagwale danimaloed.
7 Bega, Cedar-neggwebur-e-sibad-wawaadmar ambikunonikoed.
Degi, Nebaiot-neggwebur-e-sibad-wawaad-machergan bega ibnuedga guoed.
Adi, an-ailagi anga ibmar-nued-uklegedga guegar.
Degi, ani an, an-nug-odummoleged-neg yeerdaklege an imakoed.
8 ”Mogiryob-nasdamalad, ¿wede doamala?
Nuu-sibuyob e-uuse nadapdamalad, ¿wede doamala?
9 Neggwebur-demar-gakaba-bukmaladi angi benguosurmalad.
Tarsis-ur-dummagan, ur-dummagan-idudanikid.
We-urmar, dikasuli be-mimmigan-sedanikid,
degi, e-ormar, e-manimar sedanikid,
adi, an-nug-odummolegegar.
Ar ani an Israel-dulemar-e-Bab-Dummad-Isligwaledid,
ar ani an gandikidga be-imaksad.
10 ”Dule-ainebarmalad bega gannar galu-matusurmalad soboed,
degi, e-reymar bega arbamaloed.
An-urwedgi an sabsur-be-odurdaksa-inigwele,
an-sabguedgi an ise-wile be-dakoed.
11 Be-yawagak argasigu guoed,
mutikidbali, degi, ibginedbali gwen atiosulid.
Bega dulemar-yar-baid-baidgi-bukmalad-e-ibmar-nuegan seledanikoed,
e-reymar bese ilekwaa seledanikoed.
12 Dulemar-yar-baid-baidgi-bukmaladi, degi, yalamar-nanaidi,
beba ibmar-imaksulile, bela obelolegoed.
13 ”Líbano-yala-e-ibmar-nuegan-nikadi, bese warmakoed,
ciprés-sapi-warmar, baryawarmar, degi, abeto-sapi-warmar bese warmakoed.
Adi, an-neg-islidikid yeerdakle imakega,
an-mali-onakwed-gana-neg-siid-e-nug ogannogegar.
14 Dulemar-mesagwar-be-imakmalad-e-mimmigan, bese dulluu-ambikunonimaloed.
Bela dulemar isdar-be-dakmaladi, be-asabin sindigar-signonimaloed,
degi, weyob be-bimaloed, ‘Bab-Jehová-neggweburye,
Sión-yala, Israel-dulamar-e-Bab-Dummad-Isligwaledgadye.’
15 ”Be walagwen-melledgus-inigwele,
degi, be isdardakles-inigwele,
dule gwen be-igarba nanassur-inigwele,
degisadegu nug-dummarba-guega an be-imakoed,
degi, dulemar weligwar be-imakega an imakoed.
16 Dule-yar-baid-baidgi-bukmalad-e-mas be gunnoed,
reymar-e-ibmar-nuegan bega uklegoed.
Degisoggu, na be wisguoed, ani an Bab-Jehová be-Abonogedid.
Ani an Jacob-wagan-e-Bab-Dummad-gandikid be-bendakedid.
17 ”Esgoro-gordikid-muchubbi an bega olo sedagoed,
esgoro-muchubbi an bega mani sedagoed.
Urgo-muchubbi an bega esgoro-gordikid sedagoed,
degi, akwamar-muchubbi an bega esgoro sedagoed.
Neg-bogidikid-naguega an imakoed.
Degi, igar-innikigwadi negseega an imakoed.
18 Bipisaale bar be-yargi sabsur-imaklegedi, be itogosulid.
Bar be-yalagi neg-bibichedgi, degi, neg-obelogedgi sunmaklegosulid.
Ar ade, weyob be-galu-matusurmaladgi soglegoed:
‘Abonolegedye.’
Degi, be-yawagakmardi weyob bimarbaloed:
‘Bab-Dummad-nuggi-namaklegedye.’
19 Bar dad-ibeler bega neg-ibgi, neg-meegwadga guosulid,
degi, nii bar bega mee gaosurbalid.
Ar Bab-Jehová bega gwallu-meegwad-degisadeguadga guoed.
Be-Bab-Dummad be-gangued-yeerdaklegedga guoed.
20 Dad-ibeler bar bega argwanosulid,
degi, nii-gaedi gwen mommolegosurbalid.
Ar ani Bab-Jehová be-gwallu-meegwadga degisadegu guoed.
Geb agi be-wile-itodiidi bergunonikoed.
21 ”Degisoggu, bela innikigwadga be-dulemar guoed,
degi, bela be-dulemar napneg gaoed.
Sapi-ainiedyob ainidamaloed.
Ani an deyob imakoed.
An-sunnagwad an imakoed,
an-nug odummolegoed.
22 Dula-ichegwadi bur miliba (1,000) mergudoed,
bur-neggwebur-bipigwadi, neggwebur-gandikidga guoed.
Ani an Bab-Jehová gued.
We-ibmarmar-guoed-e-ibagan warmaknonikile, gwae-gwae-guega an imakoed.”