31
Egipto-dulemargi-bensurmaladi, duledar-wiles
1 Isaías weyob sogded:
“Egipto-dulemarse-bendakleged-amibukmaladi, ¡duledar-wilesmar!
Egipto-molimargi-bensurmaladi, degi, e-moli-ur-bila-onomalad-bukidar-nikadgi-bensurmaladi, ¡duledar-wilesmar!
E-sorda-bila-onomalad-ganguedgi bensurmaladi, ¡duledar-wilesmar!
Ar Israel-dulemar-e-Bab-Dummad-Isligwaleddi baisur-dakmalad,
ar Bab-Jehová-amiedgindi gwen binsasurmalad.
2 Degi-inigwele, dule Bab-Dummad yamogosulid,
ar ade, dule-binsaed-ibed maid.
Boni-dummagan barmidagoed,
ar ibmar-sogsale, sogedba imakedsedaed.
Bab-Dummadi, dule-isganamar-e-neguyagi gwichiguoed,
dule-ibmar-isgana-imakmalad-bendakdamaladgi gwichiguoed.
3 Ar Egipto-dulemardi, unnila dule gumalad, Bab-Dummadsurmalad.
E-molimala, sanakwaa gumalad, burbarsurmalad.
Ar Bab-Jehová, e-ganguedba dulemar-sabsur-odurdakdele,
dule-isgana-bendakmalad-obelogoed,
ese-bendaklesmarmogad-obelobaloed,
bela ebobela bergumaloed.”
4 Bab-Jehová weyob anga sogsad:
“Igi achumigur-nono-wawaad sibad-wawaad-gasa-uurmaknaile,
dule-sibad-edarbemalad ese urwed itodasuli,
degi, igi-achumigur-nono-wawaad-senigwad mas-gasa-uurmaknaile,
dulemar ogwayenaile, gwen dobdasuli,
deyobi, ani an-Bela-Gangued-Nikadi, Sión-yalabina-urwega,
e-yar-mulluganbina-urwega, an aidenonikoed.
5 Igi-nuumar e-mimmigan uugi-bukwale, edarbesidae,
deyobi, ani Bab-Jehová-Bela-Gangued-Nikadi, Jerusalén-dulemar-edarbemogoed,
dule-isganamargi ollorsaoed,
e-ular gwisguoed, bendakoed.”
6 Israel-dulemar, ar doagi bemar dummad-nosmala, ase be gannar namarsun.
7 A-ibagangine, bemar war-wargwen, bab-dummadyob-imaklemalad-manigi-sobaled, degine, orbi-sobaled, be metemaloed. Bab-Dummadgi-yolediidba bemar-sunnagwad be sobsagusmalad.
8 Bab-Jehová weyob soged:
“A-ibagine, Asiria-dulemar es-suidgi burgwemaloed,
degi-inigwele, dulemar imakosulid.
Es-suidgi-wakinnegala, duurmakdemaloed.
E-sapingan-bila-onomaladdi, maiga imaklemaloed.
9 E-rey bela-belad nue-dobe itodoed,
e-dummagana e-bander-ies wakitemaloed.”
Bato guagwar Sión-yalagi Bab-Jehová-e-soo gasiid,
Jerusalén-neggweburgi soo-yaa-matusulid bato dule-isdarmalad-idu guagwar siid.